Jude | TyvTUV | STEP |

‏

Иуда – Иерусалимде христиан ниитилелдиң удуртукчузу Иаковтуң дуңмазы (олар ийилээн Иисус Христостуң дуңмалары турган).

Бодунуң чагаазында Иуда христиан ниитилелдерге Христостуң өөредиин хажыдып турар, чуртталгазы самыын аян-шинчилиг бир-ле меге башкылар дугайында сагындырыг кылган. Иуда христианнарны Дээрги-Чаяакчыга шынчы база бүдүштүг улус бооп артар кылдыр сургап турар.

Иуданың чагаазының сөзүглели Пётрнуң ийиги чагаазының сөзүглелинге чоок. Кым бодунуң чагаазын баштай бижээни эки билдинмес. Иуда биле Пётр боттарының чагааларын бижип тура, чаңгыс-ла ол биске билдинмес үшкү бижимел барымдаа ажыглаан бооп чадавас.

Иуда, чамдык чижектер киирип тура, «апокриф» деп бижилгелерже айтыг кылып турары солун. Апокрифтер дээрге иудей шажын-чүдүлге чаңчылын дамчыдып турар, ынчалза-даа Библияже киирбээн эрте-бурунгу еврей номнар-дыр.

‏ Jude

Киирилде сөстер

1 Иисус Христостуң чалчазы база Иаковтуң ^a дуңмазы Иудадан байыр ^b. Бурган Аданың кыйгырып алганы, ынак апарганы ^{▼▼ Өске бурунгу сөзүглелдерде «Ынак апарганы» эвес, а «Ыдыктааны» деп бижээн.}, Иисус Христоска кадагалаткан улузунга бижидим.

2 Бурганның авыралы, амыр-тайбыңы болгаш ынакшылы силерге өзүп-көвүдезин! ^d.

Меге башкылар

3 Ханы ынак эш-өөр, бистиң ниитизи-биле алганывыс камгалал дугайында бижиирин аажок күзеп турдум, ынчалза-даа Бурганның Бодунуң улузунга чаңгыс удаа болгаш кезээ мөңгеде хайырлааны бүзүрел дээш чүткүлдүг туржурун ^e силерден күштүү-биле дилеп, чагаа бижиири эргежок чугула деп көрдүм. 4 Чүге дээрге шаг шаанда-ла Бижилгеге оларның шииттирериниң дугайында баш удур чугаалаан улус силерниң араңарже бүдүү кире берген-дир. Олар дээрге Бурганны хүндүлевес, боттарының самыыраан оруктарын агартыр дээш Бурганывыстың авыралын самыыралга солаан база дың чаңгыс Чагырыкчы болгаш Дээргивис Иисус Христосту хүлээп көрбээн улус-тур ^f.

5 Ол бүгүнү ам билир-даа болзуңарза, Дээрги-Чаяакчы Бодунуң чонун Египеттен үндүрүп эккелгеш, камгалаанын, ынчалза-даа Аңаа бүзүревээн улусту сөөлүнде барып узуткап каанын силерге сагындырар бодадым ^g. 6 Боттарының бедик байдалынга артып калбайн барган, чурттаар ужурлуг черин каапкаш барган дээрниң төлээлерин база сактып келиңер. Бурган ам оларны өндүр улуг шииткел хүнүнде кезедир дээш, мөңге кинчи-биле демирлеп алгаш, алдыы оранның дүмбейинде тудуп турар ^h.

7 Содом биле Гоморраны болгаш оларны хүрээлээн хоорайларны база сактып келиңер ⁱ. Ук хоорайларның чурттакчылары, дээрниң ол төлээлери кара олчаан, самыыраашкынга алзып, бужар хевир-биле бирикшижип турганнар. Шупту улусту кичээндирер дээш, оларны мөңге оттуң кеземчези-биле шаажылаан ^j.

8 Араңарже кире берген улус база шак ынчаар мага-бодун бужартадып, дээди эрге-чагырганы хүлээп көрбестеп, өндүр улуг күштерни бак сөглеп турар ^k. 9 Дээрниң дээди төлээзи Михаил безин ^l, Моисейниң мага-бодунуң дугайында эрлик-биле маргыжып тура ^m, ону шиидип, бак сөглээрин дидинмээн, а чүгле: «Дээрги-Чаяакчы Боду сени чемелезин» – дээн ⁿ. 10 А ол улус боттарының билип-даа шыдавазы, чүгле адыгуузуннар ышкаш, согур меделиниң аайы-биле билири чүүлдерни бак сөглээш, алызы барып узуткаттырар ^o.

11 Ол улус ат болур! Олар Каинниң шилип алган оруун эдерип чорупканнар ^p. Валаам ышкаш, ажык-кончаа сүргеш, олар ооң частырыын катаптап турарлар ^q база, Корахтың тура халыышкынынга киришкен улус дег ^r, узуткаттырып каарлар. 12 Ындыг улус силерниң ынакшылыңар илерээр дой-чыыштарга хөө кара былчактар дег боор. Олар ыят чокка силер-биле кады дойлаарлар, ынчалза-даа чүгле боттарын бодаарлар. Ындыглар – хатка сывыртаткан чаъс чок булуттар-дыр ^s; күзүн безин дүжүт бербес, дазылы-биле тура соктуруп кааптар ^t, ынчангаш ийи дакпыр өлген ыяштар-дыр. 13 Олар чүдек-бужар херектери көвүктелген далайның калчаа чалгыглары ^u дег-дир; дүмбей караңгыга кезээ мөңгеде кара-бажыңнаткан азып чүгүрген сылдыстар дег-дир.

14 Өгбевис Адамның чедиги салгалының бирээзи боор Энох ^v база оларның дугайында өттүр билип чугаалаан болгай: «Дыңнаңар даан, Бодунуң түмен-түмен ыдыктыг төлээлерин эдерткен Дээрги-Чаяакчы чедип кээр ^w. 15 Ол чедип келгеш, Ону хүндүлевес бачыттыг улусту Аңаа удур сөглээн сөстери дээш база Аңаа таарымча чок ажыл-херээ дээш сойгалап, оларның шуптузунга шииткел онаар». 16 Ол улус үргүлчү химиренип, өскелерни буруудаткан чоруур. Олар дээрге бачыттыг күзээшкиннериниң аайындан эртпес ^x, ал-бодун мактап, адыыргаар улус-тур. Олар амы-хууда ажык-кончаа алыксааш, өске улуска чашпаалап чоруурлар.

Иисус Христостуң чедип кээриниң манаашкыны

17 А силер, ханы ынак эш-өөр, Дээргивис Иисус Христостуң элчиннериниң ооң мурнунда-ла чугаалап турган чүүлүн сактып чоруңар ^y. 18 Олар силерге: «Сөөлгү үе кээрге, Бурганны хүндүлевес күзээшкиннериниң аайындан эртпес кочуургактар тыптып кээр» – деп чугаалааннар. 19 Ындыг улус аңгылажыг эккээр, олар бо делегейге хамааржыр, оларда Ыдыктыг Сүлде чок ^z.

20 А силер, ханы ынак эш-өөр, эң-не ыдыктыг бүзүрелиңерге амыдыралыңарны быжыглап тургузуңар-ла, мөргүлдеп туруңарда, силерни Ыдыктыг Сүлдениң күжү башкарзынам ^aa. 21 Бурганның ынакшылының ачызында бодуңарны шынчы кадагалап, Дээргивис Иисус Христос Бодунуң мөңге амыдыралга чедирер өршээлин силерге хайырлаарын манаңар ^ab. 22 Чигзинип чоруур чамдык улуска өршээлден көргүзүңер ^{▼▼ Өске бурунгу сөзүглелдерде «Чамдык улуска, ылгай көрүп тура, өршээлдиг болуңар» деп бижээн.}. 23 Өске улусту оттан ушта соп ^ad, камгалаңар, а бир чамдыктарга өршээл көргүзүп тура, кичээниңер ^{▼▼ Өске бурунгу сөзүглелдерде «Өске улусту оттан ушта соп, коргуп-иргип, камгалаңар, оларны, коргуп-иргип, сойгалаңар» деп бижээн.}, оларның бачыттыг бүдүжү бужартадып каан хевинге безин ^af дээр хөңнүңер чок болзун.

Түңнел байыр чедириишкиннери

24 – 25 Дың чаңгыс Бурганга ^{▼▼ Өске бурунгу сөзүглелдерде «Бурганга» деп сөске «мерген угаанныг» деп сөстерни немээн.} – силерни илдигип кээп дүжеринден кадагалап шыдаар база өндүр бедик Бодунуң мурнунче кем-буруу чок, өөрүшкүлүг улус кылдыр ^ah чедире берип шыдаар Камгалакчывыска – Дээргивис Иисус Христосту дамчыштыр алдар, өндүр-чаагай чорук, күчү-күш база эрге-чагырга эрткен бүгү үелерден бээр, ам болгаш кезээ мөңгеде доктаазын! Аминь ^ai.