Jos 5 | TyvTUV | STEP | Иорданның барыын чүгүн чурттаан амор хааннар болгаш далай чоогу чурттуг хананей хааннар шупту Дээрги-Чаяакчы Иордан хемниң суун, израильчилер ону кеже бээр кылдыр, кургадып соолдурупканының дугайында медээни дыңнааш, кортканындан сузу бастынып калган. Израильчилер-биле олар ам туржуп диттикпээн.

‏ Joshua 5

1 Иорданның барыын чүгүн чурттаан амор хааннар болгаш далай чоогу чурттуг хананей хааннар шупту Дээрги-Чаяакчы Иордан хемниң суун, израильчилер ону кеже бээр кылдыр, кургадып соолдурупканының дугайында медээни дыңнааш, кортканындан сузу бастынып калган. Израильчилер-биле олар ам туржуп диттикпээн.

Галгалга кыртыжап демдектээшкин болгаш Хосталыышкын байырлалын демдеглээни

2 Ол өйде Дээрги-Чаяакчы Иисуска: «Чидиг бижектерден кылып алгаш, израиль чоннуң аразында кыртыжадып демдектетпээн улус-биле ёзулалды кылып каг» – дээн. 3 Иисус чидиг бижектер кылып алгаш, израильчилерниң эр улузун Аралот деп тейге ^{▼▼ Аралот тей – «Кыртыжап демдектээшкинниң тейи» деп уткалыг.} кыртыжап демдектеп каан.

4 Иисустуң кыртыжап демдектээшкин ёзулалын кылганының чылдагааны мындыг чүве-дир. Дайылдажып шыдаар эр улус шупту Египеттен үнгеш, ээн кургаг ховуга чорааш, орук ара өлгүлеп калган ^b. 5 Египеттен үнген бүгү эр улус кыртыжадып демдектедип алган турган, а ээн кургаг ховуга Египеттен көжүп турган үезинде төрүттүнген эрлер кыртыжадып демдектетпээн турган. 6 Израильчилер ээн кургаг ховуга дөртен чыл иштинде көжүп чоруп турган ^c. Олар Дээрги-Чаяакчыны тооп дыңнаваан боорга, Ол: «Мээң силерниң ада-өгбеңерге бээр бооп даңгыраглааным чуртту – сүт биле ары чигири агып чыдар байлак черни ^d – кажан-даа көрбес силер» – деп оларга даңгыраглаан ^e. Ынчангаш Египеттен үнген соонда, дайылдажып шыдаар турган эр улус шупту ол үе дургузунда мөчээн. 7 Өлгеннерниң орнунга Дээрги-Чаяакчы оларның оолдарын өстүрүп каарга ^f, ам Иисус оларны кыртыжап демдектеп кааны ол-дур. Көжүп турган үезинде оларны кыртыжаваан болганда, олар шупту кыртыжап демдектеттинмээн болган-дыр.

8 Шупту эр улусту кыртыжап демдектээн соонда, олар турлаанга экириирин манап турда, 9 Дээрги-Чаяакчы Иисуска: «Бөгүн Мен силерден Египеттиң бужарын адырып кагдым!» – дээн ^g. Ынчангаш ол черни бөгүнге чедир Галгал ^{▼▼ Галгал деп ат «адырар» деп сөске дөмейлешкек.} деп адаар чүве-дир.

10 Израильчилер Галгалга турлагжып алгаш, айның он дөрт дугаар хүнүнде, кежээ, Иерихоннуң ховузунга Хосталыышкын байырлалын демдеглээннер ⁱ. 11 Олар байырлалдың дараазында хүнүнде ол черде өзүп үнүп турар чимис, ажыткы-биле хөөтпейн хаарган далган база хооруп каан тараа чип турганнар. 12 Ол черде өзүп турар чимистерни чип эгелээн хүнден бээр манна көзүлбестей берген ^j. Израильчилерге манна ооң соонда көзүлбестээн – ол чылын олар ханаан черниң дүжүдү-биле чемненип турганнар.

Иерихонну эжелеп алганы

13 Иисус бир катап Иерихоннуң чоогунга тургаш, холунда хылыш тудуп алган кижи көрүп кааш ^k: «Бистиң киживис сен бе азы дайзынывыс сен бе?» – деп айтырган.

14 «Чок, мен дээрге Дээрги-Чаяакчының аг-шерииниң баштыңчызы-дыр мен. Ынчангаш мен мында келдим» – деп, ол харыылаан.

Иисус черге чедир мөгейгеш: «Мээң дээргим чалчазы меңээ чүнү чугаалаар ирги?» – деп айтырган.

15 Дээрги-Чаяакчының шерииниң баштыңчызы: «Будуңда кеткен идиктериң уштуп ал. Сээң турар чериң ыдыктыг-дыр ^l» – деп аңаа чугаалаан. Иисус ынчалдыр кылган.

16 Иерихон хоорайның хаалгазы ол өйде хаашкынныг болгаш дүкчүглүг турган. Израильчилерден коргар болгаш, кым-даа хоорайдан үнмээн, хоорайже кирерин кымга-даа чөпшээревейн турган.