aХост. 24:13; Сан. 27:18-20; Ы. х. к. 1:38
bЫ. х. к. 34:5
cЫ. х. к. 11:24
dЭ. д. 15:18; Сан. 34:1-12; Ы. х. к. 11:24
eЫ. х. к. 7:24
fХост. 3:12; Башт. 6:16
gЫ. х. к. 31:5-8; Евр. 13:5
hЫ. х. к. 31:6-7, 23
iЫ. х. к. 5:32
jЫ. х. к. 17:18-19
kЫд. ыр. 1:2
lЫ. х. к. 1:21; 31:8
mЫ. х. к. 16:18
nСан. 32:17-26; Ы. х. к. 3:18
oСан. 32:29; Ы. х. к. 3:20; Иис. 22:1-9

‏ Joshua 1

Иисус – израиль чоннуң чаа баштыңы

1Дээрги-Чаяакчының чалчазы Моисейниң өлгениниң соонда, ооң дузалакчызы – Нуннуң оглу Иисуска a Дээрги-Чаяакчы мынча дээн: 2«Мээң чалчам Моисей өлүп калды b. Ам сен бүгү израиль чон-биле кады бо Иордан хемни кеже бер – Мээң бо чонга берип турарым чуртче чоруптуңар. 3Силерниң буттарыңар базар кандыг-даа черлерни, Моисейге аазааным ёзугаар, Мен силерге бериптер мен c. 4Силерниң чериңер кызыгаары ээн кургаг ховудан эгелээш, дуу Ливан дагларынга, улуг Евфрат хемге база барыын чүкте Улуг далайга чедир шөйлүр d – хет чоннуң бүгү чуртун ээлээр силер. 5Бүгү назыныңда сеңээ удур кым-даа туржуп шыдавас болур e. Моисей-биле кады чорааным ышкаш, сээң-биле база кады болур мен f. Мен сени кагбас мен, сенден ойталавас мен g.

6Кадыг-быжыг болгаш эрес-дидим бол h. Сен бодуңнуң чонуңга Мээң оларның ада-өгбезинге бээр бооп даңгыраглааным бо черни ээлээр кылдыр хүлээдип бээр сен. 7Чүгле кадыг-быжыг болгаш кончуг эрес-дидим бол. Мээң чалчам Моисейниң сеңээ чагааны хоойлуну бүрүнү-биле сагыырын утпа. Ол хоойлудан оң-даа, солагай-даа талаже чайгылбас болзуңза i, сээң орууң каяа-даа ак болур. 8Ол хоойлуда бижээн сөстерни аксыңдан дүжүрбейн, үргүлчү чугаалап чор j. Ону дүн-хүн дивейн бодап k, сагыырын утпа – ынчан сээң чорууң чогуур болгаш орууң ажык болур. 9Сеңээ дужаадым чоп: кадыг-быжыг болгаш эрес-дидим бол, коргуп-сүртеве! l Дээрги-Чаяакчы Бурганың каяа-даа сээң-биле кады боор».

10Иисус чоннуң удуртукчуларынга m: 11«Турлагны эргип кезээш, чонга: „Орукка чиир кылдыр аъш-чемден белеткеңер. Үш хонгаш, бо Иордан хемни кешкеш, Дээрги-Чаяакчы Бурганыңарның силерге өнчү кылдыр берип турары черже ону ээлеп аары-биле чоруптар силер“» – деп чарлаарын дужааган.

12А Рувимниң, Гадтың аймактарынга база Манассияның аймааның чартыынга Иисус мынча дээн: 13«Дээрги-Чаяакчының чалчазы Моисейниң силерге чүнү чугаалаанын утпайн көрүңер: „Дээрги-Чаяакчы Бурганыңар силерге бо черни бергеш, аңаа тайбың чуртталганы хайырлаан-дыр“. 14Ам силерниң кадайларыңар, ажы-төлүңер, мал-маганыңар маңаа, Иорданның бо талазынга, Моисейниң силерге берген черлеринге, артып калзын n. А силер, дайылдажып шыдаар улус, чепсегленип алгаш, ха-дуңмаңарның оруун баштап, оларга дузалажыңар. 15Амдыызында Дээрги-Чаяакчы оларга, силерге дег, тайбың чуртталганы хайырлаваан-дыр. Кажан олар Дээрги-Чаяакчы Бурганыңарның берип турары чуртун эжелеп аарга, чүгле ынчан силер ээп чанып келгеш, Дээрги-Чаяакчының чалчазы Моисейниң силерге бергени, Иордан хемниң чөөн талазында чуртту ээлеп ап болур силер» o.

16Олар Иисуска: «Сен чүү деп чарлык болур сен, шуптузун күүседир бис. Кайнаар барыңар деп дужаай-дыр сен, ынаар баар бис. 17Моисейни дыңнап чораанывыс дег, сени дыңнаар бис – чүгле Дээрги-Чаяакчы Бурганың, Моисей-биле кады чорааны дег, сээң-биле кады чоруур болза. 18Сээң чугааңны тоовас болгаш сээң дужаалыңны күүсетпес кижи бүрүзү өлүртүр. Сен чүгле кадыг-быжыг болгаш эрес-дидим бол!» – деп харыылааннар.
Copyright information for TyvTUV