Judges 4
Девора биле Варак
1Аод чок апарган соонда, израильчилер катап база-ла Дээрги-Чаяакчының мурнунга бужар-бак херектер үүлгедип эгелээн a. 2Ынчан Дээрги-Чаяакчы оларны Асорнуң хананей хааны Иавинниң холунче киирип берипкен b, а Иавинниң шериг баштыңы Харошет-Гоимге чурттап турган Сисара дээрзи турган c. 3Израильчилер ынчан Дээрги-Чаяакчыны кыйгырып, дуза дилеп эгелээн. Чүге дээрге Иавин 900 дайынчы демир тергелиг турган, израильчилерни ол чээрби чыл иштинде каржызы-биле дарлап келген. 4Ол үеде израиль чонну Лапидоттуң кадайы, өттүр билип медеглээр Девора дээр херээжен баштап турган. 5Ол Эфрем дагларында Рама биле Вефил аразында Девораның Пальмазының адаанга улус хүлээп саадап орган, а израильчилер аңаа шын шииткел дилеп кээп турганнар. 6Девора Авиноамның оглу, Неффалимниң Кедесте d чурттап турар Варакты e кый деп, келдиртип алгаш, аңаа: «Дээрги-Чаяакчы, Израильдиң Бурганы сеңээ: „Неффалим болгаш Завулон аймактарындан 10 000 кижини алгаш, Фавор дагже f чеде бер. 7Мен сеңээ ол черде Киссон хемге g Иавинниң шериг баштыңы Сисараны, ооң дайынчы тергелерин болгаш аг-шериин эккеп бергеш, сээң холуңче киирип бээр мен“деп айыткап тур» – деп чугаалаан. 8Варак аңаа: «Бир эвес силер мээң-биле кады баар болзуңарза, баар мен, барбас болзуңарза, барбас мен» – деп харыылаан. 9Девора аңаа: «Сээң-биле баарын баар мен, чүгле харын сээң ам чоруур орууңга алдар сээңии эвес апаар – Дээрги-Чаяакчы Сисараны херээжен кижиниң холунче киирип бериптер» – дээн. Ынчангаш Девора Варак-биле кады Кедесче чорупкан. 10Варак Завулон болгаш Неффалимниң аймактарын Кедесче кый деп, чыып алган, 10 000 кижи ону эдерип чорупкан, а Девора база ооң-биле кады чорупкан. 11Ол үеде кен аймак-сөөктүг Хевер деп кижи Моисейниң катының оглу Ховавтың адыры кеннерден хоорлуп чорупкаш h, Кедестиң чанында Цааннимде арга кыдыынга i бодунуң майгынын тип алган турган. 12Ынчан Сисарага Авиноамның оглу Варак Фавор даг кырынче үне берген деп дыңнадыг келген. 13Сисара 900 дайынчы демир тергелерин дөгерезин болгаш ооң-биле кады турган шериин кый деп, чыып алгаш, Харошет-Гоимден Киссон хемге чедип келген. 14Ынчан Девора Варакка: «Че, Дээрги-Чаяакчы Сисараны сээң холуңче бөгүн киирип бээр, Ол Боду сени баштап чоруур» – дээн. Варак 10 000 кижизин баштап алгаш, Фавор дагдан бадып келген. 15Ынчан Дээрги-Чаяакчы Сисараны, ооң дайынчы тергелерин болгаш шериглерин Варактың хылыжындан аймап девидей бээр кылдыр кылыпкан j, а Сисара дайынчы тергезинден дүже халааш, чадаг дезипкен. 16Варак ооң дайынчы тергелерин болгаш бүгү-ле шериин Харошет-Гоимге чедир сүрген. Сисараның бүгү-ле шерии хылыштан кырлып калган, кым-даа дириг артпаан. 17А Сисара кен Хеверниң кадайы Иаилдиң майгынынче чадаг дезип чедип келген, чүге дээрге Асорнуң хааны Иавин биле кен Хеверниң өг-бүлезиниң аразында тайбың турган. 18Иаил Сисарага уткуй үнүп келгеш: «Кириңер, дээргим, бээр, мээң майгынымче кирип келиңер, кортпаңар» – дээн. Сисара ооң майгынынче кире бээрге, Иаил ону хевис-биле чажыра шуглап каан. 19Сисара аңаа: «Меңээ бичии сугдан берем, суксап тур мен» – дээн. Иаил сүттүг көгээржиин ажыткаш, Сисарага ижиртип кааш, катап база хевис-биле шуглап каан. 20Сисара аңаа: «Майгыныңның эжииниң чанынга туруп ал, ынчангаш кандыг-бир кижи келгеш, „Мында улус бар бе?“деп айтырар болза, „Чок“дээр сен» – дээн. 21Ынчан Хеверниң кадайы Иаил майгынның өргени биле маска ап алгаш, Сисараның чанынга оожум чедип келгеш, өргенни ооң чулчургайынче киир шаапкаш, бажын черге чыпшыр кадап каан. А ол шылаанындан удуп чыткан болгаш, ол-ла хевээр өлүп калган. 22Ол үеде Варак Сисараны истеп-сүрүп чедип келген. Иаил аңаа уткуй үнүп келгеш: «Бээр кириңер, мен силерге дилеп турар кижиңерни көргүзейн» – дээн. Ол кире бергеш көөрге, Сисара чулчургайынче өрген киир кадап каан, өлүг чыткан. 23Шак ынчаар Бурган ол хүн хананей хаан Иавинни израильчилерниң мурнунга томаартып сөгүрткен. 24Израильчилерниң холу, хананей хаан Иавинни когун үзе узуткаваан шаанга чедир, хүнден хүнче улам күштелип турган.
Copyright information for
TyvTUV