‏ Joel 1

1Дээрги-Чаяакчының Патуилдиң оглу Иоилге ажыткан сөзү бо-дур.

Мөөң шартылааның халдаашкыны

2Ирейлер, дыңнаңар, чер-чурттуң бүгү чурттакчылары, кичээнгей салыңар!
Силерниң чурттап турар үеңерде азы ада-өгбеңерниң чурттап турган үезинде
ол ышкаш чүве болган бе?
3Ол дугайында ажы-төлүңерге чугаалап бериңер,
а олар боттарының ажы-төлүнге дамчытсын,
а оларның ажы-төлү дараазынга салгалга чугаалап берзин ^a.
4Шартылаа чиген соонда арткан чүвени чаш шартылаа чип турган,
чаш шартылааның соонда арткан чүвени шерги чип турган,
а шергиниң соонда арткан чүвени чаш шерги төндүр чип каапкан ^b.

5Арагачылар, оттуп келгеш, ишкирнигип ыглаңар ^c.
Виноград арагазы ижип турар бүгү улус,
ооң чулуунуң ажыын ажып, ыглаңар,
чүге дээрге ону силерниң аксыңардан хунаап алган-дыр.
6Мээң черимче күштүг, санап четпес хөй чон келген-дир.
Ооң диштери – арзылаң диштери, азыглары – кыс арзылаңныы-ла ^d.
7Ол чон виноградым сыптарын хоозурадып каапкан,
фига ыяштарымны сыйып каапкан –
ооң чөвүрээзин карттап кааптарга, будуктары агарып калган.

8Качыгдал хевин кеткен, ынак эжиниң ажыын ажып турар
кыс ышкаш ыглап-сыктаңар.
9Дээрги-Чаяакчының өргээзинде далган-тараа болгаш арага өргүлү ам чок-тур.
Дээрги-Чаяакчының бараан болукчулары, Бурганның бараалгакчылары
качыгдап ыглажып тур.
10Шөлдер хоозураан, чер ыглап чыдар ^e,
чүге дээрге тараа узуткаттынган,
виноград чулуу хайлып калган ^f, олива ыяш кургап калган.
11Тараачыннар, муңгараңар ^g, виноград ажаакчылары, ишкирнигип ыглаңар.
Шөлдерде арбай, кызыл-тас чок болган-дыр,
12виноград сыптары кургап, фига ыяштары кадып калган-дыр.
Гранат, пальма ыяштары болгаш яблонялар шупту
шөлде кургап калган-дыр,
ынчангаш кижи амытанның хөглээшкини соксаан-дыр ^h.

Бурганга чаннырынче чонну кыйгырганы

13Бурганның бараалгакчылары, качыгдал хевин кедип алыңар, ыглап-сыктаңар.
Өргүл бедигээжиниң мурнунда бараан болуп турар улус, ишкирнигип ыглаңар ⁱ.
Мээң Бурганымның бараан болукчулары, чедип келгеш,
качыгдал хевин кеткеш, өргээге дүннү эрттириңер,
чүге дээрге Бурганыңарның өргээзинде далган-тараа болгаш арага өргүлдери ам чок-тур ^j.
14Ыдыктыг шээрлээшкинден доктаадыңар, онзагай чыыштан чарлаңар,
чоннуң баштыңнарын болгаш чурттуң бүгү чурттакчыларын
боттарыңарның Бурганыңар Дээрги-Чаяакчының өргээзинге чыылдырыңар,
дуза дилеп, Ону кыйгырыңар ^k.

15Аа халак! Дээрги-Чаяакчының шииткел хүнү чоокшулаан-дыр ^l.
Ол хүннүң чедип кээри күчүлүг Бургандан келген хоозураашкын дег боор.
16Бис көрүп турувуста-ла, аъш-чемивис чок апарып,
Бурганывыстың өргээзинден өөрүшкү биле хөглээшкин чиде берген эвес-тир бе? ^m
17Тараа үрезини чер иштинге бырыжып калган,
аңмаарлар үрелип, тараа урар черлер куруглаан,
чүге дээрге тараа ам чок-тур.
18Мал-маганның човууртап турарын!
Өөр малдар муңгаргай тояап чоруур,
чүге дээрге оларның одар-белчиири чок.
Кодан хойлар база хилинчек көрүп турар.

19Дээрги-Чаяакчы, мен дуза дилеп, Сени кыйгырып тур мен,
чүге дээрге ховуда одар-белчиирни от чипти,
шөлде бүгү ыяштарны чалбыыш өрттедипти ⁿ.
20Черлик дириг амытаннар безин Сеңээ чаннып тур ^o,
чүге дээрге дамырак суглар соглуп калган-дыр,
ховуда одар-белчиирни от чипкен-дир.