Luk 21 | TyvTUV | STEP | Иисус ыңай-бээр көрүнгеш, Бурганның өргээзиниң акша-мөңгүн чыыр аптаразынче өргүлдерин салып турган бай улусту көрүп каан.

‏ Luke 21

Дулгуяк кадайның өргүлү

(Мк. 12:41-44)

1 Иисус ыңай-бээр көрүнгеш, Бурганның өргээзиниң акша-мөңгүн чыыр аптаразынче ^a өргүлдерин салып турган бай улусту көрүп каан. 2 Ийи эң үүрмек чоос салып чыткан ядыы дулгуяк кадайны база көрүп каан. 3 Ол мынча дээн: «Алыс шынны силерге чугаалап тур мен, бо ядыы дулгуяк херээжен шупту улустан хөйнү салды. 4 Чүге дээрге шупту улус боттарының артыкшылдыг байындан Бурганга өргүл салып турду, а ол, ындыг ядыы хирезинде, бодунуң амыдыраарынга херек бүгү кошкулун салып кагды» ^b.

Бадыткал демдектери болгаш истеп-сүрүүшкүннер

(Мф. 24:1-14; Мк. 13:1-13)

5 Чамдык улус Бурганның өргээзиниң дугайында, ооң кайы хире чараш даштар болгаш Бурганга өргүп салган белектер-биле каастаттынганының дугайында чугаалажы бергеннер. Ынчалза-даа Иисус мынча дээн: 6 «Силерниң мында магадап көрүп турарыңар бүгү чүвени шуптузун үрегдеп-бузуп кааптар ^c. Маңаа туружундан шимчевээн даш безин артпас – ындыг үе чедип кээр».

7 Иисустан мынча деп айтырганнар: «Башкы, а ол бүгү кажан болу бээрил? Ук болуушкуннар чоокшулап келгениниң кандыг бадыткал демдектери турарыл?»

8 Ол мынча деп харыылаан: «Силерни дуурайлап кааптарындан кичээниңер ^d, Мээң адым тудуп: „Христос – мен-дир мен“– деп база „Ол үе келген-дир“– дижип, хөй кижи чедип кээр ^e. Оларны эдере бербеңер. 9 А дайын-чаалар болгаш үймээн-хөлзээзиннер дугайында дыңнааш, кортпаңар, баштай ол бүгү болур ужурлуг, ынчалза-даа бүгү чүвениң ылап төнчүзү ындыг дораан келбес».

10 Оон Ол улаштыр мынча дээн: «Бир чонче өске чон база күрүнеже күрүне халдай бээр ^f. 11 Күштүг чер шимчээшкиннери, чер болганга аш-чут ^g, аарыг-аржык, коргунчуг болуушкуннар ^h болгаш дээрден келген өндүр улуг, кайгамчык демдектер болгулаар. 12 Ынчалза-даа ол бүгү болур бетинде, силерни тудуп хоругдап, истеп-сүрүп эгелээр. Мээң адым дээш, силерни хааннар болгаш чагырыкчыларның холунга тудуп берип ⁱ, синагогаларга шиидип, кара-бажыңнарже киир октап эгелээр. 13 Ынчан силерге Мээң дугайымда херечилээр арга тыптып кээр. 14 Ынчангаш боттарыңарны камгалаары-биле чүнү чугаалаарыл деп, баш бурунгаар ажаанзыраваңар. 15 Чүге дээрге Мен силерге удурланыкчыларыңарның кайызы-даа удур туржуп база чаргылдажып шыдавазы чечен дыл болгаш мерген угаанны бээр мен ^j. 16 Ада-иеңер-даа, акы-дуңмаңар-даа, дөргүл-төрелиңер-даа, эш-өөрүңер-даа силерге өскерли бээр, харын-даа силерниң чамдыыңарны өлүрүп каар. 17 Мээң адым ужун бүгү улус силерни көөр хөңнү чок апаар. 18 Ынчалза-даа бажыңардан чаңгыс дүк безин кээп дүжүп читпес ^k. 19 Ол бүгүнү шыдажып эртер болзуңарза, амы-тыныңарны камгалап алыр силер».

Иерусалимниң буурап дүжериниң дугайында

(Мф. 24:15-21; Мк. 13:14-19)

20 «Иерусалимни аг-шериг бүзээлеп алган турарын көрүп кагзыңарза, ооң буурап дүжери удавас дээрзин билип алыңар. 21 Ынчан Иудеяда чурттаан улус дагларже дезипсин; а хоорайның бодунда турар улус оон үнүп чорупсун; а чоок-кавы суурларга турган улус хоорайже дедир барбазын. 22 Чүге дээрге Бижилгеде бижиттинген бүгү чүвениң боттаныр ужурлуу кеземче үезиниң келгени ол-дур. 23 Ол үеде иштиг-сааттыг болгаш эмер чаш уруг-дарыглыг улус ат болур! Бүгү чуртту улуг айыыл-халап хөме алыр, бо чонну Бурганның килеңи таварыыр ^l. 24 Улустуң чамдыызы хылыштың чидиг бажындан калыр, а чамдыызын өске чоннарже тудуп алгаш баар. Өске чоннар улузунуң тергиидээр үези төнгүжеге чедир, олар Иерусалимни таптай базып кээр» ^m.

Кижи амытан Оглунуң чедип кээри

(Мф. 24:29-31; Мк. 13:24-27)

25 «Хүнге, айга болгаш сылдыстарга кайгамчык демдектер көстүр, а далайның шимээргеп, хөлзээринден аймаараан чоннар чер кырынга сүрээдеп, мөгүдей бээрлер. 26 Чер бөмбүрзээнче кел чыдар айыыл-халапты манааш, корткан улустуң тыны үстүп эгелээр, чүге дээрге дээрниң аг-шерии сириңейнип, божаңнай бээр. 27 Олар ынчан улуг күчү-күжү-биле база өндүр чырыы-биле булут кырлап кел чыдар Кижи амытан Оглун көрүп каарлар ⁿ. 28 А ол бүгү боттанып эгелээрге, саң дорт туруп алгаш, баштарыңар өрү көдүрүңер, чүге дээрге хосталгаңар чоокшулап келген-дир».

Фига ыяжының чижээ-биле кичээндириг

(Мф. 24:32-35; Мк. 13:28-31)

29 Оон Иисус оларга угаадыглыг чугаа чугаалаан: «Фига ыяжынче база шупту-ла өске ыяштарже топтап көрүңер даан: 30 оларның бүрүлери частып эгелээрге, чай удавас дээрзин эндевес болгай силер. 31 Шак ынчалдыр, ол бүгүнүң боттанып эгелээнин көрүп кагзыңарза, Бурганның Чагыргазы чоокшулап келгенин билип алыңар. 32 Алыс шынны силерге чугаалап тур мен: ол бүгү чүве боттанмаан шаанда, бо салгалдың улузу өлүп читпес ^o. 33 Дээр биле чер эстип-хайлы бээр, а Мээң сөстерим эстип-хайлы бербес» ^p.

Удувайн, белен болуңар

34 – 35 «Оваарымчалыг болуңар: силерниң чүректериңер үен-даян хөглээшкинге, арагалаашкынга болгаш амыдыралдың сагышсыралдарынга алзып, дашталбазын база ол хүн хенертен, какпа дег ^q, кырыңарга келбезин. Чүге дээрге ол хүн чер кырын ээлей чурттаан бүгү улуска чедип кээр. 36 Ынчангаш бо бүгү кел чыдар айыыл-халаптардан чайлай бээр харыктыг болур дээш база Кижи амытан Оглунуң мурнунга бараалгаар дээш, үргүлчү серемчилелдиг болуңар ^r, а ол ышкаш мөргүңер» ^s.

37 Иисус хүннүң-не Бурганның өргээзинге өөредип турган ^t, а кежээ дүжерге, Елеон даанче чоруткаш, аңаа хонуп ап турган. 38 А бүгү чон Ону дыңнаары-биле даң бажында-ла Бурганның өргээзинге чыглып кээр болган.