‏ Matthew 7

Өскелерни шиитпеңер

(Лк. 6:37-38, 41-42)

1«Кымны-даа шиитпеңер ^a, Бурган ынчан силерни база шиитпес. 2Чүге дээрге өскелерни канчаар шиидер-дир силер, Бурган силерни база ынчаар шиидер, а кандыг хемчээл-биле хемчээп бээр силер, Бурган силерге база ынчаар хемчээп бээр ^b. 3Бодуңнуң карааңда чудукту эскербейн чыткаш, эжиңниң караанда чартыны чүге эскерип каар сен? 4Бодуңнуң карааңда чудук бар хиреңде, эжиңге канчап: „Карааңда чартыны ап кааптайн“– дээр сен? 5Ийи арынныың ол-дур! Баштай бодуңнуң карааңда чудукту уштуп каавыт, эжиңниң караандан чартыны канчаар уштурун ынчан көрүп каар сен.

6Ыттарга ыдыктыг чүүлдер каап бербеңер ^c, хаваннар мурнунга ак шуру эртине чашпаңар. Оон башка ыттар эглип келгеш, силерже халдап кээр, а хаваннар эртинеңерни таптай базып кааптар».

Дилениңер, дилеңер, эжикти соктаңар

(Лк. 11:9-13)

7«Дилениңер, Бурган силерге бээр; дилеңер, тып аар силер; эжикти соктаңар, Бурган силерге ажыдып бээр. 8Диленген кижи бүрүзү алыр, дилээн кижи бүрүзү тып алыр, соктаан кижи бүрүзүнге ажыдып бээр ^d.

9Оглу хлеб айтырарга, силерниң араңардан кым олче даш сунарыл? 10А балык айтырарга, кым чылан сунуп чыдарыл? 11Бузуттуг-бак-даа тургаш ^e, ажы-төлүңерге буянныг белек берип билир болзуңарза, дээрде Адаңар Оон диленген улуска кайы хире эки чүүлдерни бербес деп!

12Ынчангаш силерге улус кандыг хамаарылгалыг боорун күзээр-дир силер, боттарыңар база улуска шак ындыг хамаарылгалыг болуңар ^f. Моисейниң хоойлузунуң база медээчилерниң өөредииниң алыс утказы мында болдур ийин ^g».

Тар эжик

(Лк. 13:24)

13«Тар эжик дамчыштыр кириңер, чүге дээрге өлүм эжии алгыг, а ынаар чедире бээр орук делгем, хөй улус ол орук-биле бар чыдар. 14Ынчалза-даа мөңге амыдыралдың эжии тар, а ынаар чедире бээр орук ^h кызаа, ону тып чедип кээр улус эвээш».

Улусту кылган ажылының үре-түңнелинден билип аар

(Лк. 6:43-44; 13:25-27)

15«Меге медээчилерден кичээниңер ⁱ. Олар силерже хой кежи эштип алган чедип кээр, а херек кырында араатан бөрүлер боор ^j. 16Оларны кылган ажылының үре-түңнелинден танып аар силер ^k. Харагандан виноград чимизи азы тенниг оотпактан фига чимизи чыыр ийикпе? 17Шак ынчаар эки ыяш чаагай чимис бээр, а багай ыяш багай чимис бээр ^l. 18Эки ыяш багай чимис берип шыдавас, а багай ыяш эки чимис берип шыдавас. 19Эки чимис бербестээн ыяштарны кескеш, отче киир октаптар ^m. 20Ынчангаш ындыг улусту кылган ажылының үре-түңнелинден танып аар силер.

21Мени: „Дээрги! Дээрги!“– деп турар кижи болган-на Дээрниң Чагыргазынче кирип шыдавас ⁿ, а чүгле Мээң Дээрде Адамның күзел-соруун күүседип чоруур кижи кирер. 22Шииткел хүнүнде Меңээ хөй улус: „Дээрги! Дээрги! ^o Силерниң адыңардан суртаалдавайн келдивис бе? Силерниң адыңар-биле буктарны үндүр сывыртавайн турдувус бе? ^p. Силерниң адыңар-биле дыка хөй кайгамчык чүүлдерни кылбадывыс бе?“– дижи бээр. 23Мен ынчан оларга үзе сөглээр мен: „Мен силерни кажан-даа билбес чордум. Бачыт үүлгедикчилери, Менден ыраңар!“» ^q

Ийи аңгы бажың таваа

(Лк. 6:47-49)

24«Ынчангаш Мээң бо сөстеримни дыңнап турар база херек кырында сагып чоруур кижи бүрүзү бодунуң бажыңын даш кырынга тудуп алган угаанныг кижиге дөмей. 25Чаъс кудуп, хемнер дажып, хат-шуурган киткээш, бажыңны хөме тавараан. А ол бузулбаан, чүге дээрге ооң таваан дашта салган-дыр. 26Ынчаарга Мээң сөстеримни дыңнап турар, ынчалза-даа херек кырында сагывас кижи бүрүзү бодунуң бажыңын элезин кырынга туткан сээдең кижиге дөмей. 27Чаъс кудуп, хемнер дажып, хат-шуурган киткээш, бажыңны хөме тавараан ^r. А бажың коргунчуг дааш-биле буступ кээп дүшкен».

28Иисус ол чугаазын доозуптарга, чыылган чон Ооң берген өөредиин кайгап ханмаан. 29Чүге дээрге Ол улусту ном-хоойлу тайылбырлакчызы ышкаш эвес, а эрге-чагырга ээлээн кижи ышкаш өөредип турган ^s.