Joe 2 | TyvTUV | STEP | Сионга трубадан этсиңер, Бурганның ыдыктыг даанга дүвүрээзин медээзин бериңер . Чер-чурттуң бүгү чурттакчылары сирилезин, чүге дээрге Дээрги-Чаяакчының шииткел хүнү кел чыдар-дыр, ол хүн чоокшулап келген-дир.

‏ Joel 2

Бурганның аг-шерииниң халдаашкыны

1 Сионга трубадан этсиңер, Бурганның ыдыктыг даанга дүвүрээзин медээзин бериңер ^a.
Чер-чурттуң бүгү чурттакчылары сирилезин,
чүге дээрге Дээрги-Чаяакчының шииткел хүнү кел чыдар-дыр,
ол хүн чоокшулап келген-дир.
2 Ол дээрге кара булуттарлыг, дүмбей караңгы хүн-дүр ^b.
Хөй санныг, күштүг чон имир ышкаш чаттылыпкан кел чыдыр ^c.
Эрте-бурунгу үелерде-даа турбаан, келир салгалдарда-даа турбас чон ол-дур.
3 Ол чоннуң мурнунда хөме ап турар от бар,
а артында – өрттендир чип турар чалбыыш бар ^d.
Ол бээр келбээнде, бо чер Эдемниң сесерлии дег турган ^e,
а ол келгеш баарга, кургап калган хову дег апаар.
Кым-даа ол чондан камгаланып шыдавас.
4 Ооң хевири аъттар хевири дег, ол халдып орда, чүгүрүк аъттар-ла ^f.
5 Ол чон даглар бажы-биле дайынчы тергелер даажы дег шимээргеп,
чалбыыштыг оттуң оът-сигенде дазырааны дег шимээн үндүрүп,
тулчуру-биле чыскаалыпкан аг-шериг ышкаш халдып орар.
6 Ол аг-шеригни көргеш, өске чоннар сирилей бээр,
бүгү улустуң арыннары агарып каар ^g.
7 Ол чон мөгелер дег маңнажып халдаар,
ханаларже дайынчылар дег халбактанып үнер.
Олар шупту чыскаалган аайы-биле чоруп,
бар чыдар уг-шиинден өскээр барбас ^h.
8 Олар аразында баскылашпас, кайызы-даа чиге мурнунче бар чыдар;
чыскаалын үревейн, камгалалды өттүр чаза булгаар ^{▼▼ Бо домактың утказы эки билдинмес. Болгу дег өске утказы мындыг: «Оларны согуннар-даа, чыдалар-даа доктаадып шыдавас».}.
9 Олар хоорайже чүткүп кирип, ханаларны дургаар маңнажып,
бажыңнарже, оорлар ышкаш, соңгалар таварып кире бээр ^j.
10 Оларның мурнунга чер сириңейнип, дээр чайганып,
хүн биле ай өжүп, сылдыстар чырытпастаар ^k.

11 Дээрги-Чаяакчының үнү Ооң аг-шерииниң мурнунга дыңналыр,
Ооң аг-шерии дүк-түмен, Ооң сөзүнүң күүседикчилери күчү-күштүг.
Дээрги-Чаяакчының шииткел хүнү өндүр улуг болгаш аажок коргунчуг.
Ону кым шыдап эртерил? ^l

Бурганның чонга Бодунче эглирин дужааганы

12 Дээрги-Чаяакчы: «Ам безин Менче бүгү чүлдү-чүрээңерден,
шээрленип база ишкирнип ыглап тургаш, эглип келиңер ^m» – деп медеглээн.

13 Качыгдалдан хевиңер эвес, чүректериңер чара тырткаш,
боттарыңарның Бурганыңар Дээрги-Чаяакчыже эглип келиңер,
чүге дээрге Ол килеңнээчел эвес, ээ көрнүүчел,
кээргээчел, өндүр улуг энерелдиг-дир ⁿ,
Ол аазаан кеземчезин күш чок болдурарынга белен.
14 Кым билир боор? Ол өскээр боданып, кезетпейн баарын,
харын силерге ачы-буянныг бооп артып каарын ^o.
Ынчан Бурганыңар Дээрги-Чаяакчыга өргүүр далган-тараа биле арага четчир боор ^p.

15 Сионга трубадан этсиңер ^q,
ыдыктыг шээрлээшкинден доктаадып, онзагай чыыштан чарлаңар ^r.
16 Чонну бөлүп, ыдыктыг чыыштан кылыңар,
ирейлерни чалаңар, элээди, чаш уругларны кыйгырып эккелиңер ^s.
Күдээ оол безин бодунуң өрээлинден,
келин кыс – өгленчир бажыңындан үнүп келзин.
17 Дээрги-Чаяакчының өргээзиниң мурнунда,
серилиг чер биле өргүл салыр бедигээш аразында ^t турар
Бурганның бараалгакчылары ыглап-сыктап, мынча дишсин:
«Дээрги-Чаяакчы, Бодуңнуң чонуңга хайыраңны көргүзем,
Бодуңнуң өнчүң болур улусту бак сөглетпем,
бисти өске чоннар кыжырбазын;
чүге ол чоннар аразында: „Оларның Бурганы кайыл?“– дижип турарыл? ^u»

Израиль чонга ачы-буян кээр

18 Дээрги-Чаяакчы ынчан Бодунуң чери дээш хүннээчелин ^v база
Бодунуң чонунга кээргелин көргүзер.
19 Дээрги-Чаяакчы Бодунуң чонунга мынча деп харыылаар:
«Мен силерже далган-тараа, чаа арага болгаш олива үзү чорудуп бээр мен –
ол бүгү-биле тодар силер,
моон соңгаар өске чоннарга силерни бак сөглетпес мен.
20 Мен соңгу чүктен келген аг-шеригни силерден ырадып,
куруг, кургап калган черже үндүр сывырыптар мен.
Оларның мурнукуларын чөөн чүкте далайже,
а соондагыларын – барыын чүкте далайже чорудуптар мен ^w,
оларның мөчү-сөөктеринден бак чыт үнер, хоралыг чыт тараар ^x.
Чүге дээрге олар хөй бузутту үүлгеткен-дир ^{▼▼ Азы: «Бурганның херектери өндүр улуг-дур».}».

21 Чер-чурт, кортпа! Сен өөрүп-хөгле,
чүге дээрге Дээрги-Чаяакчы өндүр улуг чүүлдү кылыр-дыр ^z.
22 Черлик дириг амытаннар, кортпаңар ^aa,
чүге дээрге хову-шөлдерде одар-белчиирлер ногаарара берген-дир,
ыяштар чимизин берип турар-дыр,
фига ыяжы биле виноград сывы элбек дүжүт берип турар-дыр.
23 Сионнуң чону, өөрүңер,
боттарыңарның Бурганыңар Дээрги-Чаяакчыга хамааржырыңар дээш хөглеңер! ^ab
Ол силерге чөптүг-шынныы-биле чаъсты хайырлаар ^{▼▼ Бо домактың утказы эки билдинмес. Болгу дег өске утказы: «Ол силерге чөптүг-шынныг чорукка өөредир башкыны чорудуп бээр».},
ооң мурнунда дег, күскү, часкы чаъстарны хайырлаар ^ad.
24 Тараа шаңнарын дүжүт дола бээр,
доскаарларны чаа арага болгаш олива үзү чык дола бээр.

25 «Силерже ыдыпканым өндүр улуг аг-шериим болур
шартылаа биле шергиниң дүжүттү чип турган чылдары дээш ^ae,
Мен силерге орнун тургузуп бээр мен ^{▼▼ Азы: «Чип турганы дүжүттүң орнун ийи дакпыр тургузуп бээр мен».}.
26 Пөккүже чемненип, тода бээр силер,
Бурганыңар Дээрги-Чаяакчының адын алдаржыдар силер.
Мен силерни бодааш, кайгамчык чүүлдү кылдым,
Мээң чонум моон соңгаар кажанда-даа бак атка кирбес.
27 Ынчаарга Мээң израиль чоннуң аразында турарымны,
Мени – силерниң Бурганыңар Дээрги-Чаяакчы деп,
өске Бурган чок деп билип аар силер ^ag.
Мээң чонум моон соңгаар кажанда-даа бак атка кирбес».

Бурганның Бодунуң Сүлдезин бээри хүн

(Аж.-ч. 2:17-21)

28 «Ооң соонда мындыг боор:
Мен Бодумнуң Сүлдем-биле бүгү улусту бүргей аптар мен ^ah.
Силерниң оглу-кызыңар өттүр билип медеглеп эгелээр,
кырганнарыңар өттүр билген дүштер дүжээр,
аныяк оолдарыңар онзагай көстүүшкүннер көөр.
29 Ол хүннерде Мен эр, кыс чалчаларны безин
Бодумнуң Сүлдем-биле бүргей аптар мен.
30 Дээрге база черге кайгамчык бадыткал демдектери:
хан, от болгаш дүргектелген ышты көргүзер мен ^ai.
31 Дээрги-Чаяакчының өндүр улуг, коргунчуг шииткел хүнү чедип кээр бетинде
хүн дүмбей караңгы бооп, ай хан өңнүг бооп хуула бээр ^aj.
32 Ынчан Дээрги-Чаяакчының адын кыйгырган кижи бүрүзү камгалал алыр ^ak.
Дээрги-Чаяакчының аазаанын ёзугаар
Сион дагга база Иерусалимге хоргадаан чон дириг артар ^al;
Дээрги-Чаяакчының Бодунче кыйгырып алган улузу өлбейн баар».