Job 6 | TyvTUV | STEP | Иов ынчан мынча деп харыылаан:

‏ Job 6

Иовтуң чугаазы: мээң хомудалым чөптүг

1 Иов ынчан мынча деп харыылаан:

2 «Бир эвес мээң качыгдалымны деңзилеп,
хилинчээмни деңзи таваанче салыр болза,
3 ол далайлар элезининден-даа аар болур ийик! ^a
Ынчангаш мээң чугаа-соодум ындыг доңгун-дур.
4 Күчүлүг Бурганның согуннары мага-бодумда ^b,
мээң сеткил-чүрээм оларның хоранын ижип турар,
Бурганның ыдыпканы коргунчуг кеземчелер кырымда хөме келген.
5 Черлик элчиген, оът-сигени бар болза, алгырар бе,
шары, чиир чемниг болза, мөөрээр бе?

6 Дус чок аъш-чем амданныг бе,
чуурганың агында амдан бар бе?
7 Ындыг аъш-чемге дээр хөңнүм чок,
оон ам хөөн булганыр апардым!

8 О, дилээм боттаны берген болза,
Бурган мээң күзелимни күүсеткен болза –
9 Ол мени узуткап каарын болгааган болза,
холун сунгаш, чок кылып каан болза! ^c
10 Ындыг төнчү меңээ аргалал,
кадыг-дошкун аарышкы аразында өөрүшкү болур ийик –
Ыдыктыг Бурганның сөстеринден ойталавааным ол-дур!
11 Идегеп, манаар хире кандыг күштүг мен,
шыдажыр хире кандыг эчис сорулгалыг мен?
12 Мээң быжыым – даштың быжыы бе?
Мээң мага-бодум – хүлер бе?
13 Кандыг-даа деткимчени менден хунаап турда,
бодумга дузалаптар арга менде бар бе?

14 Эжинге энерелдиг эвес кижи
Бургандан коргуушкунну уттупкан-дыр ^{▼▼ Бо домактың утказы эки билдинмес. Болгу дег өске утказы мындыг: «Кижи Бургандан кортпас-даа апарган болза, эш-өөрүнүң шынчы чоруу аңаа херек».}.
15 А мээң ха-дуңмам, соглуучал дамырак дег, бүзүрел чок ^e,
савазыраан хем суу дег, доктаамал эвес ^f:
16 эрип чыдар доштан бораңгай-даа апаар,
хар эриирге, шапкын ага-даа бээр;
17 а кааңнаашкын эгелээрге, оожургап, соглур,
изип кааңнаарга, уну куруглап каар.
18 Чиңнер аңаа суг дилээш, оруктарындан өскээр барып,
ээн кургаг ховуже киргеш, өлүп чидер;
19 Фемадан ^g чиңчилер суг дилеп, харап көөр,
Шевадан ^h садыгжылар суг тып аарынга идегеп турар,
20 ынчалза-даа оларның идегели меге болур:
кургаг унга чедип келгеш, чөгели төнер.
21 Силер меңээ база ындыг хем дег апардыңар!
Мээң коргунчуг үүле-чолум көргеш, корга бердиңер.
22 Мен силерден белек дилеп тур мен бе
азы „Мен дээш байлааңардан хээли бериңер“деп тур мен бе?
23 „Дайзынның холундан мени адырыңар,
дарлакчылар холундан садып хостаңар“дидим бе?

24 Мени сургаңар, ынчан ыыттавайн баар мен,
шын эвес чүүл кылганымны көргүзүңер.
25 Шынныг сөстер күштүг-дүр ^{▼▼ Бо сөстерниң утказы эки билдинмес. Болгу дег өске утказы мындыг: «Шынныг сөстерни шыдажып эрттирери берге».},
а силерниң чемеңер чүнү шынзыдып турарыл?
26 Мээң сөстеримни буруу шавар деп тур силер бе?
Идегелин ышкынган кижиниң чугаазы чүгле хоозун хат бе? ^j
27 Силер өскүс кижиже-даа халдаар,
эжиңерни-даа садыптар ийик силер чоп!

28 Ам-на менче көрүп келиңер:
кызыл арныңарга-ла мегелээр деп мен бе?
29 Боданып көрүңер, бузут-бак үүлгетпеңер,
боданып көрүңер, мен актыг мен.
30 Мээң чугаамда шын эвес чүүл бар-дыр бе,
ажыг амданны ылгап шыдавас мен бе?»