Job 7 | TyvTUV | STEP | «Чер кырынга кижиниң хуу-салымы – шыланчыг күш-ажыл албаны, ооң хүннери

‏ Job 7

Иовтуң хилинчээ хемчээл чок

1 «Чер кырынга кижиниң хуу-салымы – шыланчыг күш-ажыл албаны, ооң хүннери – хөлечиктээр хүннер эвес бе? ^a 2 Хөлегеге дыштаныксап турар кул кижиге дег,
ажылы дээш төлевир манап турар хөлечикке дег ^b,
3 меңээ база хоозун куруг айлар онаашты,
мээң үлүг-хуум – хилинчектиг дүннер болду.
4 Удуп чыдыпкаш-ла, „Кажан турар мен“деп бодаар-дыр мен,
а дүн төнместеп, даң аткыже аңдарлып-дүңдерлип кээр-дир мен ^c.
5 Мага-бодумну курттар үглээн,
доозун сиңген балыглар шыпкан,
кежим кестип-чарлып, ириңнели берген.
6 Мээң хүннерим аргыыр херексел хемези дег караңайнып ^d,
төнчүзүнче чоокшулап, идегелим үстүп тур ^e.

7 Бурганым, сактып келем: мээң чуртталгам – эзин-бус-тур,
аас-кежикти катап база караам-биле көрбес мен.
8 Мени ам көрүп турар карак удавайн көргеш, тыппас,
Сен көрүп кээриңге, мен чок боор мен ^f.
9 Булуттуң шаарарып, чиде бээри дег,
өлүглер оранынче бада берген кижи эглип келбес;
10 бодунуң бажыңынче чанып келбес,
ооң турган чери ону ам танывайн баар ^g.

11 Ынчангаш мен аксы-сөзүм тыртпас мен,
качыгдаан сеткилимден чугаалаар мен,
хилинчектенген сагыжымдан хомудалым илередир мен.
12 Мен далай мен бе азы далай моозу мен бе ^{▼▼ Хананей мифологияда далай болгаш ында чурттап турар моостар Бурганның удурланыкчылары турган.},
чүге Сен мени таңныылдарга кадартып кагдың?
13 „Уйгум мени аргалаар,
дөжээмге сагыш аарыы оожургаар“деп бодаар-дыр мен.
14 А Сен мени дүштеримге коргудар-дыр сен,
көстүүшкүннер-биле сүртедир-дир сен!
15 Мындыг мага-боттуг чоруурунуң орнунга,
тыныжым боглуп каары, өлү бээри дээре турган ийик.
16 Чуртталга хөңнүмге дээпти ⁱ – дөмей-ле мөңге чурттаар эвес.
Мени каапкаш барам! ^j Мээң назыным чүгле хей-бус ^k болгай.
17 Кижи деп кымыл ол – Сен чүге ону өрү көдүрүп,
ол дээш сагыш човаар сен? ^l
18 Чүге эртенниң-не аңаа кээп,
ону үргүлчү шенеп турар сен? ^m
19 Таанда-ла көрүжүңнү менден чайлатпас сен бе ⁿ,
хензиг-даа када болза мени салыптып,
чараа ажырыптар чай бербес сен бе?
20 Бачыттыг дижик мен. Сээң Бодуңга багай чүнү кылдым,
кижилер Харагалзакчызы?
Чүге мени согуннарыңга кара кылып алдың? ^o
Канчап мен Сеңээ аартык болу бердим?
21 Бир эвес кандыг-бир бачыт үүлгеткен болзумза,
чүге мени өршээвес сен,
кем-буруумну менден адырбас сен?
Мен ам удавайн чер алдынче кире бээр мен,
мени дилээриңге-даа, чок боор мен!»