Joshua 11
Соңгу чүкте хоорайларны эжелеп алганы
1Асорнуң хааны Иавин ол болуушкуннарның дугайында дыңнааш, Мадоннуң хааны Иовавче, Шимроннуң болгаш Ахсафтың хааннарынче, 2соңгу чүкте даглыг черлерде хааннарже, Киннерет хөлдүң мурнуу чүгүнде Иордан хемниң шынаазында хааннарже, барыын чүкте шатта база Нафот-Дорда хааннарже, 3чөөн чүктен далайга чедир чурттап турар хананей чонче, даглыг черлерде чурттап чоруур амор, хет, ферез, иевус чоннарже, Эрмон даг эдээнде Мицпа деп черде хиввей чонче шапкынчыларын чорудупкан. 4Ол бүгү хааннар далайның элезини дег хөй санныг аг-шерии-биле кады дайынче үнүпкеннер; оларның аъттары болгаш дайынчы тергелери эңмежок турган a. 5Ол хааннар шупту катчып алгаш b, Израиль-биле чаалажыр дээш, Мером сугларының чоогунга кады турлагжып алганнар. 6Дээрги-Чаяакчы Иисуска: «Олардан кортпа. Даарта, бо-ла үеде, Мен оларның шуптузун израильчилерге чылча шаптырар кылып каар мен. Сен оларның аъттарының балдырларының сиирлерин үзе кезип каг c, а дайынчы тергелерин өрттедивит» – дээн. 7Иисус болгаш дайылдажып-ла шыдаар бүгү улус хенертен Мером сугларынче үнүп келгеш, дайзыннарынче халдай бергеннер. 8Дээрги-Чаяакчы ол хааннарның аг-шериин израильчилерниң холунга хүлээдип бээрге, оларны чылча шапкаш, артканнарын улуг Сидон хоорайга чедир, Мисрефот-Маимге чедир, чөөн чүкте Мицпа шынаазынга чедир сүргеш, дириг кижи арттырбайн, шуптузун кыргып-хыдып каапканнар. 9Иисус Дээрги-Чаяакчының чагааны дег, оларның аъттарын берттиндиргеш, тергелерин өрттедипкен. 10Дедир ээп ора, Иисус Асорну эжелеп алгаш, ооң хаанын хылыш-биле өлүрүп каапкан. (Ол үеге чедир Асор ол чоок-кавыда күрүнелерниң баштың хоорайы турган чүве-дир.) 11Аңаа турган амылыг чүве бүрүзүн хылыш-биле кыргып-хыдып, чаңгыс-даа кижи арттырбайн, узуткап каапкаш, Асорну хуюктапкан. 12Иисус ол хааннарны шуптузун тудуп ап d, хоорайлары-биле кады эжелеп алгаш, оларны Дээрги-Чаяакчының чалчазы Моисейниң дужааганын ёзугаар хылыш-биле кыргып-хыдып, бүрүнү-биле узуткап каапкан e. 13Ындыг-даа болза, Иисустуң өрттедипкени Асордан аңгыда, израильчилер дөңнерде ▼▼ Дөң – еврей дылда мында турар «тел» деп сөс шаг шаанда аңаа турган хоорайның орнунга дөңнелип арткан, өске чаа хоорай тудуп каан черни көргүзүп турар.
турар хоорайларны өрттетпээннер. 14Эжелеп алганы хоорайлардан тыпкан олчазын болгаш мал-маганны израильчилер боттары үлежип алганнар, а хоорайларның чурттакчыларын чаңгыс-даа кижи арттырбайн хылыш-биле кыргып-хыдып каапканнар. 15Ынчалдыр кылырын Дээрги-Чаяакчы Бодунуң чалчазы Моисейге дужааган, а Моисей ону Иисуска дужааган чүве-дир g. Дээрги-Чаяакчы Моисейге чүнү чагааныл, Иисус чаңгыс-даа сөс хажытпайн, шак-ла ынчалдыр күүсеткен. 16Иисус ынчалдыр бүгү чуртту: дагларны, Негев ховуну шуптузун, Гошен деп черни шуптузун, шатты, Иордан хемниң шынаазын, Израильдиң даглыг-даа, чавызааш-даа черлерин, 17Эдомнуң чоогунда турар Халлак дагдан Эрмон дааның эдээнде Ливан шынаазында турар Ваал-Гадка чедир эжелеп алгаш, шупту хааннарны туткаш, өлүрүп каапкан. 18Үр үениң дургузунда Иисус ол бүгү хааннар-биле дайылдажып келген. 19Гаваоннуң чурттакчылары хиввейлерден аңгыда h, израильчилер-биле тайбың керээзи чарган хоорай чок болган: оларның шуптузун дайын-биле чаалап алган. 20Дээрги-Чаяакчы ол чоннарны израильчилер-биле дайылдажыр кылдыр чөрүү-дедир кылып каан i – израильчилер Дээрги-Чаяакчының Моисейге дужааганын ёзугаар оларны кыргып-хыдып, кам-хайыра чокка бүрүнү-биле узуткап каапсын дээш, Ол ынчаар кылган j. 21Ол үеде Иисус Хевронда, Давирде, Анавта, Иудеяның болгаш Израильдиң тейлеринде чурттап турар энак аймакче k халдап келген. Иисус оларның хоорайларын эжелеп алгаш, боттарын бүрүнү-биле узуткап каапкан. 22Израильчилерниң черинде энак аймактан чаңгыс-даа кижи артпаан (олар чүгле Газада, Гефте база Азотта арткан) l. 23Иисус ол бүгү чуртту эжелеп алгаш, Дээрги-Чаяакчының Моисейге чугаалаан бүгү сөстерин ёзугаар, ону израильчилерге аймак аайы-биле үлеп бергеш, оларга ээлээри-биле берипкен m. Дайын төнген, ол чуртка тайбың үе доктааган n.
Copyright information for
TyvTUV