Lev 25 | TyvTUV | STEP | Дээрги-Чаяакчы Синай дагга Моисейге мынча деп чугаалаан:

‏ Leviticus 25

Амыр-дыш чылы

(Хост. 23:10-11)

1 Дээрги-Чаяакчы Синай дагга Моисейге мынча деп чугаалаан: 2 «Израиль чонга мону чугаала. Мээң силерге берип турарым чуртка чеде бергениңерде, чер Дээрги-Чаяакчыга бараалгаткан амыр-дыш үезинде дыштаныр ужурлуг. 3 Шөлүңерни алды чыл болбаазырадып тарыңар, виноградыңар шөлүн ажаап-карактаңар база чериңерниң дүжүдүн ажаап көрүңер ^a. 4 А чедиги чыл черниң онзагай амыр-дыш чылы, Дээрги-Чаяакчыга бараалгаткан амыр-дыш чылы болзун: ынчан шөлүңерни болбаазырадып тарываңар, виноградыңар шөлүн ажаап-карактаваңар. 5 Боду чайгаар үнүп келген дүжүдүңерни ажааваңар база ажаап-карактаваан сыптарда виноград чимистерин чыгбаңар: черниң амыр-дыш чылы келгени ол-дур. 6 Черниң амыр-дыш чылының үези силерни аъш-чем-биле хандырар: сеңээ, сээң эр, херээжен кулуңга, хөлезилеттинген ажылчыныңга болгаш аалыңда чурттап турар даштыкы кижиге; 7 мал-маганыңга база чериңде турар аң-меңге чериңниң бүгү дүжүдү аъш-чем болур».

Беженги чыл – Хосталга чылы болур

8 «Чеди катап чеди чылды санап алыңар, ынчан силерге чеди амыр-дыш чылын киириштир дөртен тос чыл хуусаалыг үе санаттынып кээр. 9 Чедиги айның онгу хүнүнде ^b мыйыс эдискини ^{▼▼ Мыйыс эдиски – еврей дылда «шофар» дээр, кошкар мыйызындан кылган этсир хөгжүм херексели.} этсиңер. Өндүр улуг арыглаашкын хүнүнде силерниң бүгү чериңерге мыйыс эдискини этсиңер. 10 Беженги чылды ыдыктай көргеш, чериңерде чурттаан бүгү улуска хосталыышкынны чарлаңар: ол чыл силерге Хосталга чылы болзун. Хувааглыг черин садыпкан кижи бүрүзү черин дедир эгидип алзын база кулданыгже саттырыпкан кижи бүрүзү өг-бүлезинче ээп келзин. 11 Беженги чыл силерге Хосталга чылы болзун. Чүнү-даа тарываңар база черге боду чайгаар үнүп келген дүжүттү ажааваңар, ажаап-карактаваан сыптарда виноград чимистерин чыгбаңар. 12 Ол дээрге Хосталга чылы-дыр. Ол силерге ыдыктыг болзун. Шөлде өзүп үнген ногаа-чимисти чиир силер.

13 Шак ол Хосталга чылында хувааглыг черин садыпкан кижи бүрүзү черин дедир эгидип алзын. 14 Өске кижиге чериңер садып азы ооң черин садып ап тура, бот-боттарыңарны когаратпаңар. 15 Дараазында Хосталга чылынга чедир арткан чылдарны санааш, ол чылдарның санын барымдаалап, черниң өртээн доктааткаш, өске кижиден черни садып ал, а ол кижи дүжүт чыып алганы чылдарның санын барымдаалап, черни сеңээ садар ужурлуг ^d. 16 Шак ындыг чылдар хөй болган тудум-на, өртекти өстүрер ужурлуг сен, а ол чылдар эвээш боор болза, өртекти бадырар ужурлуг сен, чүге дээрге демги кижи сеңээ дүжүт санын садып турар болгай. 17 Бот-боттарыңарны когаратпаңар, Бурганыңардан коргуңар; Дээрги-Чаяакчы Бурганыңар – Мен-не болгай мен.

18 Мээң дүрүмнеримни күүседиңер, хоойлуларымны сагыңар база күүседиңер, ынчан чериңерге сагыш амыр чурттаар силер. 19 Чер силерге элбек дүжүттү бээрге, аъш-чемиңер четчир боор, чериңер кырынга сагыш амыр чурттаар силер. 20 „Чедиги чылда тарывас база дүжүт ажаавас болзувусса, чүнү чиир бис?“– деп айтыра бээриңер чадавас. 21 Мен алдыгы чылда Бодумнуң ачы-буянымны силерже чорудуп бээр мен: ол чыл силерге үш чылда четчир дүжүттү хайырлаар ^e. 22 Сески чылда тарааңар тарып тура, эрги дүжүдүңерни чиир силер. Чүгле тоску чылда, сески чылдың дүжүдү үнүп кээрге, чаа дүжүдүңерни чиир силер.

23 Чер Меңээ хамааржыр, ынчангаш ону кезээ мөңгеде садып болбас, а силер дээрге Мээң черимге түр када турумчуп алган көшкүн улус-тур силер ^f. 24 Ээлеп турарыңар бүгү черге биеэги ээге хувааглыг черин дедир садып алырын чөпшээреңер.

25 Бир эвес ха-дуңма чонуңдан бир кижи ядарай бергеш, хувааглыг чериниң кезиин садып турар болза, ооң чоок төрели-камгалакчызы чедип келгеш, төрелиниң садыпкан черин дедир садып алзын ^g. 26 А ядараан кижиниң орнунга черни дедир садып алыр төрели тывылбаан дижик. Ынчан ол кижи черин дедир садып алырынга четчир акша-хөреңги тып аар болза, 27 дараазында Хосталга чылынга чедир арткан чылдарны санааш, черин садыпкан кижизинге артыкшылдыг төлевирни эгидип бергеш, хувааглыг черин дедир эгидип алзын. 28 А бир эвес ол кижиде черни садып алган турган кижиге эгидип бээр акша-хөреңги чок болза, ооң чери Хосталга чылынга чедир садып алган кижиниң ээлелинге артып каар. Хосталга чылында чер биеэги ээзинче эглип кээр, ол кижи база катап бодунуң чериниң ээзи болу бээр ^h.

29 Ынчаарга кандыг-бир кижи долгандыр ханалап каан хоорайда турар чуртталга бажыңын садыпкан болза, ону сатканындан бээр бүдүн чыл дургузунда дедир садып алырын чөпшээрээр. 30 Бир эвес ээ кижи бүдүн чыл эрткижеге чедир бажыңын дедир садып албас болза, долгандыр ханалап каан хоорайда турар чуртталга бажыңы ону садып алган кижиге болгаш ооң бүгү салгакчыларынга кажан кезээде артып каар; ол бажыңны Хосталга чылында-даа ээзинге дедир эгитпес. 31 А долгандыр ханалаваан суурларда турар бажыңнарны черде шөлдер-биле деңней көөр: оларны кажан-даа дедир садып ап болур, а Хосталга чылында олар биеэги ээлеринче дедир эглип кээр.

32 А левиттерниң хоорайларынга хамаарыштыр алыр болза ⁱ, левиттер боттарының ээлээн хоорайларында бажыңнарын кажан-даа дедир садып ап болур. 33 Кандыг-бир кижи левиттерден бажың садып алыр болза ^{▼▼ Өске бурунгу сөзүглелде «Левиттерниң кайы-бирээзи бажыңын дедир садып албайн барза» деп бижээн.}, левиттерниң ээлээн хоорайында турар садыпкан бажың Хосталга чылында ээзинче дедир эглип кээр. Чүге дээрге левиттерниң хоорайларында турар бажыңнар израиль чоннуң аразынга оларның ээлел чери болур. 34 А левиттерниң хоорайларының чанында одар-белчиирлерни садып болбас, чүге дээрге олар кезээ мөңгеде левиттерниң ээлел чери болур.

35 Ха-дуңма чонуңдан бир кижи ядарай бергеш, бодун шуут азырап шыдавайн баар болза, өскээртен келген, чуртуңарга түр када чурттап турар кижини дег, ону деткип көр ^k; ол силерниң араңарга амыдырап артсын. 36 Аңаа акша чегдиргеш, хөө хуузун алба, бергениңден хөйнү негеве ^l. Бурганыңдан коргуп чор, демги кижи силерниң араңарга амыдырап артсын. 37 Аңаа акша-мөңгүн бергеш, хөө хуузун алба, аъш-чемиң берип тура, бергениңден хөйнү дедир негеве. 38 Мен дээрге силерге ханаан черни бээр дээш база Бурганыңар болур дээш, силерни египет черден үндүре берген Дээрги-Чаяакчы Бурганыңар-дыр мен.

39 А бир эвес ха-дуңма чонуңдан ядарай берген бир кижини сеңээ садыптар болза ^m, аңаа кулдуң кылыр ажылын онаава ⁿ. 40 Ол сээңиинге хөлезилеттинген ажылчын дег, түр када хөлечииң дег турзун; чүгле Хосталга чылынга чедир сеңээ ажылдап берзин ^o. 41 А ол чыл кээрге, ооң боду-даа, ажы-төлү-даа сээң аалыңдан өг-бүлезинче, ада-өгбезиниң ээлел черинче дедир ээп чана берзин. 42 Чүге дээрге израиль чон – египет черден Мээң үндүре берген кулдарым-дыр: оларны кулгулаштыр садып болбас ^p. 43 Оларны каржы-дошкун чагырба ^q, Бурганыңдан коргуп чор. 44 А силерге эр азы херээжен кул турзун деп бодаар болзуңарза, силерни хүрээлээн чоннардан эр азы херээжен кулду садып алыңар. 45 Силерниң араңарда чурттап турар даштыкы улустуң уруг-дарыын база садып ап болур силер. Оларның өг-бүлези силерниң чуртуңарга көжүп келгенде төрүттүнген ажы-төлүн база садып ап болур силер. Шак ындыг улус силерниң өнчүңер бооп болур. 46 Оларны ажы-төлүңерге өнчү кылдыр арттырып каап болур силер. Ажы-төлүңер кулдарыңарның ээлери болур дээш салгап алыр: оларны кажан кезээде кулданып ап болуруңар ол. А силерниң ха-дуңмаңарны – израиль чонну каржы-дошкуну-биле чагырбаңар.

47 Силерниң араңарда чурттап турар даштыкы кижи бай-шыдалдыг апарган, а ха-дуңма чонуңдан бир кижи ядарай бергеш, даштыкы кижиниң азы ооң өг-бүлезиниң кулу кылдыр саттырыпкан дижик ^r 48 Ындыг таварылгада, ол кижини садыпкан соонда дедир садып ап болур. Ону ооң акы-дуңмаларының бирээзи дедир садып алзын ^s. 49 Азы ооң төрел акызы, азы ол акызының оглу, азы төрел бөлүүнден чоок төрелдериниң бирээзи ону дедир садып алзын. Азы ол боду бай-шыдалдыг апаар болза, бодун садып хостап алзын.

50 Ынчан ол кул кижи ону садыпканы чылдан бээр ээлчеглиг Хосталга чылынга чедир арткан үени санааш, ону садып алган кижи-биле санажып алзын. Ол кижи бодун садыпкан акша-мөңгүннү чылдар санынга хуваагаш, төлээр акшаны берзин; ооң ээ кижиге турган үезин хөлезилеттинген ажылчын бооп турганы хуусаа кылдыр санаар херек. 51 Хосталга чылынга чедир ам-даа хөй чылдар арткан болза, демги кижи оларның санын барымдаалап, ону садыптарга, алган акша-мөңгүнүн бодун дедир садып хостап турары дээш эгидип бээр ужурлуг. 52 А Хосталга чылынга чедир эвээш чылдар арткан болза, демги кижи оларны киириштир санааш, ол чылдарның санын барымдаалап, бодун дедир садып хостап турары дээш төлээр ужурлуг.

53 Саттырыпкан кижи бүгү ол чылдарда ээзиниң хөлезилеттинген ажылчыны дег болзун: ээ кижи демги кижини каржы-дошкуну-биле чагыра бээрин болдурбаңар. 54 Саттырыпкан кижи шак ынчаар дедир саттынып хосталбас-даа болза, Хосталга чылында ол боду-даа, ажы-төлү-даа хосталып, ээп чана бээр ужурлуг ^t. 55 Чүге дээрге израиль чон – Мээң кулдарым-дыр. Мээң египет черден үндүре берген кулдарым – олар-дыр. Мен – Дээрги-Чаяакчы Бурганыңар-дыр мен!»