Jon 1 | TyvTUV | STEP | Дээрги-Чаяакчы Амиттайниң оглу Ионага Бодунуң сөзүн ажыдып:

‏ Jonah 1

Медээчиниң Бургандан дезиптерин оралдашканы

1 Дээрги-Чаяакчы Амиттайниң оглу Ионага ^a Бодунуң сөзүн ажыдып: 2 «Улуг хоорай Ниневияже ^b дүрген чорупкаш, ында чурттаан улусту билиндир сургап каг, чүге дээрге оларның кемниг үүлгедиглери меңээ билдингир апарды» – деп чугаалаан.

3 А Иона Дээрги-Чаяакчыдан дезип, Фарсисче ^c чоруптарын шиитпирлээн. Ол Иоппия хоорайга ^d чедип келгеш, Фарсисче эжиндирип чоруур деп турган корабль тып алгаш, орук хөлезинин берипкеш, Дээрги-Чаяакчыдан дезип, Фарсисче эжиндирип чорууру-биле олурупкан.

4 Ынчалза-даа Дээрги-Чаяакчы далайга күштүг хат көдүрүпкен. Кончуг күштүг шуурган эгелей бээрге ^e, корабль бустур деп барган. 5 Корабльга чораан далайжылар корга бергеш, кижи бүрүзү бодунуң бурганындан дуза дилеп кыйгырып, корабльды чиигедири-биле чүъгүн далайже дүжүр октап эгелээннер ^f. А Иона корабльдың иштинче кирип чыдып алгаш, чаза удуп калган турган.

6 Корабльдың кол удуртукчузу аңаа чедип келгеш: «Чүге удуп чыдыр сен? Туруп кел, бодуңнуң бурганыңдан дуза дилеп кыйгыр. Канчап билир, сээң бурганың бисти кээргей бээр болза, өлбейн баар-даа чадавас бис» – дээн ^g.

7 Далайжылар мынча дишкеннер: «Кымның хайы-биле бо халап бистиң кырывыста диргелип келгенин билип алыр-дыр, барып төлгеден октап көрээлиңерем». Төлгени октаарга, ол Ионага дүшкен ^h. 8 Ынчан олар Ионадан: «Чогум черле чүү кижи сен, бо халап чүү дээш бисти таварааныл, чугаалап көрем? Кайыын келген, кандыг ажыл-хожулдуг кижи сен? Чуртуң кайдал, кандыг чоннуң төлээзи сен?» – деп айтырганнар.

9 А Иона: «Мен – еврей кижи мен, а мээң мөгеер Бурганым – далайны болгаш черни чаяаган, дээрде саадаан Дээрги-Чаяакчы ⁱ» – деп харыылаан.

10 Дээрги-Чаяакчыдан дезипкенин Иона чугаалаарга, ол улус дендии корткаш, аңаа мынча дээннер: «Чүнү үүлгедип кааның ол?!» 11 Олар оон: «Далай оожургай бээр кылдыр сени канчалзывысса экил?» – деп айтырганнар, чүге дээрге далайның хөлзээшкини ам-даа читпейн турган.

12 Иона оларга: «Мени туткаш, далайже киир октаптыңар, ынчан ол оожургай бээр. Чүге дизе мээң хайым-биле бо күштүг шуурган эгелээнин билип тур мен» – дээн. 13 Ынчалза-даа олар эрикче чоокшулаар дээш кораблин улам күштүг эжип эгелээннер. Далайның хөлзээшкини уламчылап турарындан олар черже чоокшулап чадап кааннар.

14 Ынчан олар Дээрги-Чаяакчыны кыйгырып: «О, Дээрги-Чаяакчы! Бо кижи дээш биске кем-буруу онаап, узуткавайн көрем. Ооң амызын үскенивис дээш, бисти буруудатпайн көр ^j. Дээрги-Чаяакчы, Бодуңнуң-на кылыр дээн чүүлүңнү кылып турар-дыр сен!» – дээннер. 15 Олар Ионаны туткаш, далайже киир октаптарга, далай коргунчуг хөлзээшкинин соксадып, оожургай берген ^k. 16 Ынчан ол улус Дээрги-Чаяакчыдан аажок коргуп, Аңаа өргүл салып, даңгыраан бергеннер ^l.