Job 9 | TyvTUV | STEP | Иов мынча деп харыылаан:

‏ Job 9

Иовтуң чугаазы: Бурган-биле маргыжар арга чок

1 Иов мынча деп харыылаан:

2 «Мен билир мен: ол бүгү ылап-ла ындыг.
Ынчалза-даа кижи амытан Бурганның мурнунга канчап агартынарыл? ^a
3 Кандыг-бир кижи Ооң-биле чаргылдажыр дээр болза ^b,
Ооң салган муң айтырыының чаңгызынга-даа харыылап шыдаар эвес.
4 Мерген угаанныг-даа, күчү-күштүг-даа кижи
Бурган-биле маргышкаш ^{▼▼ Азы: «Кандыг-бир кижи мерген угаанныг болгаш күчү-күштүг Бурган-биле маргышкаш».}, менди арткан деп чүве турган бе?
5 Ооң дагларны канчаар шимчедирин кым-даа билип шыдавас,
килеңнээнде, оларны буза шаап кааптар.
6 Бурган черни туружундан чылдырып,
ону тургускан адагаштарны сириледип турар ^d.
7 Ол дужаарга, хүн үнмес,
сылдыстарны таңмалап каарга, чырывас.
8 Ол дээрлерни чааскаан чада салып ^e,
далайның бедик чалгыгларын базып турар.
9 Ол Чеди-Хаан, Үш-Мыйгак, Үгер сылдыстарны ^f,
мурнуу чүктүң чырымалдарын чаяап каан.
10 Ооң ажыл-херээ өндүр улуг, билип аары болдунмас,
кайгамчык чүүлдери эмге-тикчок ^g.
11 Ол мурнум-биле эртер болза, мен көрбес мен,
чаным-биле эрте берзе, эскербес мен.
12 Ол хунаап аарга, кым-даа эгидип шыдавас,
кым-даа Аңаа: „Бо канчап бардың?!“– дивес.
13 Бурган Бодунуң килеңин соксатпас –
Рахавтың ^{▼▼ Рахав – хананей мифологияда сугнуң күчүтен моозу.} бараан болукчулары безин Ооң мурнунга кээп дүшкен! ⁱ

14 Мен канчап Аңаа харыылаар мен?
Ооң-биле маргыжар сөстерни кайыын тывар мен?
15 Актыг-даа болзумза, харыы тудуп шыдавас мен,
Шииткекчимден өршээл дилеп, чанныр ужурлуг мен ^j.
16 Ол мээң кыйгымга харыылаар-даа болза,
мени Ол дыңнаар деп бүзүревес мен.
17 Ол менче казыргы дег хөме таварып келгеш,
хей черге балыгларымны көвүдедир-дир;
18 тыныш алыр арга бербес-тир,
муңгагдал-биле мени долдурар-дыр.
19 Хамык ужур күште болза, Ол – күчү-күштүг-дүр,
а шынныг шииткелде болза, ону канчап чедип аар мен? ^k
20 Актыг-даа болзумза, аксы-дылым бодумну буруудадыр ^l,
буруу чок-даа болзумза, Ол мени буруулуг деп көөр.

21 Мээң буруум чок! ^m Меңээ ам дөмей-ле,
чуртталгамны херекке албас апардым, ол мээң хөңнүмге дээпти ⁿ.
22 Бүгү чүве бир дөмей! Ынчангаш чугаалап тур мен:
Бурган буруу чок-даа кижини, бузуттуг-даа кижини чок кылып турар ^o.
23 Хенертен тавараан айыылга өлүртүп турар
буруу чоктарның муңгагдалын Ол кыжырып каттырар.
24 Чер бузуттугларның эргезинге хүлээттинген,
шииткекчилерниң караан Ол дуглап турар ^p –
а Ол эвес болза, өске кым деп?

25 Мээң хүннерим шапкынчыдан-даа дүрген маңнаар ^q –
эки чүүл көрбейн дезип чоруп турлар;
26 дүрген хемелер ышкаш,
олчазынче шүүргедеп баткан эзир ышкаш, караш кыннырлар.
27 „Хомудалым уттуптайн,
хөлүгүр хевирим өскертип, хүлүмзүрүүйн“– дизимзе-даа,
28 чаа хилинчектен коргар-дыр мен.
Мени агартпазыңны билир мен,
29 буруудап артар мен,
ындыг болганда, хей черге күженген херээм чүл?
30 Хар суу-биле чунуп-даа алзымза,
саваң-биле холум арыглап-даа алзымза ^r,
31 дөмей-ле Сен мени хир-бокче суптар сен –
хевим безин менден ческинер.

32 Бурган дээрге кижи эвес-тир, канчап Ооң-биле маргыжар мен ^s,
канчап Ооң-биле кады шииткел черинче баар мен.
33 Бистиң аравыста эптештирикчи чок,
холун ийилдиривисче салыптар кижи чок;
34 Бурган мени девидетпезин дээш,
Ооң мергезин менден чайладыптар кижи чок.
35 Чүгле ынчан коргуп-сүртевейн чугаалап шыдаар ийик мен;
бодум буруулуг эвес мен дээрзин чугаалаар ийик мен ^{▼▼ Бо домактың утказы эки билдинмес. Болгу дег өске утказы мындыг: «Ынчалза-даа байдал ындыг эвес, мен чааскаан мен».}».