Lam 3 | TyvTUV | STEP | א (алеф) Бурганның каржы килеңинден качыгдаан эр

‏ Lamentations 3

Үшкү ыы-сыы

(алеф)

1 Бурганның каржы килеңинден качыгдаан эр – мен-не-дир мен ^a. 2 Ол мени сүрүп алгаш, чырык эвес, дүмбейдиве эккеп кагды ^b.
3 Ындыг кончуг Ол меңээ удур болуп, холун менче соксаал чокка көдүрүп тур –

(бет) 4 эът-бодум чуурулдур соп, сөөк-даяам сый шапты ^c;
5 бүзээлелге мени тудуп ^d, ажыг-шүжүг, хинчек-биле хүрээледи;
6 үе-дүпте өлген улусту дег, караңгы оранга тургузупту ^e.

(гимел) 7 Үндүрбес дээш, Бурган мени хана-биле бүзээлепти,
кинчи-бегим аартадыпты;
8 дуза дилеп, кыйгы салдым – мөргүлүмнүң оруун досту ^f;
9 даштар-биле оруум боогдап ^g, кокпа-оруум ээй тыртты.

(далет) 10 Ол – мени кедээн мажаалай-ла, чаштып чыдар арзылаң-на ^h;
11 оруумдан астырып, үзерлеп кемдеткеш, буурап дүшкен кижи кылды.
12 Кадыг чазын хере тырткаш ⁱ, согунунга кара кылдыр тургузупту ^j.

(хе) 13 Саадаанда согуннарын ужулгаштың, өкпе-баарым өттүр атты ^k.
14 Чонга кочу-шоот болдум: соксаал чокка одап-сөглеп, ырлап турлар ^l.
15 Ол меңээ оо-хоран пөктүр сыгап, ажыг суксун аксымдыва кудуп берди ^m.

(вав) 16 Диштеримче сай-даш дыгып, хүлдү меңээ чиртип турду ^{▼▼ Азы: «Хүлге мени хөөп кагды».}.
17 Сеткилимден амыр-тайбың арлы берген, амыр-чыргал уттундурган.
18 «Алдар-адым өлүп-чидип, Дээрги-Чаяакчыга идегелим бүтпээн-дир» – деп чугааладым.

(зайин) 19 Улчуп-түрээн чуртталгамны бодап тур мен: оо-хоран, ажыг суксун!
20 Сактып чоруур сеткилим-даа ундаралче дүлдүнер-дир.
21 Ынчалза-даа бодап кээрим, ынанырым чүүл бо-дур:

(хет) 22 Дээрги-Чаяакчы, энерелиң кызыгаар чок, өршээлиң-даа үстүп төнмес ^{▼▼ Өске бурунгу сөзүглелдерде «Дээрги-Чаяакчының энерелиниң ачызында кырлып-читпээн бис, чүге дээрге Ооң өршээли үстүп-төнмес» деп бижээн.} –
23 эртенниң-не чаартынып, илереп кээр, а шынчы чорууң өндүр улуг! ^p
24 «Дээрги-Чаяакчы – салым-хуум ^q – деп чугааладым. – Ынчангаш Аңаа ынаныр мен».

(тет) 25 Аңаа ынанып, Ону дилээн улуска – Дээрги-Чаяакчыдан буян доктаар;
26 Ооң камгалалын шыдамык манап турар кижиге – буян доктаар;
27 Аар-бергелерни аныяандан ажып эртип турар кижиге – буян доктаар.

(йод) 28 Ындыг улуг аар-бергелерни чүктээн кижи ыыт чок орзун, чааскаан орзун! ^r
29 Довуракты пактап орзун, ынчалзажок идегел-даа бар бооп магат.
30 Дажыпканга чаагын дөгеп, базымчазын пөктүр көрзүн ^s.

(каф) 31 Дээрги бисти кезээде эвес, хензиг када каапкаш баар ^t;
32 хинчек-биле кезетсе-даа, энерели улуг болгаш, өршээй кааптар ^u,
33 кижилерни хилинчектээр сеткили чок.

(ламед) 34 Черде хамык туттурган чонну таптай базып туруп бээрге,
35 Дээди Өрүкү Бурган мурнун орта чөптүг шииткел үндүрбеске,
36 чаргы кылгаш, мегелээрге, Дээрги ону көрбес бе кай?!

(мем) 37 Дээрги аңаа дужааваанда, сорулгазын чедип алыр кижи турбас ^v.
38 Эки-даа чүүл, бак-даа чүүл Дээди Өрүкүнүң аксы-сөзүн ёзугаар болбас бе? ^w
39 Дириг чурттап арткан кижи бачыды дээш кеземчезинге хомудаан херээ чүл?

(нун) 40 Оруувусту шинчий көрүп, истеп-хынааш, Дээргиже дедир ээр бис.
41 Дээрде саадаан Бургандыва чүрээвисти угландырып, холувусту өрү сунаал ^x:
42 «Бачыттыг бис, удур-дур бис, Сен-даа бисти өршээведиң ^y.

(самех) 43 Килеңнээштиң, истеп-сүрдүң, хайыра чок кырып келдиң,
44 мөргүлүвүс четпезин дээш, булут-биле шугланыптың.
45 Өске чоннар аразынга бисти бок-чам кылып кагдың.

(пе) 46 Дайзыннарывыс бисче шупту өгү-дылын караңнатты ^z.
47 Какпага кирер, коргуп-сүртээр, хоозураар, өлүп-чидер – үүлевис ол ^aa».
48 Чонум өлүп-калганы дээш, караам чажы суг дег акты ^ab.

(айин) 49 – 50 Дээрги-Чаяакчы черже кайгап, дээрден бисче көрбээн шаанда ^ac,
оожургал чок, амыр-дыш чок, караамның суу боглур уг чок.
51 Хоорайым кыстарының салым-чолун көрүп келгеш, сеткил-хөңнүм качыгдап тур.

(цаде) 52 Дайзыннарым, кушту-даа дег ^ad, хей-ле черге мени аңнап турарлар-дыр.
53 Олар мени оңгардыва киир октап ^ae, даш-биле базырдылар.
54 Бажым ашкан сугже дүлнүп ^af, «Өлдүм-не!» деп чугаалаан мен.

(коф) 55 Тамы дүүнден, Дээрги-Чаяакчы, Сээң адың кый деп турдум ^ag.
56 Мээң үнүм дыңнап кагдың: дуза дилээн човуурумдан кулааң дестирбе!
57 Кый дээримге, чедип келдиң. «Кортпайн көр» деп чугааладың.

(реш) 58 Чаргымга Сен болчуп келдиң ^ah, амы-тыным камгаладың;
59 хомудалым көрүп кагдың, Дээрги-Чаяакчы, херээм үзе шиидип бердиң,
60 дайзыннарым өштүг багын, өзү кара бодалдарын көрүп кагдың ^ai.

(шин) 61 Дыңнап кагдың, Дээрги-Чаяакчы: мени дора көргенин, өзү кара бодалдарның дөгерезин,
62 меңээ удур улустуң чугаа-соодун, үргүлчү-ле кара сагыш бодап кээрин;
63 ам кээп көр даан: органда-даа, турганда-даа одап ырлаар кижизи – мен!

(тав) 64 Дээрги-Чаяакчы, оларны Сен, үүлгеткен херээн ёзугаар кезедип көр:
65 чүректерин чөрүү кылып, каргыжыңны оларже сал;
66 килең чажып, истеп-сүрүп, дээрлериң адаан орта узуткап каг!