Jos 19 | TyvTUV | STEP | Ийи дугаарында Симеоннуң аймаа төрел бөлүктер аайы-биле хувааглыг черни алган. Оларның чери Иуданың аймааның чериниң аразында болган.

‏ Joshua 19

Симеоннуң девискээри

1 Ийи дугаарында Симеоннуң аймаа төрел бөлүктер аайы-биле хувааглыг черни алган. Оларның чери Иуданың аймааның чериниң аразында болган.

2 Оларга хамааржыр хоорайлар бо-дур ^a: Беэр-Шева (азы Шева), Молада, 3 Хацар-Шуал, Вала, Эцем, 4 Элтолад, Вефул, Хорма, 5 Циклаг, Бет-Маркавот, Хацар-Суса, 6 Бет-Леваот база Шарухен – суурлары-биле кады он үш хоорай;

7 Аин, Риммон, Этер база Ашан – суурлары-биле кады дөрт хоорай. 8 Ол хоорайларны долгандыр турар бүгү суурлар, Ваалат-Беэрге (азы Негевте Рамага) чедир безин суурлар Симеонга хамааржыр. Симеоннуң аймааның төрел бөлүк аайы-биле үлелгеге алган черлери ындыг чүве-дир.

9 Симеоннуң аймаанга черни Иуда аймааның черинден үзүп берген турган. Иуданың аймааның хувааглыг чериниң девискээри оларга улуг турган болгаш, Симеоннуң аймаанга черни ооң аразындан берген чүве-дир ^b.

Завулоннуң девискээри

10 Үш дугаарында Завулоннуң аймаа төрел бөлүктер аайы-биле хувааглыг черни алган. Оларның чериниң кызыгаары Саридке чедир шөйлүп чоруткан. 11 Ооң кызыгаары барыын чүкте Маралага четкеш, Дабешетти таварааш, Иокнеамның баарында хемге четкен. 12 Саридтен дедир чөөн талада хүн үнер чүкче углааш, Кислот-Фаворже эрткеш, Давратты таварааш, Иафияга четкен. 13 Моон чөөн талада Гат-Хеферге, Итта-Кацинге четкеш, Риммонну таварааш, Неяже углаан. 14 Оон кызыгаар Ханнатоннуң соңгу талазы-биле эрткеш, Ифтах-Эл шынаазынга төнген. 15 Оон аңгыда Завулонга Каттат, Нагалал, Шимрон, Идеала база Вифлеем хоорайлар хамааржыр.

Суурлары-биле кады шупту он ийи хоорай Завулонга хамааржыр. 16 Завулоннуң аймааның төрел бөлүктер аайы-биле үлелгеге алган черлери, оларның хоорай, суурлары ол-дур ^c.

Иссахарның девискээри

17 Дөрт дугаарында Иссахарның аймаа төрел бөлүктер аайы-биле хувааглыг черни алган. 18 Оларның девискээринге хамааржыр хоорайлар бо-дур: Изреел, Кесуллот, Сунем, 19 Хафараим, Шион, Анахарат, 20 Раввит, Кишион, Авец, 21 Ремет, Эн-Ганним, Эн-Хадда, Бет-Пацец. 22 Оон ыңай кызыгаары Фавор, Шагацима база Бет-Шемеш деп хоорайларны таварааш, Иорданга чедип төнген – суурлары-биле кады он алды хоорай. 23 Иссахарның аймааның төрел бөлүктер аайы-биле үлелгеге алган черлери, оларның хоорай, суурлары ол-дур.

Асирниң девискээри

24 Беш дугаарында Асирниң аймаа төрел бөлүктер аайы-биле хувааглыг черни алган. 25 Оларның девискээринге хамааржыр хоорайлар бо-дур: Хелкат, Хали, Ветен, Ахсаф, 26 Аламелех, Амад база Мишал. Оларның кызыгаары барыын чүкте Кармил болгаш Шихор-Ливнафка четкен. 27 Оон дедир-ле хүн үнер чүкче ээпкеш, Бет-Дагонда Завулоннуң черлери-биле кызыгаарлажы бээр, а соңгу талазында Ифтах-Эл шынаазы чыдар. Ол черниң кызыгаарынче Бет-Эмек болгаш Неиел база кирип турар. Оон кызыгаар соңгу талазында Кавулче чоруптар. 28 Оон ыңайлаарга Эврон, Рехов, Хаммон база Кана таварааш, Улуг Сидонга четкен. 29 Кызыгаар Рамаже ээпкеш, шивээ-хоорай Тирге четкен, оон Хоссаже ээпкеш, далай кыдыында Ахзив деп черге төнген. 30 Оон аңгыда Умма, Афек база Рехов деп хоорайлар Асирге хамааржыр.

Суурлары-биле кады шупту чээрби ийи хоорай Асирге хамааржыр. 31 Асирниң аймааның төрел бөлүктер аайы-биле үлелгеге алган черлери, оларның хоорай, суурлары мындыг-дыр.

Неффалимниң девискээри

32 Алды дугаарында Неффалимниң аймаа төрел бөлүктер аайы-биле хувааглыг черни алган. 33 Оларның чериниң кызыгаары Хелефтен (Цананнимде аргадан) эгелээш, Адами-Некев, Иавнеил база Лаккумну таварааш, Иордан хемге барып төнген. 34 Оон кызыгаары барыын чүкче ээпкеш, Азнот-Фаворну таварааш, Хуккокка четкен. Девискээри мурнуу чүгүнде Завулоннуң черлери-биле, барыын чүгүнде Асирниң черлери-биле, чөөн чүгүнде Иордан хем-биле ^{▼▼ Өске бурунгу сөзүглелде «Иордан хем-биле, Иуданың черлери-биле» деп бижээн.} кызыгаарлажып чыдар. 35 Неффалим аймааның шивээ-хоорайлары: Циддим, Цер, Хамат, Раккат, Киннерет, 36 Адама, Рама, Асор, 37 Кедес, Эдрея, Эн-Гацор, 38 Иреон, Мигдал-Эл, Хорем, Бет-Анат база Бет-Шемеш.

Суурлары-биле кады шупту он тос хоорай Неффалимге хамааржыр. 39 Неффалимниң аймааның төрел бөлүктер аайы-биле үлелгеге алган черлери, оларның хоорай, суурлары ол чүве-дир.

Данның девискээри

40 Чеди дугаарында Данның аймаа төрел бөлүктер аайы-биле хувааглыг черни алган. 41 Оларның девискээринге хамааржыр хоорайлар бо-дур: Цора, Эштаол, Шемеш хоорай, 42 Шаалаввин, Айалон, Ифла, 43 Элон, Тимна, Экрон, 44 Элтеке, Гивветон, Ваалат, 45 Игуд, Бене-Верак, Гат-Риммон, 46 Ме-Иаркон, Ракон, Иоппия хоорайның мурнунда чыдар чер база.

(Данның аймаа бодунуң девискээринге эрге-чагыргазын чидирипкен соонда ^e, 47 Ласем деп хоорайже халдааш, ону эжелеп алгаш, ооң чурттакчыларын хылыш-биле шанчып өлүргеш, ээлеп чурттай берген. Ол хоорайны бодунуң өгбезинге тураскаадып, Дан деп адап алган.) ^f

48 Данның аймааның төрел бөлүктер аайы-биле үлелгеге алган черлери, оларның хоорай, суурлары ындыг чүве-дир.

Иисустуң ээлел чери

49 Хувааглыг черлерни үлежип дооскаш, израильчилер Нуннуң оглу Иисуска база боттарының аразындан хувааглыг черни бергеннер. 50 Дээрги-Чаяакчының айыткалы-биле аңаа ооң бодунуң дилээни, Эфрем дагларында турар Тимнат-Серах хоорайны бергеннер ^g. Иисус ол хоорайны катап тургузуп алгаш, аңаа чурттай берген.

51 Бурганның бараалгакчызы Элеазар, Нуннуң оглу Иисус база аймактарның баштыңнары төлге даштарын октааш, Силомда Ужуражылга майгынының кирер черинге Дээрги-Чаяакчының мурнунга израильчилерге шак ындыг хувааглыг черлерни үлеп бергеннер. Чер үлелгези ынчалдыр доозулган чүве-дир.