Lev 27 | TyvTUV | STEP | Дээрги-Чаяакчы Моисейге мынча деп чугаалаан:

‏ Leviticus 27

Дээрги-Чаяакчыга даңгырактар болгаш ыдыктыг өргүлдер

1 Дээрги-Чаяакчы Моисейге мынча деп чугаалаан: 2 «Израиль чонга мону дамчыдып чугаала. Бир-ле кижини доктааткан өртек ёзугаар Дээрги-Чаяакчыга бараалгадып, ыдыктаар деп онза даңгырак берген дижик сен ^a. 3 – 4 – 5 – 6 – 7 Дээрги-Чаяакчыга бараалгадып, ыдыктаан кижини дедир хостаар дизиңзе, доктааткан өртекти: чээрбиден алдан хар чедир назылыг эр кижи дээш – бежен мөңгүн ыдыктыг шекелди ^{▼▼ 5:15-ке немелде тайылбырны көр.}; херээжен кижи дээш – үжен шекелди; бештен чээрби хар чедир назылыг улус болза, эр кижи дээш – чээрби шекелди, а кыс кижи дээш – он шекелди; бир айдан беш хар чедир назылыг улус болза, эр кижи дээш – беш шекелди, а кыс кижи дээш – үш шекелди; алдан хардан улуг назылыг улус болза, эр кижи дээш – он беш шекелди, а херээжен кижи дээш – он шекелди төлээр ужурлуг сен. 8 А бир эвес доктааткан өртекти төлээр харыың чок болза, ыдыктаан кижиңни Бурганның бараалгакчызының мурнунга эккел. Бурганның бараалгакчызы ыдыктаан кижиңниң өнчү-хөреңгизин үнелеп көргеш, ону барымдаалап, төлээр өртээңни доктаатсын.

9 А бир эвес Дээрги-Чаяакчыга эккеп салып болур малды өргүүрүн аазаан болзуңза, ол малың ыдыктыг болу бээр. 10 Ол малды солуй салып, эки малды багайы-биле, багайын – экизи-биле орнавас ужурлуг сен. А бир эвес малды өске мал-биле солуур болзуңза, баштай салган-даа, орнап турар-даа малың Дээрги-Чаяакчыга салган ыдыктыг өргүл болур. 11 Ынчаарга аазаан малың кандыг-ла-бир арыг эвес, Дээрги-Чаяакчыга өргүп болбас мал болза, ооңну Бурганның бараалгакчызынга эккеп көргүс. 12 Бурганның бараалгакчызы ол малдың эки-багайын үнелеп көрзүн: өртээн чеже кылдыр доктаадыр-дыр, ынчалдыр болзун. 13 Бир эвес ол малыңны дедир садып алыр деп турар болзуңза, доктааткан өртекке немей өртектиң бештиң бирин бээр сен ^c.

14 Бир-ле кижи бодунуң бажыңын Дээрги-Чаяакчыга бараалгадып, ыдыктап турар болза, Бурганның бараалгакчызы ол бажыңның эки-багайын үнелеп көрзүн: өртээн чеже кылдыр доктаадыр-дыр, ынчалдыр болзун. 15 Бир эвес бажыңын бараалгадыпкан кижи оозун дедир садып алыр деп турар болза, доктааткан өртекке немей өртектиң бештиң бирин берзин, ынчан бажың ооңуу болу бээр.

16 Бир-ле кижи бодунуң хувааглыг черинде шөлдү Дээрги-Чаяакчыга бараалгадып, ыдыктап турар болза, ол дээш доктааткан өртек тарыыр үрезин хемчээлинден хамаарышсын: бир хомер ишти арбай дээш, бежен мөңгүн шекелди төлезин. 17 Кандыг-бир кижи шөлүн Хосталга чылы эрткен соонда дораан-на Бурганга бараалгадып, ыдыктап турар болза, доктааткан өртек өскерилге чокка артсын ^d. 18 А кандыг-бир кижи шөлүн Хосталга чылы эрткен соонда, элээн болгаш, бараалгадып, ыдыктап турар болза, Бурганның бараалгакчызы дараазында Хосталга чылынга чедир арткан чылдарның санын барымдаалап, акша-мөңгүннү санааш, төлээр ужурлуг түңнү доктааткан өртектен казып каапсын. 19 Шөлүн бараалгаткан кижи оозун дедир садып алырын күзээр болза, доктааткан өртекке немей өртектиң бештиң бир кезээ акша-мөңгүннү берзин, ынчан ол шөл база катап ооңуу болу бээр. 20 Ынчаарга ол кижи шөлүн дедир садып албас болза азы ук шөлдү өске кижиге садыпкан болза, ону ам дедир садып аары болдунмас ^e. 21 Ынчан ол шөл Хосталга чылында Дээрги-Чаяакчыга ыдыктыг өргүл болу бээр; Бурганга кезээ мөңгеде тураскааткан шөлдү дег, ону Бурганның бараалгакчызы ээлээр ^f.

22 А бир эвес кандыг-бир кижи ооң хувааглыг черинге хамаарышпас шөлдү садып алгаш, Дээрги-Чаяакчыга бараалгадып, ыдыктап турар болза, 23 Бурганның бараалгакчызы Хосталга чылынга чедир арткан чылдарны санааш, өртекти доктаадыр ужурлуг. А демги кижи доктаадып каан өртекти барымдаалап, акшаны ол-ла хүндүс Дээрги-Чаяакчыга ыдыктыг өргүл кылдыр бээр ужурлуг. 24 Ол шөл Хосталга чылында демги кижиниң садып алганы ээзинче – черни хуваалда ёзугаар ээлеп турар кижиже эглип кээр. 25 Доктааткан өртек бүрүзүн ыдыктыг шекел-биле санашсын: бир шекелдиң деңзизи чээрби герага ^g дең болзун.

26 Мал-маганның эң баштай төрүттүнген бүгү төлдери Дээрги-Чаяакчыга хамааржыр, ынчангаш оларны кым-даа бараалгадып, ыдыктап шыдавас. Бода-даа, шээр-даа мал болур болза, олар Дээрги-Чаяакчыга хамааржыр-ла болгай ^h. 27 А бир эвес арыг эвес малды бараалгадып, ыдыктап турар болза, ону доктааткан өртекке немей өртектиң бештиң бирин бергеш ⁱ, дедир садып ап болур. Ынчаарга малды дедир садып алыр кижи чок болза, ону доктааткан өртек-биле садар херек.

28 Кижиниң хуу өнчү-хөреңгизинден Дээрги-Чаяакчыга кезээ мөңгеде тураскаадып турары кандыг-даа чүүлдү: кижини-даа, малды-даа, хувааглыг черде шөлдү-даа садып азы дедир садып ап болбас. Кезээ мөңгеде Бурганга тураскааткан кандыг-даа чүүл Дээрги-Чаяакчыга аажок ыдыктыг өргүл болур. 29 Бир эвес шак ол кезээ мөңгеде тураскааткан чүүл кижи болур болза, ону дедир садып ап болбас; ындыг кижини өлүмге онаар херек ^j

30 Черге өзүп үнер бүгү чүүлдүң оннуң бир кезии – шөлдерниң дүжүдү болгаш ыяштарның чимистери Дээрги-Чаяакчыга хамааржыр, ол дээрге Аңаа салган ыдыктыг өргүл-дүр ^k. 31 Бир эвес кандыг-бир кижи бодунуң оннуң бир кезии үлүүн дедир садып алырын күзээр болза, ооң өртээн төлезин база өртектиң бештиң бир кезиин немей берзин ^l. 32 Бода болгаш шээр малдың оннуң бир кезиин – демдектээн бүгү малды Дээрги-Чаяакчыга бараалгадып, ыдыктаар ужурлуг. 33 Онгу малдың ээзи кижи оларны эки-багайлап ылгавазын база солувазын; а бир эвес ээ кижи шак ындыг малды солуп алыр болза, ол мал-даа, солуй салган малы-даа ыдыктыг өргүл болур база ону дедир садып алыры болдунмас».

34 Дээрги-Чаяакчының израиль чонга Моисейни дамчыштыр Синай дагга берген айтыышкыннары шак ындыг боор-дур.