‏ Leviticus 20

Бачыт үүлгедиишкиннери дээш кеземче

1Дээрги-Чаяакчы Моисейге мынча деп чугаалаан: 2«Израиль чонга мону чугаала. Израильдиң чонундан ийикпе азы израильчилер аразында чурттап чоруур даштыкы улустан бодунуң ажы-төлүнүң кайы-бирээзин Молох бурганга бээр кижини өлүрүп каар херек ^a: чурттуң чону ону даштар-биле соп каапсын. 3Мен Бодум ол кижиге удур боор мен ^b. Мээң ыдыктыг черимни бужартадыры-биле ^c база Мээң адымны дора көөрү-биле ажы-төлүнүң кайы-бирээзин Молохка бергени дээш, Мен ону чонунуң аразынга амылыг арттырбас мен. 4Бир эвес чурттуң чону ажы-төлүнүң кайы-бирээзин Молохка берген кижини өлүрбес дээш, ооң үүлгедиин тоомча чок арттырар болза ^d, 5Мен Бодум ол кижиге база ооң өг-бүлезинге удур боор мен! Ооң бодун база Молохту эдерип, самыыраар кылдыр чонунуң аразындан дуурайлап алганы бүгү улузун амылыг арттырбас мен.

6Өлүг улустуң сүнезиннерин кый дээр база караң көрнүр улуска барып, арга-сүме айтырар болгаш оларны эдерип, самыыраар кижиге Мен Бодум удур боор мен база ону чонунуң аразынга амылыг арттырбас мен ^e.

7Бодуңарны ыдыктаңар база ыдыктыг болуңар ^f, чүге дээрге Мен – Дээрги-Чаяакчы Бурганыңар-дыр мен! 8Мээң дүрүмнеримни сагыңар база күүседиңер, чүге дээрге Мен – силерни ыдыктап турар Дээрги-Чаяакчы-дыр мен!

9Ачазы биле авазын бак сөглээр кижи бүрүзүн өлүрүп каар херек ^g. Ол кижи ачазы биле авазын бак сөглеп турган-дыр: өлүмү дээш боду буруулуг-дур.

10Ашактыг херээжен-биле – өске кижиниң кадайы-биле самыырап турар эр кижи бар болза, ол эр кижини база ол херээженни өлүрүп каар херек ^h.

11Ачазының өске кадайы – соңгу иези-биле хойгажыр кижи ачазының мага-бодунуң тудуш кезээ-биле холбашкан дег болган-дыр. Ол кижини-даа, соңгу иезин-даа өлүрүп каар херек: өлүмү дээш олар боттары буруулуг-дур ⁱ.

12Оглунуң кадайы – кенни-биле хойгажыр кижи бар болза, ооң бодун-даа, кеннин-даа өлүрүп каар херек: олар бужар чүүлдү үүлгеткен-дир, өлүмү дээш, боттары буруулуг-дур ^j.

13Эр кижи өске эр кижи-биле, херээжен кижи-биле дег, холбажыр болза, олар бужар чүүлдү үүлгеткен-дир. Оларның иелдирзин өлүрүп каар херек: өлүмү дээш, олар боттары буруулуг-дур ^k.

14Эр кижи херээжен кижини болгаш ооң авазын иелдирзин ап алгаш, кады чурттай бээр болза, бужар чүүл-дүр. Силерниң араңарга бужар чүүл турбазын дээш, ол кижини-даа, ийи херээженни-даа отка өрттедир херек ^l.

15Эр кижи мал-маган-биле холбажыр болза, ол кижини өлүрер, а малды согар херек ^m.

16Херээжен кижи мал-маган-биле холбажыр болза, ол херээженни-даа, малды-даа өлүрүп каг. Оларны өлүрер ужурлуг: өлүмү дээш олар боттары буруулуг-дур.

17Эр кижи ачазының ийикпе, азы авазының уруу болур кыс угба-дуңмазын ап алгаш, холбажыр болза, бужар чүүл үүлгеттинген-дир ⁿ. Оларны боттарының чону көрүп турда, узуткап каар херек. Ол эр кижи угба-дуңмазы-биле холбашкан-дыр: буруузун боду чүктээр-дир.

18Эр кижи ай демдээ көрүп турар кадайы-биле холбажыр болза, херээжен кижиниң төктүп турар ханын ажытканы дээш, оларның иелдирзин чонунуң аразынга амылыг арттырбас херек ^o.

19Аваңның угбазы азы дуңмазы – даай-аваң-биле, ачаңның угбазы азы дуңмазы – угбаң-биле холбашпа. Ынчап турар кижи авазының азы ачазының кады төрээни-биле хойгажып турар-дыр, олар буруузун боттары чүктээр ^p.

20Бодунуң чеңгези-биле холбажыр кижи төрел акызының мага-бодунуң тудуш кезээ-биле холбашкан дег болган-дыр ^q. Олар бачыдын боттары чүктээрлер, ажы-төл чокка өлүп каарлар.

21Эр кижи акызының азы дуңмазының кадайын ап алыр болза, бужар чүүл үүлгеттинген-дир ^r, акызы азы дуңмазының мага-бодунуң тудуш кезээ-биле холбашкан дег болган-дыр. Олар ажы-төл чок болурлар.

22Мээң бүгү дүрүмнерим болгаш хоойлуларымны сагыңар база күүседиңер. Оон башка Мээң аңаа чурттазыннар дээш аппар чоруурум чурт силерни үндүр кыза бээр. 23Силерниң мурнуңардан үндүр сывырып турарым чоннуң чаңчылдарын эдербеңер: олар бо бүгүнү үүлгедип турганнар, ынчангаш Мээң олардан ческингеним ол-дур. 24Ынчан силерге аазаан мен: „Оларның черин ээлеп алыр силер. Мен силерге сүт болгаш ары чигири агып чыдар байлак черни өнчү кылдыр бээр мен ^s“. Мен дээрге силерни бүгү чоннардан тускайлап ылгап каан Дээрги-Чаяакчы Бурганыңар-дыр мен. 25А силер база арыг мал-маган биле кушту арыг эвезинден ылгап чоруңар. Мээң арыг эвес деп тускайлап кааным мал-маган, куш болгаш чер кырында көжүп-шимчээн үүрмек дириг амытаннар-биле бодуңарны бужартатпаңар ^t. 26Меңээ хамааржыр дээш ыдыктыг болуңар, чүге дээрге Дээрги-Чаяакчы болур Мен ыдыктыг-дыр мен ^u. Мен силерни Мээң улузум болзун дээш өске чоннардан тускайлап ылгап каан мен.

27Бир эвес эр азы херээжен кижи өлүг улустуң сүнезиннерин кый дээр азы караң көрнүр болза ^v, оларны өлүрүп каар херек ^w; ындыг улусту даштар-биле соп каапсын: өлүмү дээш олар боттары буруулуг-дур».