‏ Job 8

Вилдадтың чугаазы: Бурган шынны хажытпас

1Шуах чурттуг Вилдад ^a мынча деп харыылаан:

2«Ындыг чугааны үр чугаалаар сен бе?
Сээң сөстериң – чүгле күштүг хат-тыр.
3Таанда-ла Бурган чөптүг шииткелди хажыдар бе,
Күчүлүг Бурган шынны хажыдар бе? ^b
4Бир эвес ажы-төлүң Аңаа удур бачыт үүлгеткен болза,
Ол оларның кем-буруузун боттарының баштарынче халдаткан-дыр.
5А бир эвес сен Бурганче чүткүүр болзуңза,
Күчүлүг Бурганга чанныр болзуңза,
6бир эвес арыг болгаш чөптүг-шынныг болзуңза,
Ол ам дораан сен дээш хөделип, дузалаар,
аал-ораныңны ачы-хавыяаң ёзугаар катап база тургузуп каар ^c.
7Сен эгезинде чөгенчиг ынай-даа турган болзуңза,
адак сөөлүнде өндүр улуг апаар сен.

8Шаандагы салгалдардан айтырып көр,
оларның ада-өгбезиниң билип алган чүүлүн хандыр көрүп көр ^d;
9чүге дээрге бис дүүн чаа төрүттүнген бис, билир чүвевис чок,
чер кырында хүннеривис хөлеге-биле дөмей-дир ^e.
10Ынчангаш ол салгалдар сени өөредип, сургап кагзын,
сеткил-чүрээн чугаа-сөзүнге ажытсын.

11Тулаа чок черге хыыргыыш үнер бе?
Суг чок болза, кулузун өзер бе?
12Олар ам-даа чечектелип, одура кестинмээн бол,
кандыг-даа оът-сигенден дүрген кадып каар ^f.
13Бурганны уттупкан бүгү улустуң хуу-салымы ол-дур ^g,
Оон ойталаан кижиниң идегели өлүп төнер ^h.
14Ындыг кижиниң ынаныжы удазында астынган,
ооң чөленгиижи – ээремчик дузаа-ла ⁱ.
15Ээремчик дузаанга чөленирге, ол үстүп каар ^j,
оон халбактанырга, ууп шыдавайн баар.
16Ындыг улус хүн караанга өзүп үнген үнүшке дөмей,
өзүмнери сесерликке чүк башка шөйлүр;
17дазылдары оваалап каан даштарже орааштынып кирип,
хая-даш аразындан чаза булгап үнүп кээр.
18А оларны турган черинден тура тыртыптарга,
ол чер боду-ла олардан ойталап:
„Силерни кажан-даа көрбээн мен!“– дээр ^k.
19Ындыг улустуң оруунда үнген өөрүшкүзү ол-ла-дыр!
А черден өскелери үнүп кээр.

20Бурган буруу чок кижиден ойталавас,
а бузуттуг кижини деткивес!
21Ол сээң аксыңны каткы-биле ^l,
боостааңны – өөрүшкүлүг алгы-биле катап база долдуруптар.
22А сээң дайзыннарың бак адын хеп дег кедип алыр ^m,
бузуттугларның аалдары чиде бээр!»