Leviticus 17
Ханга хамаарышкан дүрүм-хоойлу
1Дээрги-Чаяакчы Моисейге мынча деп чугаалаан: 2«Ааронга болгаш ооң оолдарынга база бүгү израиль чонга мону чугаалап көр, Дээрги-Чаяакчының оларга чугаалазын дээн айтыышкынын дамчыт. 3Израильчилер аразындан инек, хой, өшкү малын чоннуң турлаанга азы чоннуң турлааның даштынга дөгерген кижи бүрүзү 4малын Ужуражылга майгынынче кирер черге Дээрги-Чаяакчыга өргүлге эккеп салбас болза, хан төпкени дээш буруудаар: а хан төпкен болганда, ону бодунуң чонунуң аразынга амылыг арттырбас. 5Израиль чон шөлге дөгерип турары өргүл малын Дээрги-Чаяакчыга – Ужуражылга майгынынче кирер черге, Бурганның бараалгакчызынга эккелзин база оларны Дээрги-Чаяакчыга салган эп-найырал өргүлү кылдыр дөгерип салзын дээш, бо дүрүмнү берген a. 6Бурганның бараалгакчызы Ужуражылга майгынынче кирер чер чанында Дээрги-Чаяакчыга өргүл салыр бедигээшче малдың ханын төпсүн база чагны Дээрги-Чаяакчыга таарымчалыг чаагай чыт кылдыр өрттетсин b. 7Израиль чон самыыралга алзып, сүрүп халып турары хуназыг дүрзү-бурганнарынга c моон соңгаар өргүлдер эккеп салбазын дээш, ындыг болзун. Бо дүрүм-хоойлуну оларның бүгү салгалдарынга кезээ мөңгеде доктаадып каан болзун! 8Чонга оон ыңай мону чугаала. Израильчи ийикпе, азы израиль чоннуң аразында чурттап турар даштыкы кижи бүрүн өрттедир өргүлдү азы черле кандыг-бир өргүлдү кылгаш, 9Дээрги-Чаяакчыга өргүлге салыры-биле Ужуражылга майгынынче кирер черге эккелбес болза, ону чонунуң аразынга амылыг арттырбас d. 10Израильчи ийикпе, азы израиль чоннуң аразында чурттап турар даштыкы кижи кандыг-бир хан чиир болза, Мен ол кижиге удур боор мен база ону чонунуң аразынга амылыг арттырбас мен e. 11Мага-боттуң амы-тыны – ханында болгай, ынчангаш Мен силерни арыглаар дээш, өргүл салыр бедигээшке ханны ажыглаарын доктааткан мен, чүге дээрге шак ол хан кижини арыглап турар f. 12Ынчангаш израиль чонга: „Силерниң кайыңар-даа хан чивезин, ол ышкаш араңарда чурттап турар даштыкы кижи база хан чивезин“– деп чугаалаан ужурум ол. 13Израильчи ийикпе, азы израиль чоннуң аразында чурттап турар даштыкы кижи чиирин хоруваан черлик аң азы куш тудуп алза, ханын черже аксып каапкаш, довурак-биле хөөп каар ужурлуг g. 14Чүге дээрге кандыг-даа дириг амытанның амы-тыны ханында болур. Ынчангаш израиль чонга: „Кандыг-даа эъттиң ханын чивеңер, чүге дээрге кандыг-даа эът-ботту хан амы-тынныг кылыр болгай. Хан чиир кижи бүрүзү амылыг артпас ужурлуг“– деп чугаалаан мен. 15Бодунуң өлүмү-биле өлген азы араатан аңга өлүрткен дириг амытанның эъдин чиир кижи бүрүзү: үндезин чурттакчы-даа, араңарга чурттай берген даштыкы кижи-даа хевин чуп алыр база сугга чунуп алыр ужурлуг, ол кижи кежээге чедир арыг эвес болур h, а оон арыг болу бээр. 16А бир эвес хевин чуп албас база мага-бодун чуп албас болза, буруузун боду чүктээр».
Copyright information for
TyvTUV