Mal 2 | TyvTUV | STEP | «Бурганның бараалгакчылары , силерге ам бээр айтыышкыным бо-дур:

‏ Malachi 2

Бурганның бараалгакчыларын чемелээни

1 «Бурганның бараалгакчылары ^a, силерге ам бээр айтыышкыным бо-дур: 2 Мээң адымны алдаржыдыңар. А бир эвес Мени тооп дыңнавас база Мээң адымны алдаржыдарын чүрээңерге хүлээп албас болзуңарза, Мен силерже каргыш ыдар мен ^b, силерниң алгыш-йөрээлиңерни каргыш кылдыр хуулдуруптар мен ^c – деп, Аг-шериглиг Дээрги-Чаяакчы чугаалаан. – Каргап эгелей бердим, чүге дээрге силер Мээң адымны алдаржыдарын чүрээңерге хүлээп албаан-дыр силер.

3 Силерниң үре-салгалыңарны кезедир мен ^{▼▼ Бо домактың утказы эки билдинмес. Болгу дег өске уткалары: «Мен холдарыңарны кемдедип каар мен» азы «Далган-тарааңарны узуткап каар мен».}. Байырлалдарда өргээн малыңарның чинин арыннарыңарже хөме чашканнап кааптар мен, силерни ол чин-биле кады үндүр октаптар мен ^e. 4 Мээң Левийден укталган аймааңар-биле чарган чагыг-керээм ^f күштүг бооп артсын дээш, силерге ол айтыышкынны бергенимни билип алыңар – деп, Аг-шериглиг Дээрги-Чаяакчы чугаалаан. – 5 Мээң Левийниң аймаа-биле чарган чагыг-керээм силерге эки-чаагай амыдыралды бээр ужурлуг турган, ол бүгүнү Мен хайырладым-даа. Левиттер Менден коргар ужурлуг турган, ынчангаш Менден коргуп, Мээң адымны ханы хүндүлеп турган. 6 Левийниң салгакчылары алыс шын өөредигни чугаалап турган, оларның аксындан меге сөс үнмээн. Олар Меңээ туралыы-биле, шынныы-биле бараан болуп турган, хөй улусту бачыттан чайлаткан ^g.

7 Бурганның бараалгакчызының аксы-сөзү угаан-билигни кадагалаар ужурлуг ^h, ынчан улус ооң чугаа-сөзүнден өөредигни дыңнаксаар ⁱ, чүге дээрге ол – Аг-шериглиг Дээрги-Чаяакчының төлээлекчизи-дир. 8 А силер ол оруктан өскээр барган-дыр силер, боттарыңарның өөредииңер-биле хөй улусту буураткан-дыр силер. Левийниң аймаа-биле чарган чагыг-керээмни үрээн-дир силер ^j – деп, Аг-шериглиг Дээрги-Чаяакчы чугаалаан. – 9 Ынчангаш Мен силерни бүгү чоннуң мурнунга чөгенчиг, куду көрдүрген улус кылып каан мен, чүге дээрге силер Мээң оруктарым эдербээн-дир силер, ыдыктыг хоойлуну ажыглаарда, улусту ылгай көрүп турган-дыр силер ^k».

Иудейлерниң боттарының кадайларынга шынчы эвес чоруу

10 Бис шуптувус чаңгыс Адалыг эвес бис бе? ^l Бисти чаңгыс Бурган чаяап каан эвес чүве бе? А чүге бис Ооң ада-өгбевис-биле чарган чагыг-керээзин үреп, бот-боттарывыска кара сагыштыг болганывыс ол?

11 Иудейлер кара сагыштыг болган-дыр. Израиль чоннуң аразында, Иерусалим хоорайда чүдек-бужар чүве үүлгеттинип турар-дыр. Иудейлер Дээрги-Чаяакчының ынак ыдыктыг черин бужартаткан-дыр: олар өске бурганнарга мөгеер херээженнерге хандыкшып, өгленчип алган-дыр ^m. 12 Аг-шериглиг Дээрги-Чаяакчы ынчаар кылып турар кижи бүрүзүн Израильдиң аал-ораннарындан чайладып каапсын, ындыг кижиге Аңаа өргүл кылыр арга бербес болзун!

13 Оон ыңай мындыг чүве кылып турар-дыр силер: Дээрги-Чаяакчыга өргүл салыр бедигээшче карак чажын хөме кудуп каапкан-дыр силер. Ыглап-сыктап, хомудап турар-дыр силер, чүге дээрге Дээрги-Чаяакчы силерниң өргүлдериңерже ам көрүнмейн турар-дыр, оларны силерниң холуңардан хүлээп албас апарган-дыр. 14 «Чүге ындыгыл?» – деп айтырып тур силер. Чүге дээрге Дээрги-Чаяакчы аныяаңда өгленишкен кадайың биле сээң араңарда херечи-дир: ол херээжен кижи сээң кыс эжиң, өгленчир дугайында дугуржулга ёзугаар кадайың-даа болза, сен аңаа шынчы эвес болган-дыр сен.

15 Бурган ашак-кадай улусту чаңгыс мага-боттуг, сагыш-сеткилдиг боор кылдыр чаяап каан болгай. А чүге Ол олар тудуш чаңгыс болзун деп күзээрил? ^{▼▼ Бо домактың утказы эки билдинмес. Болгу дег өске утказы мындыг: «Сагыш-сеткили анаа кижи силер ышкаш кылдыр кылбас. Ындыг кижи чүнү күзээрил?»} Бурганга таарымчалыг үре-салгал ботталдырзын дээш. Ынчангаш силер сеткил-чүрээңерни кадагалаңар, кым-даа бодунуң аныяанда өгленишкен кадайынга шынчы чоруун үревезин. 16 «Бир эвес кандыг-бир кижи бодунуң кадайынга хөңнү чок апарып, ооң-биле чарлыр болза ^{▼▼ Бо домактың утказы эки билдинмес. Болгу дег өске утказы мындыг: «Мен ашак-кадай улустуң чарлырынга хөңнүм чок мен».}, ол кижи дерзии чорук-биле, хеви-биле дег, шыптынып аар – деп, Израильдиң Бурганы, Аг-шериглиг Дээрги-Чаяакчы чугаалаан. – Ынчангаш сеткил-чүрээңерни кадагалаңар, ындыг кара сагыштыг чорук кылбаңар ^p».

Бурганның чонну шын шиидер дээш кээри

17 Дээрги-Чаяакчыны чугаа-сөзүңер-биле бужургандырып алган-дыр силер ^q. «Чүвүс-биле Аңаа бужурганчыг апарганывыс ол?» – деп айтырар-дыр силер.

«Дээрги-Чаяакчы бузут үүлгедип турар улусче эки көрнүп турар, Ооң сеткилинге ындыг улус кирип турар» – деп хыйланып турарыңар-биле ^r база «Чөптүг шииткел кылыр Бурган кайыл?» – деп айтырып турарыңар-биле ^s.