Jos 24 | TyvTUV | STEP | Иисус Израильдиң бүгү аймактарын Сихемге чыып алгаш, оларның баштыңнарын, удуртукчуларын, шииткекчилерин база даргаларын кыйгыртып алган. Олар Бурганның мурнунга чедип кээрге,

‏ Joshua 24

Бурган-биле керээзин чоннуң чаартканы

1 Иисус Израильдиң бүгү аймактарын Сихемге чыып алгаш, оларның баштыңнарын, удуртукчуларын, шииткекчилерин база даргаларын кыйгыртып алган. Олар Бурганның мурнунга чедип кээрге, 2 Иисус бүгү чонга Израильдиң Бурганы Дээрги-Чаяакчының дараазында сөстерин дамчыдып, мынча деп чугаалаан: «Шаг төөгүден бээр силерниң ада-өгбеңер, оларның иштинде Авраам биле Нахорнуң адазы Фарра ^a, Евфрат хем ындынга чурттап, өске бурганнарга бараан болуп чораан. 3 Силерниң өгбеңер Авраамны хем ындындан ханаан черже эккелгеш, бо черни шуптузун эргиткен мен ^b. Мен ооң салгалдарын көвүдеткеш, аңаа Исаакты хайырлаан мен ^c. 4 Исаакка Иаков биле Исавты хайырлаан мен ^d. Исавка ээлээр кылдыр даглыг Сеирни берген мен ^e. А Иаков оолдары-биле Египетче чоруй барган ^f.

5 Моисей биле Ааронну ынаар чорудупкаш ^g, Египетти Мээң чорутканым айыыл-халаптар-биле кезеткен мен ^h. Оон силерни ол черден үндүрүп эккелген мен ⁱ. 6 Силерниң өгбелериңерни Египеттен үндүрүп эккээримге, силер Кызыл далайга чедип келген силер. Ынчан египетчилер силерниң өгбелериңерни далайга чедир аъттыг, дайынчы тергелерлиг сүргеннер ^j. 7 Силерниң өгбелериңер Дээрги-Чаяакчыдан дуза дилеп кыйгырарга, Ол израильчилер биле египетчилерниң аразынга дүмбей караңгы тургузупкан ^k. Дээрги-Чаяакчы египетчилерге удур далай аксыптарга, олар аңаа дүлнүп калганнар ^l. Египетчилер-биле чүнү кылыпканымны силер боттарыңар карааңар-биле көрген силер. Ооң соонда силер үр үениң дургузунда ээн кургаг ховуга чурттаан силер ^m.

8 Силерни Мен Иорданның барыын талада амор чоннуң чуртунче эккелген мен. Аморлар силер-биле дайылдажып эгелээрге, оларны Мен силерниң холуңарга берип каан мен. Мен оларны кыргып-хыдып кааптарымга, силер оларның черлерин ээлээр кылдыр ап алган силер. 9 Ынчан Сепфорнуң оглу, моав хаан Валак израильчилерге удур дайылдажып үнгеш, Беорнуң оглу Валаамны силерни каргаттырары-биле кыйгыртып алган турган ⁿ. 10 Ынчалза-даа Валаамны дыңнаар хөңнүм чок болган, ынчангаш ол силерни алгап-йөрээп каан ^o. Силерни ооң холундан Мен адырып каан мен. 11 Оон Иорданны кешкеш, Иерихонга чедип келген силер ^p. Силер-биле иерихончулар, амор, ферез, хананей, хет, гергес, хиввей база иевус чоннар дайылдажып эгелээрге, Мен оларны силерниң холуңарга берипкен мен ^q.

12 Силерниң хылыштарыңар-даа эвес, чаларыңар-даа эвес, а Мээң чорутканым улуг арылар ^{▼▼ Азы: «Улуг коргуушкун» (Хост. 23:28; Ы. х. к. 7:20 көр).} ийи амор хаанны мурнуңардан үндүр ойладыпканы ол-дур ^s. 13 Силерге Мен бодуңар холуңар-биле болбаазыратпааныңар черни база тутпааныңар хоорайларны бердим ^t. Ам силер ол хоорайларда чурттап, бодуңар холуңар-биле тарып өстүрбээниңер виноградтың, оливаның кат-чимизин чип чурттап чор силер».

14 Оон Иисус мынча дээн: «Ынчангаш Дээрги-Чаяакчыдан коргуп чоруңар, Аңаа арыг-шынчы сеткилиңер ханызындан бараан болуңар ^u. Ада-өгбеңерниң Евфрат хем ындынга болгаш Египетке чурттап турган үезинде бараан болуп чорааны бурганнарындан ойталаңар. Чүгле Дээрги-Чаяакчыга бараан болуңар. 15 Бир эвес силер Дээрги-Чаяакчыга бараан болурунга таарзынмас болзуңарза, кымга бараан болуруңарны бөгүн шилип алыңар ^v: Евфрат хем ындынга чурттап чорааш, ада-өгбеңерниң чүдүп чорааны бурганнарынга бе? Амгы үеде оларның черинде чурттап турарыңар аморларның бурганнарынга бе? А мен болгаш мээң өг-бүлем Дээрги-Чаяакчыга бараан болур бис!»

16 Чон Иисуска: «Дээрги-Чаяакчыдан ойталааш, өске бурганнарга бараан болур деп чүве биске кажан-даа болбас! 17 Дээрги-Чаяакчы Бурганывыс бисти-даа, өгбелеривисти-даа египет кулданыышкындан адырып каан. Бистиң мурнувуска кайгамчыктыг чүүлдерни Ол кылып чораан. Ол бисти хары чоннарның черлеринге бүгү эрткен оруувуста карактап, оларның шуптузундан камгалал-кадагалап чораан. 18 Дээрги-Чаяакчы аморларны – бо черге чурттап чораан чоннарны бистиң мурнувустан үндүр ойладыпкан болгай. Ынчангаш бис Аңаа бараан болур бис, Ол бистиң Бурганывыс-тыр» – деп харыылаан.

19 Оон Иисус чонга: «Дээрги-Чаяакчыга бараан болуп шыдавас силер. Ол – ыдыктыг Бурган-дыр! ^w Ол – хүннээчел Бурган-дыр ^x! Ол силерниң үймээнчи чорууңарны болгаш бачыттарыңарны шыдажып эртпес. 20 Бир эвес силер Дээрги-Чаяакчыдан ойталап, хары бурганнарга бараан болур болзуңарза, Ол силерге хайырлаан бүгү ачы-буянының соонда хора чедирип, силерни узуткап кааптар ^y» – дээн.

21 «Чок, бис Дээрги-Чаяакчыга бараан болур бис» – деп, чон харыылаан.

22 «Дээрги-Чаяакчыга бараан болур деп шилилгеңерниң херечилери боттарыңар болур силер» – деп, Иисус чугаалаарга: «Ийе, херечилер бис» – деп, чон бадыткаан.

23 «Ынчаарга силерде кандыг хары бурганнар барыл, олардан ойталааш, чүрээңерни Израильдиң Бурганы Дээрги-Чаяакчыже угландырыңар» – деп, Иисус чугаалаан.

24 Чон Иисуска: «Дээрги-Чаяакчы Бурганывыска бараан болур бис, Ону тооп дыңнаар бис» – дээн.

25 Иисус ол хүн Сихемге чоннуң өмүнээзинден Бурган-биле керээ кылып алгаш, оларга дүрүм-хоойлу үндүрүп каан, 26 Бурганның хоойлу номунга ол бүгүнү киир бижип каан ^z. Ооң соонда ол улуг даш ап алгаш, ону Дээрги-Чаяакчының ыдыктыг черинде дуб ыяш адаанга салып кааш ^aa, 27 бүгү чонга: «Көрүңер, бо даш бистиң аравыска херечилел болур ^ab, чүге дээрге ол Дээрги-Чаяакчының бистиң-биле чугаазын дөгерезин дыңнаан. Бир эвес силер Бурганыңарны мегелээн болзуңарза, ол силерге удур херечи болур» – дээн.

28 Ынчан Иисус чонну ээлеп чурттаан черлеринче тарадып чандырыпкан ^ac.

Иисустуң мөчээни

(Башт. 2:7-9)

29 Ооң соонда Нуннуң оглу, Дээрги-Чаяакчының чалчазы Иисус 110 харлыг тургаш, өлүп калган. 30 Иисусту бодунуң ээлээн черинге, Эфрем дагларында Гааш дагның соңгу талазында турар Тимнат-Серахка хөөржүдүп каан ^ad. 31 Израильчилер Иисус дириг чорда-даа, Иисустуң соонда Дээрги-Чаяакчының Израиль дээш чүнү кылганын билир баштыңнарның үезинде-даа Дээрги-Чаяакчыга бараан болуп келгеннер.

32 А Иосифтиң мөчү-сөөгүн израильчилер Египеттен Сихемге эккелгеш, Иаковтуң Эмморнуң салгалындан (Эмморнуң бир оглун Сихем дээр турган) чүс кесита-биле ^{▼▼ Кесита – эрте-бурунгу үеде акша-мөңгүннүң бир хемчээли. Бир кесита бир хой өртээ-биле деңнежип турган чадавас.} садып алганы, Иосифтиң үре-салгалының ээлээн чери апарган шөлүнге ажаап кааннар ^af.

33 Ооң соонда Аароннуң оглу Элеазар база өлүп калган. Ону Эфрем дагларында, оглу Финеестиң Гива деп хоорайынга ажаап каан чүве-дир.