‏ Lamentations 5

Бешки ыы-сыы

1Дээрги-Чаяакчы, бода – бистиң-биле чүү болчук, бак атка киргенивис көр-ле, көр!
2Черивисти хары улус ээлеп алган,
бажыңнарны өске улус чаза баскан ^a.
3Ачазы чок өскүстерге дөмей-дир бис,
авалар-даа дулгуяк дег болу берген.
4Суувусту-даа садып ижер,
ыяжывыс дээш акша төлээр апардывыс.
5Мойнувуста кадыг дөңгү кедирип каан,
могап-түреп, амыр-дыш-даа көрбестээн бис.
6Аъш-чем-не чедишсин дээш,
Ассирия, Египеттен ачы-дуза дилээр-дир бис ^b.
7Ада-өгбе бачыт кылган – олар ам чок,
а кем-буруузу дээш кеземче – бисте дүшкен ^c.
8Кулдар бисти чагырып тур;
кадыг холдан бисти хостаар кижи чок-тур.
9Ээн ховуга дээрбечиден айыылзынып, чем тып чиирде,
амы-тынны артывыска каап чор бис.
10Оя чип кээр от дег аштан кеживис-даа
суугу ышкаш кыза берген.
11Дайзыннар Сионда, Иудея хоорайларында
кыстарны, херээженнерни чазарлап тур ^d.
12Дайзынның холу нояннарны азып каапкан,
баштыңчыларны хүндүлевээн ^e.
13Чалыы эрлер дээрбе дажы долгап турар ^f,
элээдилер ыяш чүктеп, ууп чадаан.
14Хоорайның улус чыглыр черлеринде
ирейлер ам олурбастаан, чалыы эрлер ырлашпастаан.
15Хөрек-чүрек өөрүшкүзү өжүп калган,
хөглүг самнар ажыг-шүжүг ыызы болган ^g.
16Бажывыстан оваадай чайлып дүшкен ^h,
бачыттыг бис – бодувустуң шорувус-тур!
17Ынчангаштың чүрээвис ам ыстап аараан,
ынчангаштың караавыстың оду өшкен.
18Ээнзирээн Сион даанда
дилгилер ам димзенип тур.
19А Сен, Дээрги-Чаяакчы, мөңгеде хааннаар сен,
Сээң дүжүлгең салгал дамчып тендиш дивес ⁱ.
20Таанда бисти шуут уттур сен бе ^j,
таанда бисти төнмес өйде каар сен бе?
21Дээрги-Чаяакчы, Бодуңдува бисти ээлдир – эглип кээр бис ^k,
биеэде дег, чуртталгавыс чаартып көр ^l.
22Бистен шуут-ла ойталадың бе ^m,
биске удур килең-кылыың хемчээл чок бе?!