Mar 1 | TyvTUV | STEP | Бурганның Оглу Иисус Христос дугайында Буянныг Медээниң эгези бо-дур.

‏ Mark 1

Иоанн Медеглекчиниң суртаалы

(Мф. 3:1-12; Лк. 3:1-9; Ин. 1:19-28)

1 Бурганның Оглу ^a Иисус Христос дугайында Буянныг Медээниң эгези бо-дур. 2 Исайя медээчиниң номунда ^{▼▼ Өске бурунгу сөзүглелдерде «Исайя медээчиниң номунда» деп эвес, а «Медээчилерниң номнарында» деп бижээн.} мынча деп бижиттинген:

«Көр даан, Мээң төлээм Сээң орууңну белеткеп берзин дээш,
ону Сени мурнай чорудуп тур мен» ^c.
3 «Ээн кургаг ховуда алгырган кижиниң үнү:
„Дээрги-Чаяакчыга оруктан белеткеңер!
Ооң эртер кокпаларын дорттап бериңер“» ^d.

4 Ынчангаш ээн кургаг ховуга Иоанн Медеглекчи чедип келген ^e. Ол улуска: «Бачыттарыңар дээш өршээл алыр дизиңерзе, бачыдыңар миннип, Бурганче ээлгениңер демдээ кылдыр сугга суктурар ужурлуг силер» – деп суртаалдап турган. 5 Улус аңаа бүгү Иудеядан база Иерусалим хоорайдан боттарының бачыттарын ажыы-биле миннир дээш кээп турган ^f, а Иоанн оларны Иордан хемге сугже суп турган. 6 Иоанн теве дүгүнден кылган хептиг база белинде хөм курлуг чораан ^g, а ооң чиир чеми шартылаа болгаш ховунуң ары чигири болган ^h. 7 Ол улуска мындыг суртаал берген: «Менден күчү-күштүг Кижи мээң соомдан чоруп олурар. А мен доңгайгаш, Ооң идииниң шидиишкинин безин чежеринге төлеп чок кижи-дир мен. 8 Мен силерни сугже суктум, а Ол силерни Ыдыктыг Сүлдеже сугар ⁱ».

Иисустуң сугга суктурганы болгаш күткүттүргени

(Мф. 3:13—4:11; Лк. 3:21-22; 4:1-13)

9 Ол хүннерде Галилеяның Назарет хоорайдан ^j Иисус чедип келген. Иоанн Ону база Иордан хемче суккан чүве-дир. 10 Иисус сугдан үнүп ора, дээрниң аңгайтыр ажыттына бергенин ^k база Ооң кырынче көге-буга дег бадып орар Бурганның Сүлдезин көрүп каан ^l. 11 Оон дээрден мынча дээн үн дыңналган ^m: «Сен Мээң ханы ынак Оглум-дур сен, Мээң сеткилимге кирер-дир сен ⁿ». 12 Ооң соонда ол-ла дораан Ыдыктыг Сүлде Ону ээн кургаг ховуже чорудупкан. 13 Ээн кургаг ховуга Ол дөртен хүн дургузунда эрликке күткүттүрүп ^o, аң-мең аразынга чурттап келген. Дээрниң төлээлери Аңаа бараан болуп турган ^p.

Иисустуң баштайгы өөреникчилери

(Мф. 4:18-22; Лк. 5:1-11)

14 Иоанны тудуп хоругдаанының соонда, Иисус Бурганның Буянныг Медээзин суртаалдап, Галилеяга ^q чедип келген. 15 Ол: «Доктааткан үе келген-дир ^r, Бурганның Чагыргазы чоокшулаан-дыр ^s: бачыдыңар миннип, Бурганче эглиңер база Буянныг Медээге бүзүреңер!» – деп суртаалдап турган.

16 Бир-ле катап Иисус Галилея хөлүнүң чаны-биле эртип бар чыткаш ^t, четкилерин хөлче салып турган балыкчылар Симон болгаш ооң дуңмазы Андрейни көрүп каан ^u. 17 Иисус оларга мынча дээн: «Мени эдериңер. Силерни кижилер тывыкчылары кылып каар мен ^v». 18 Алышкылар четкилерин каапкаш, ол-ла дораан Ону эдерип чорупканнар ^w. 19 Оон Ол бичии ырадыр кылаштай бергеш, Зеведейниң оглу Иаков биле ооң дуңмазы Иоанны көрүп каан, олар база-ла хемеде четкилерин септеп олурган. 20 Иисус оларны база дораан кый деп алган. Олар ачазы Зеведейни хөлечиктери-биле катай хемеге каапкаш, Иисусту эдерип чорупканнар.

Иисустуң аарыг кижилерни экиртип эгелээни

(Лк. 4:31-41)

21 Олар шупту Капернаум хоорайга чедип келген ^x. Үр болбаанда, Иисус амыр-дыш хүнүнде синагогаже кирип келгеш, улусту өөреди берген. 22 Ооң берген өөредиин улус кайгап ханмаан, чүге дээрге Иисус оларны ном-хоойлу тайылбырлакчылары ышкаш эвес, а эрге-чагырга ээлээн кижи ышкаш өөредип турган ^y.

23 Ол синагогага букка алыскан бир кижи алгырып үнген: 24 «Назарет чурттуг Иисус, Силерге бистен чүү херегил? ^z Силер бисти узуткаар дээш келдиңер бе? Силерни кымыл дээрзин билир мен ^aa, Силер – Бурганның Ыдыктыг Төлээлекчизи-дир силер!» ^ab

25 Иисус букка: «Ыыттава, ол кижиден үне бер!» – деп шыңгыы дужааган. 26 Бук ынчан ол кижини курулдурупкаш, ыыткыр алгырбышаан, оон үне берген ^ac.

27 Шупту улус кайгап-харааш, аразында: «Чүү деп чүвел бо? Ол Кижи буктарны безин чагырарга, олар Аңаа чагыртып турар, кандаай ындыг чаа, күштүг өөредиг чүвел бо? ^ad» – деп турган. 28 Удатпаанда Ооң дугайында дамчыыр чугаа бүгү Галилеяга тарай берген.

29 Иисус Иаков болгаш Иоанн-биле кады синагогадан үнгеш, үр болбайн, Симон биле Андрейниң бажыңынга чеде бергеннер. 30 Симоннуң кат-иези ^ae халыын аарыгдан аарып чыдар боорга, олар Иисуска дораан чугаалааннар. 31 Ол чыткан херээженче чоокшулап келгеш, ооң холундан тудуп алгаш, тургузуп эккелген ^af. Демги херээженниң эъдиниң изии дораан чавырлы берген, экирээн кижи ол дораан оларга бараан болуп эгелээн.

32 Кежээ дүшкенде, хүн ажа бергенде, Иисуска бар-ла турган аарыг-аржык болгаш букшуураан улусту эккелгеш туруп бергеннер. 33 Хоорайның бүгү чурттакчылары хаалга аксынга чыглып келген. 34 Янзы-бүрү аарыгларга алыскан хөй кижини Ол ынчан экиртип каан. Хөй буктарны кижилерден үндүр сывыртапкаш, оларга Ооң дугайында чугаалаарын хоруп каан, чүге дээрге буктар Ол кым дээрзин билир турган ^ag.

Иисустуң Галилеяга суртаалдааны

(Лк. 4:42-44)

35 Иисус дараазында эртен чер чырываанда-ла тургаш, дашкаар үнгеш, ээнзиргей черге барып, Бурганга мөргүп турган ^ah. 36 Симон болгаш Ооң-биле кады чораан улус Ону дилеп чорупкан. 37 Оон Иисусту тып алгаш, Аңаа: «Хамык улус Силерни дилеп тур» – дээннер. 38 Иисус оларга мынча дээн: «Чоок-кавы суурлар болгаш хоорайларже бараалыңар, Мен аңаа база суртаалдаайн, чүге дээрге кылыр дээш келген херээм-не ол болгай! ^ai» 39 Иисус бүгү Галилеяны эргий кезип, синагогаларга суртаалдап база буктарны үндүр сывыртап чоруп берген.

Кежи аарыг кижини экирткени

(Мф. 8:1-4; Лк. 5:12-16)

40 Бир-ле катап Иисуска кежи аарыг кижи чедип келгеш ^aj, Ооң мурнунга дис кырынга олура дүшкеш, Аңаа: «Күзээр-ле болзуңарза ^ak, Силер мени арыглап каар силер» – деп чалынган. 41 Иисус ону кээргей бергеш, холун сунуп, кежи аарыг кижиге деггеш, аңаа мынча дээн: «Күзеп тур мен, арыгланы бер!» 42 Кеш аарыы ол-ла дораан демги кижиден адырлы берген. Ооң кежи арыгланы берип, каң-кадык апарган ^al. 43 Иисус оон ол кижини чорудуп тура, аңаа шыңгыы чагып каан ^am: 44 «Дыңна, кымга-даа бо дугайында чугаалава. Баргаш, Бурганның бир-ле бараалгакчызынга көстүп каг, оон Моисейниң хоойлузунда айытканын ёзугаар, арыгланганың дээш, Бурганга өргүлден кыл ^an. Сен ол өргүлүң-биле экирээниңни улуска херечилеп көргүскен боор сен». 45 А ол кижи чоруткаш, болган таварылганың дугайында шупту улуска чарлап, үзүк-соксаал чок чугаалап эгелээн ^ao. Ынчангаш Иисус хоорайларже көзүлдүр кээр арга чок апаргаш, хоорай даштында ээнзиргей черлерге туруп алыр ужурга таварышкан. Улус Аңаа дөмей-ле чер болгандан кээп туруп берген.