Jos 16 | TyvTUV | STEP | Ооң соонда төлге даштары октаарга, Иосифтиң салгалдарынга мындыг үлүг онаашкан: оларның девискээриниң мурнуу кызыгаары Иерихон чоогунда (Иерихоннуң суг бажының чөөн талазында) Иордан хемден эгелээш, ээн кургаг ховуну таварааш, даглыг черде турар Вефил хоорайга четкен.

‏ Joshua 16

Эфрем биле Манассияның девискээрлери

1 Ооң соонда төлге даштары октаарга, Иосифтиң салгалдарынга мындыг үлүг онаашкан: оларның девискээриниң мурнуу кызыгаары Иерихон чоогунда (Иерихоннуң суг бажының чөөн талазында) Иордан хемден эгелээш, ээн кургаг ховуну таварааш, даглыг черде турар Вефил хоорайга четкен. 2 Вефилден Лузка четкеш, архи төрел бөлүктүң черинде ^a Атарот хоорайже шилчий берген. 3 Оон барыын чүкче даглардан бадып, иафлет төрел бөлүктүң черин таварааш, Алдыы Бет-Оронга база Гезерге четкеш, далай кыдыынга төнген.

4 Иосифтиң салгалдары болур Манассия болгаш Эфремниң аймактары база боттарының ээлээр черлерин алган чүве-дир. 5 Эфремниң аймааның төрел бөлүк аайы-биле алган черлери бо-дур: оларның мурнуу кызыгаары – чөөн чүкте Атарот-Адардан эгелээш, Үстүү Бет-Оронну таварааш, 6 далай кыдыынга төнген. Чөөн кызыгаары – соңгу чүкте Михметаттан чөөн чүкче ээп, Таанат-Силомни таварааш, Ианохтуң чөөн талазы-биле эрткеш, 7 Атарот биле Нааратче даглардан баткаш, Иерихонга үскеш, Иордан хемге четкен. 8 Соңгу кызыгаары – Таппуахтан Кана хем-биле барыын чүкче эртип, далайга четкен.

Эфремниң аймааның төрел бөлүк аайы-биле алган черлери ол-дур. 9 Ол аймакка хоорай, суурларны Манассияның аймааның черинден ылгап берген чүве-дир. 10 Эфремниң аймаа Гезерге чурттап турган хананей чонну үндүр ойлатпаан болгаш, хананейлер ам-даа оларның аразында чурттап, оларның ажылын кылыр албатылары бооп чоруур чүве-дир ^b.