‏ Joshua 18

Өске аймактарга черни үлээни

1Бүгү израиль ниитилел Силом хоорайга чыглып келгеш, аңаа Ужуражылга майгынын тип алган ^a. Бүгү чуртту эжелеп алган-даа болза, 2израильчилерниң чеди аймаа ам-даа үлелгеге хувааглыг чер албаан турган.

3Ынчан Иисус израильчилерге мынча дээн: «Силерниң ада-өгбеңерниң Бурганы Дээрги-Чаяакчының силерге бергени черни ээлеп аарда, ам чеже шүшпеңнеп кээр силер? 4Аймак бүрүзүнден үш-үш кижиден шилип бериңер. Оларны бо чуртту эргээш, черниң байдалын бижип демдеглеп, аймактарга канчаар үлээрин билип алгаш, катап меңээ чедип кээр кылдыр чорудуптайн. 5Олар черни чеди кезекке чарып алзын. (Иуданың аймаа мурнуу чүкте хувааглыг черге турумчуп алзын, Иосифтиң салгалдары соңгу чүкте хувааглыг черге турумчуп алзын.) 6Черниң байдалын бижип демдеглеп алгаш, чеди кезекке үлеп алгаш, меңээ борта эккеп көргүзүңер. Дээрги-Чаяакчы Бурганывыстың мурнунга төлге даштарын октааш, ол черни силерге тодарадып бээр мен. 7Чүгле левиттер силерниң араңарга хувааглыг чер албас, чүге дээрге Дээрги-Чаяакчының бараалгакчылары болуру – оларның үлүг-хуузу-дүр ^b. А Гадтың, Рувимниң аймактары болгаш Манассияның аймааның чартыы Дээрги-Чаяакчының чалчазы Моисейниң бергенин ёзугаар Иордан хемниң чөөн талазында черлерни ээлээр кылдыр алганнар ^c».

8Черниң байдалын бижиир ужурлуг улуска, чоруурунуң бетинде, Иисус мындыг чарлык үндүрген: «Бо чуртту эргип кезээш, байдалын бижип алгаш, катап меңээ чедип келиңер. А мен ынчан маңаа, Силомга, Дээрги-Чаяакчының мурнунга төлге даштарын октааш, черни силерге тодарадып бээр мен». 9Ол улус чоруткаш, чуртту эргип кезээш, бүгү хоорайларын дептерге демдеглеп, чеди кезекке үлеп алгаш, Силомда турлагда Иисуска чедип келген. 10Иисус Силомга Дээрги-Чаяакчының мурнунга төлге даштарын октааш, израильчилерниң арткан аймактарынга хувааглыг черлерни үлеп берген.

Вениаминниң девискээри

11Баштай-ла Вениаминниң аймаа төрел бөлүктер аайы-биле дараазында хувааглыг черни алган. Оларның үлүү болур чери Иуданың болгаш Иосифтиң салгалдарының черлериниң аразында болган. 12Оларның соңгу кызыгаары – Иордан хемден эгелээш, Иерихоннуң соңгу талазы-биле эрткеш, барыын чүкте дагларны таварааш, Бет-Авенниң ээн кургаг ховузунга четкен. 13Оон кызыгаар Лузтуң (азы Вефилдиң) мурнуу талазы-биле эрткеш, Алдыы Бет-Ороннуң мурнуу чүгүнде дагда турар Атарот-Адарже бадып четкен. 14Барыын кызыгаары – Бет-Орон дужунда (мурнуу чүгүнде) турар дагдан кызыгаар Иуданың аймааның Кириат-Ваал (азы Кириат-Иарим) деп хоорайынга эрткен. 15Мурнуу кызыгаары – Кириат-Иаримден барыын чүкче чоруткаш, Нефтоах сугларының үнген бажынга четкен. 16Оон кызыгаар Бен-Энном шынаазының баарында – Рефаим шынаазының соңгу талазында даглап баткаш, Бен-Энном шынаазын таварып, Иевус хоорайның мурнуу талазын эрткеш, Эн-Рогелче чорупкан. 17Оон соңгу чүкче ээпкеш, Эн-Шемешти эрткеш, Адуммим бедигээжиниң дужунда чыдар Гелилотче углапкаш, Боганның Хаязынче бадып келген (Боган дээрге Рувимниң үре-салгалы турган) ^d. 18Оон кызыгаар Иордан шынаазынче көрүнген дагның ийин соңгу тала-биле эрткеш, шынааже бадып келгеш, 19Бет-Хогланың соңгу талазы-биле чоруткаш, Иордан хемниң мурнуу аксынга – Дус далайның соңгу мугулдурунга чедип төнген. Вениаминниң девискээриниң мурнуу кызыгаары ол-дур. А чөөн кызыгаары – Иордан хем. 20Вениаминниң аймааның төрел бөлүктер аайы-биле алган черлериниң кызыгаары ындыг чүве-дир.

21Вениаминниң аймаанга төрел бөлүктер аайы-биле хамааржыр хоорайлар бо-дур: Иерихон, Бет-Хогла, Эмек-Кециц, 22Бет-Арава, Цемараим, Вефил, 23Аввим, Фара, Офра, 24Кефар-Аммонай, Афни база Гива – суурлары-биле кады он ийи хоорай;

25Гаваон, Рама, Беерот, 26Мицпа, Кефира, Моца, 27Рекем, Ирфеил, Тарала, 28Цела, Элеф, Иевус (азы Иерусалим), Гивеат база Кириат-Иарим – суурлары-биле кады он дөрт хоорай ^e.

Вениаминниң аймааның төрел бөлүктер аайы-биле үлелгеге алган черлери ол-дур.