Job 42 | TyvTUV | STEP | Иов Дээрги-Чаяакчыга мынча деп харыылаан:

‏ Job 42

Иовтуң Бурганга ийиги харыызы

1 Иов Дээрги-Чаяакчыга мынча деп харыылаан:

2 «Мен билир мен: бүгү чүве Сээң эргеңде,
чүнү-даа бодап аарыңга, Сеңээ болдунмас чүве чок ^a.
3 Билиг чок сөстер-биле
Сээң бодалыңны баксырадыр хире кым мен? ^b
Ийе, мен билбес чүвем дугайында,
меңээ билдинмес кайгамчык чүүлдер дугайында чугаалап турдум.
4 Мени дыңнап көрем, чугаалап көрейн;
Мен айтырайн, а Сен меңээ харыылап көрем ^c.
5 Сээң дугайыңда мооң мурнунда чүгле дыңнап турган мен,
а ам карактарым Сени көрүп тур.
6 Ынчангаш бүгү сөстеримден ойталап тур мен,
доозун-довурак, хүлде олуруп алган ^d, буруум миннип тур мен».

Түңнел сөс

7 Дээрги-Чаяакчы Иовка чугаазын дооскаш, Теман чурттуг Элифазка ^e мынча дээн:

«Сеңээ база сээң ийи эжиңге Мээң дугайымда Иов чалчам ышкаш шынын чугаалавааныңар дээш килеңим кыптыгып тур. 8 Ынчангаш чеди бугажык биле чеди кошкардан ап алгаш ^f, Мээң чалчам Иовка баргаш, ол малды бодуңар дээш бүрүн өрттедир өргүл кылдыр салыңар, а Мээң чалчам Иов силер дээш мөргүзүн ^g. Мен ооң мөргүлүн хүлээп алыр мен – оон башка силерни бужар сөстериңер дээш кезедир мен, чүге дээрге силер Мээң дугайымда Иов чалчам ышкаш шынын чугаалавадыңар».

9 Ынчан Теман чурттуг Элифаз, Шуах чурттуг Вилдад болгаш Наама чурттуг Софар ^h баргаш, Дээрги-Чаяакчының оларга дужааганын ёзугаар кылган. Дээрги-Чаяакчы Иовтуң мөргүлүн хүлээп алган.

10 Иов эш-өөрү дээш мөргүп дооскан соонда, Дээрги-Чаяакчы аңаа эки чолду эгидип берген: ооң мурнунда турганындан ийи катап хөйнү хайырлаан ⁱ. 11 Иовтуң бүгү эр, кыс ха-дуңмазы, бүгү биеэги таныш өөрү чедип келгеш ^j, ооң бажыңынга кады чемненип дойлаан. Олар Дээрги-Чаяакчының олче ытканы бүгү хай-халап дээш ону кээргеп, аргалап турган. Кижи бүрүзү Иовка бир кесита ^{▼▼ Кесита – эрте-бурунгу үеде акша-мөңгүннүң бир хемчээли (Э. д. 33:19 көр).} биле бир алдын сырга берген.

12 Дээрги-Чаяакчы Иовтуң чуртталгазының арткан чылдарында аңаа, биеэги чылдарынга бодаарга, оон-даа хөй ачы-буян хайырлаан. Ол ам 14 000 хой-өшкүлүг, 6000 тевелиг, 1000 эжеш шарылыг болгаш 1000 кыс элчигенниг апарган. 13 Ол чеди оолдуг, үш кыстыг болган ^l. 14 Бирги уруун Эмима деп, ийигизин – Кассия деп, үшкүзүн – Керен-Гаппух деп адап алган ^{▼▼ Эмима – көге-буга, Кассия – корица чечээ, Керен-Гаппух – херелденген кирбиктер дээн аттар.}. 15 Бүгү чер-делегейде Иовтуң уруглары дег кайгамчык чараш кыстар турбаан. Ачазы оларга акылары-биле өнчү үзүп берген ⁿ.

16 Ол бүгүнүң соонда Иов 140 чыл чурттап, бодунуң ажы-төлүнүң ук-салгалын дөрткү салгалга чедир көрген ^o. 17 Иов кыраан назынында, чуртталгазынга пөгүп, мөчээн.