Judg 17 | TyvTUV | STEP | Эфрем дагларынга Миха деп аттыг бир кижи чурттап чораан.

‏ Judges 17

Миханың дүрзү-бурганы биле Бурганга бараалгакчызы

1 Эфрем дагларынга Миха деп аттыг бир кижи чурттап чораан. 2 Ол бодунуң авазынга: «Сен 1100 шекел мөңгүнүң оорлаткаш, каргыш сөс эдериңге, мен дыңнап турдум ^a. А ол мөңгүн менде, ону мен ап алдым» – дээн.

Авазы ынчан: «Дээрги-Чаяакчы мээң оглумга ачы-буян хайырлазын!» – дээн. 3 Миха авазынга ооң мөңгүнүн эгидип берген. Авазы: «Бо мөңгүннү мен Дээрги-Чаяакчыга өргүп бараалгаткаш, оглумнуң холунга берип тур мен! Бо мөңгүнден шуткаан дүрзү-бурган кылдырып алзын дээш ^b, ону сеңээ эгидип турарым ол» – дээн.

4 Миха авазынга мөңгүннү дедир бээрге, авазы оон 200 шекел мөңгүннү алгаш, эзилдирикчи шевер кижиге аппарып бээрге, ол оон дүрзү-бурган шуткуп берген ^c. Оон эгелээш, ол дүрзү-бурган Миханың бажыңынга турган. 5 Миха Бурганга чүдүүр тускай бажыңныг турган. Ол эфод ^{▼▼ Эфод – чамдыкта бо сөс-биле Бурганның бараалгакчыларының Ооң күзел-соруун билип алырын дузалаар херекселди илередип турган (Хост. 28:6-30; Башт. 8:27 көр).} болгаш дүрзү-бурганнар кылгаш, бодунуң оолдарының бирээзин Бурганның бараалгакчызы кылдыр томуйлап каан ^e. 6 Ол үеде Израильге хаан чок турган, кижи бүрүзү бүгү чүвени бодунуң шынныг деп санаар аайы-биле кылып чораан ^f.

7 Ынчан иуда аймактыг бир аныяк левит оол Иудеяның Вифлеем хоорайга ^g чурттап турган. 8 Ол оол Иудеяның Вифлеемден чорупкаш, турумчуп чурттаар чер дилеп чорааш, Эфрем дагларында Миханың бажыңынга чедип келген.

9 Миха оон: «Кайыын келдиң?» – деп айтырарга, ол: «Мен Иудеяның Вифлеемден келген кижи мен, ам турумчуп чурттаар чер дилеп чоруурум бо» – деп харыылаан.

10 Миха аңаа: «Маңаа, мээң бажыңымга артып кал, ачам ышкаш хүндүлүг база мээң Бурганга бараалгакчым боор сен, а мен сеңээ чылда он шекел мөңгүн төлээр мен, аңаа немей идик-хеп болгаш аъш-чем-биле хандырар мен» – дээн. 11 Левит Миха-биле чурттаар бооп чөпшээрешкеш, ооң оолдарының бирээзи ышкаш апарган. 12 Миха ону Бурганның бараалгакчызы кылдыр томуйлап каарга, ол левит Миханың бажыңынга чурттай берген. 13 Миха ынчан: «Дээрги-Чаяакчы ам менче ээ көрнүр деп билир мен, чүге дээрге мээң Бурганга бараалгакчым – левит-ле болгай» – деп турган.