Judg 20 | TyvTUV | STEP | Оон ам шупту израильчилер, Дан хоорайдан тура, Беэр-Шевага чедир база галаад черден бүгү ниитилел, чаңгыс кижи дег демниг Мицпага Дээрги-Чаяакчының мурнунга чыглып келген .

‏ Judges 20

Вениаминниң аймаанга удур дайын

1 Оон ам шупту израильчилер, Дан хоорайдан тура, Беэр-Шевага чедир ^a база галаад черден бүгү ниитилел, чаңгыс кижи дег демниг Мицпага Дээрги-Чаяакчының мурнунга чыглып келген ^b. 2 Бурганның бүгү чонунуң шупту баштыңнары, Израильдиң шупту аймактары – 400 000 чепсегленген чадаг шериг чыглып келген. 3 А Вениаминниң аймаа Израильдиң шупту өске аймактары Мицпада чедип келген дээрзин дыңнап каан.

Оон израильчилер: «Бо кем-херек канчаар болганын чугаалаңар!» – дээн.

4 Өлүрткен херээженниң ашаа мынча деп харыылаан: «Мен кул-кадайым-биле Вениаминниң черинде Гиваже аңаа хонуп аар дээш чеде бердим. 5 Дүне Гиваның чурттакчылары мээң хонуп чытканым бажыңны бүзээлеп алгаш, мени өлүрүп каар деп турдулар. Олар мээң кул-кадайымны өлүрүнге чедир күштеп-күчүлеп кааптылар. 6 Мен бодумнуң кул-кадайымны ап алгаш, ооң мага-бодун үзе кескилээш, Израильдиң булуң бүрүзүнче чорудуптум. Чүге дээрге олар израиль чонга удур чүдек-бужар кем-херек үүлгедип кагдылар ^c. 7 Бүгү израильчилер, ам бо херекти сайгарып көргеш, маңаа дораан шиитпирлеңер!»

8 Бүгү чон чаңгыс кижи дег бир демниг мындыг түңнел шиитпир үндүрген: «Бистиң кайывыс-даа ам аалдарже тарап чанмас. 9 Төлге даштарын октааш, ооң аайы-биле Гиваже халдаар бис. 10 Израильдиң бүгү аймактарындан улус шилиир бис – чүстен он кижини, муңдан чүс кижини, түменден муң кижини – олар бүгү шеригге аъш-чем курлавыры чыып эккелзин. Бүгү шериг Вениаминниң черинде Гиваже халдааш, ооң чурттакчыларын Израильдиң адын баксыраткан бужар кем-херээ дээш ялалап кезедир ужурлуг!»

11 Шупту израильчилер ол хоорайга удур чаңгыс кижи дег бир демниг чыглып келген. 12 Оон Израильдиң аймактары Вениаминниң бүгү төрел бөлүктеринче медээчилер чоруткаш, мындыг сөстер дамчыткан: «Канчап силерниң араңарга ындыг бужар үүлгедиг болганы ол? 13 Гиваның ол дүржок улузун ^d биске хүлээдип бериңер, бис оларны өлүргеш, израиль чон аразында ындыг бужар-бакты узуткап каалы».

Ынчалза-даа вениаминчилер боттарының-на ха-дуңмазы израильчилерни дыңнаар-даа хире эвес болган. 14 Вениаминниң аймаа израильчилер-биле дайылдажыр дээш, янзы-бүрү хоорай-суурлардан кээп, Гивага чыглып алган. 15 Ынчан оон-моон чыылган вениаминчилерниң саны 26 000 чепсегленген кижи болган ^e, аңаа Гиваның чурттакчыларындан 700 шилиндек дайынчы немешкен. 16 Ол бүгү шеригниң аразынга 700 тускай шилиндек дайынчы турган, олар шупту солагай боорда-боорда ^f, даш шывадаар херекселди ажыглааш, хыл безин часпас улус турган. 17 А израильчилерден Вениаминниң аймаан санаваска, 400 000 чепсегленген кижи чыылган ^g. Олар шупту тулчуушкунга белен дайынчылар турган.

18 Израильчилер Вефилге ^{▼▼ Азы: «Бурганның өргээзинге».} келгеш, Бургандан: «Вениаминниң аймаанга удур дайынче кым бисти баштап киирерил?» – деп айтырган.

Дээрги-Чаяакчы: «Силерни Иуданың аймаа баштаар» – деп харыылаан ⁱ. 19 Эртенинде израильчилер Гиваның чанынга турлагланып туруп алган. 20 Оон олар вениаминчилер-биле тулчуушкунга белеткенип, Гиваның мурнунга чыскаалып туруп алган. 21 Вениаминчилер Гивадан үнгеш, израильчилерже халдааш, ол хүн 22 000 кижини кыра шаап каапкан ^j.

22 Израильчилер күжүн чыггаш, баштайгы хүнде турган черинге катап база чыскаалып туруп алган. 23 А ооң мурнунда олар Дээрги-Чаяакчының мурнунга кежээге чедир ыглап-сыктап: «Боттарывыстың ха-дуңмаларывыс вениаминчилер-биле ам база тулчур бис бе?» – деп Оон айтырып турган.

Дээрги-Чаяакчы оларга: «Тулчуңар!» – деп харыылаан. 24 Ынчалдыр ийиги хүнде израильчилер катап база Вениаминниң дайынчыларынче шимчеп үнүпкен. 25 Вениаминчилер ийи дугаар хүнүнде база Гивадан үнүп келгеш, тулушкаш, Израильдиң 18 000 дайынчызын кыра шаап каапкан.

26 Оон шупту израиль чон Вефилге ^{▼▼ 20:18-те немелде тайылбырны көр.} баргаш, Дээрги-Чаяакчының мурнунга ыглап-сыктап олуруп, ол хүннү бадыр шээрленип, бүрүн өрттедир өргүлдер болгаш эп-найырал өргүлдери кылып турган. 27 – 28 (Ол үеде Бурганның ыдыктыг аптаразы аңаа турган. А Аароннуң оглунуң оглу, Элеазарның оглу Финеес ыдыктыг аптараның бараан болукчузу турган.) ^l Израильчилер Дээрги-Чаяакчыдан: «Боттарывыстың ха-дуңмаларывыс вениаминчилер-биле ам база тулчур бис бе азы соксадыр бис бе?» – деп айтырган.

Дээрги-Чаяакчы оларга: «Тулчуңар! Даарта Мен оларны силерниң холуңарже киирип бээр мен» – деп харыылаан. 29 Ынчан израильчилер Гиваны долгандыр дозуг кедег тургузуп кааннар ^m.

30 Үш дугаар хүнүнде израильчилер катап база Вениаминниң аймаа-биле тулчур дээш, Гиваның мурнунга биеэги хевээр чыскаалып туруп алган. 31 Вениаминчилер израильчилерже уткуй үнгеш, хоорайындан ырай бергеннер. Олар израильчилерни ооң мурнунда дег өлүрбүшаан, бирээзи Вефилче баар, өскези Гиваже баар ийи орук дургаар сүрүп эгелээн. Олар ынчан үжен хире израильчини өлүрүп каан. 32 Вениаминниң шериглери «Бис оларны биеэги хевээр кыра шаап тур бис» деп бодааннар. А израильчилер «Олардан дескен бооп, хоорайындан ырадып алгаш, оруктарже үндүрүп аар-дыр» деп бодап алганнар ⁿ. 33 Бүгү израильчилер турган черлеринден чорупкаш, Ваал-Фамарга чыскаалып алган, а Гиваның барыын талазынга дозуг кедегге турганнары Гиваже халдап кирипкен. 34 Бүгү Израильден чыып каан 10 000 шилиндек дайынчы Гиваже халдай бээрге, каржы-дошкун тулчуушкун эгелээн. Оларны хай-халап манап турар дээрзи Вениаминниң дайынчыларының сагыжынга безин кирбээн.

35 Дээрги-Чаяакчы Вениаминниң аймаан израильчилерниң мурнунга аштырыышкынга таварыштырган. Израильчилер ол хүн 25 100 чепсегленген вениаминчини кырып каапкан. 36 Вениаминниң дайынчылары аштырганын көрүп кааннар.

А израильчилер Вениаминниң шерииниң мурнунга баштай аткаарлап эгелээннер, чүге дээрге олар Гиваның чанында дозуг кедегге тургузуп кааны дайынчыларынга идегеп турган. 37 Дозуг кедегге турган улус хоорайже халдап киргеш, хоорайжыларны дөгерезин кыра шаап каапкан ^o. 38 Израильчилер кедегде шериглери-биле хоорайдан үнген ыш халдаашкынның демдээ боор кылдыр дугуржуп алган турган. 39 Шак ынчаар, кажан израильчилер тулчуушкун шөлүнден аткаарлап эгелээрге, Вениаминниң шериглери оларны сүрүп, үжен хире кижини өлүрүп тура, «Бис оларны биеэги хевээр кыра шаап тур бис» деп бодап турган. 40 Ол үеде хоорайдан улуг ыш үнүп эгелээн. Вениаминчилер хая көрнүп кээрге, оларның хоорайы өрттенип, ыжы дээрге чедип турар болган. 41 Аткаарлап турган израильчилер дедир көрнүп келген, а Вениаминниң шериглери хай-халап келгенин билип кааш, девидей бергеннер.

42 Олар ээн хову баар оруктап, израильчилерден дезипкеннер, ынчалза-даа израильчилерниң хылыжы оларны сүрүп тургаш, кырып эгелээн, а хоорайлардан уткуй үнген израильчилер оларның бажын дозуп, узуткап турган. 43 Вениаминчилерни бүзээлеп алгаш, амыр-дыш бербейн сүрүп ^{▼▼ Азы: «Менухага чедир сүрүп».}, Гиваның чөөн талазынга чедир чылча шаап келгеннер. 44 Вениаминниң аймаандан 18 000 күштүг-шыырак кижи ынчаар өлүрткен. 45 Арткан вениаминчилер ээн ховуже, Риммон деп туруг-хаяже дезипкен ^q, а израильчилер оруктар дургаар оларның беш муңун кырып каапкан; оон оларны Гидомга чедир сүрүп тура, база ийи муңну чок кылып каапкан. 46 Шупту каттышкаш, ол хүн Вениаминниң шериинден 25 000 кижи өлүрткен, олар дөгерези күштүг-шыырак дайынчылар турган.

47 Вениаминниң дириг арткан дайынчылары 600 кижи ээн ховуда Риммон дээр туруг-хаяже дезе бергеш, аңаа дөрт ай турганнар. 48 А израильчилер Вениаминниң чер-девискээринче ээп келгеш, бүгү хоорай-суурларын өрттедип-хуюктап, кижилерни-даа, мал-маганны-даа – шупту чүвени узуткап каапкан.