Mat 9 | TyvTUV | STEP | Иисус хөлдүң ол чарыынче хемелиг эжиндирип кеже бергеш, Бодунуң чурттаан хоорайынче ээп келген .

‏ Matthew 9

Иисустуң чартыктаан кижиниң бачыттарын өршээгени

(Мк. 2:1-12; Лк. 5:17-26)

1 Иисус хөлдүң ол чарыынче хемелиг эжиндирип кеже бергеш, Бодунуң чурттаан хоорайынче ээп келген ^a. 2 Ынчан элээн каш кижи Аңаа боттарының чартыктаан эжин дөжээниң кырынга ^b көдүрүп эккелген. Иисус оларның бүзүрелин көргеш ^c, чартыктаан кижиге: «Дидим бол, оглум! Бачыттарың өршээттинген-дир ^d» – дээн.

3 Ынчан ном-хоойлу тайылбырлакчыларының чамдыызы иштинде мынча деп бодаан: «Бо кижи Бурганны дорамчылааны ол!» ^e

4 Иисус оларның бодалдарын билир болгаш, мынча дээн: «Силерниң чүректериңерде чүге ындыг бак сагыш барыл? 5 Чүү беленил? „Бачыттарың өршээттинген-дир“– дээри бе азы: „Туруп келгеш, чорувут“– дээри бе? 6 Ынчаарга Кижи амытан Оглу чер кырынга бачыттарны өршээр эргелиг дээрзин билип алыңар...» – Иисус ынчан чартыктаан кижиге мынча дээн: «Туруп келгеш, дөжээңни алгаш, бажыңыңче чорувут». 7 Ол кижи туруп келгеш, бажыңынче чорупкан. 8 Чыылган чон ону көргеш, коргуп-сүртеп, ындыг эрге-чагырганы кижи амытанга хайырлаан Бурганны алдаржыдып турган.

Иисустуң Матфей Левийни кый дээни

(Мк. 2:13-17; Лк. 5:27-32)

9 Иисус ол черден ыңай чорупкаш, Матфей дээр кижини көрүп каан. Ол кижи үндүрүг хавырар черинге бодунуң ажылын кылып олурган. Иисус аңаа: «Мени эдерип чорувут» – деп чугаалаан. Матфей туруп келгеш, Ону эдерип чорупкан.

10 Ооң соонда Иисус бир-ле катап Матфейниң бажыңынга чемненип олурда, аңаа хөй үндүрүг хавырыкчылары база өске-даа бачыттыг кижилер чыглып келген. Олар Иисус болгаш Ооң өөреникчилери-биле кады чемненгеннер. 11 Фарисейлер ону көргеш, Иисустуң өөреникчилеринден: «Силерниң Башкыңар чүге үндүрүг хавырыкчылары-биле база бачыттыг улус-биле кады чемненип олурарыл?» – деп айтырганнар ^f.

12 Ону дыңнап кааш, Иисус мынча дээн: «Эмчи кадык эвес, а аарыг улуска херек болгай. 13 Баргаш: „Өргүлдү эвес, энерелдиг бооруңарны күзеп тур мен“ ^g – дээн сөстерниң утказын билип алыңар. Мен бо делегейге „Актыг, бачыт чок бис“дээр улусту эвес ^h, а бачыттыг улусту кый дээр дээш келген мен! ⁱ»

Шээрленириниң дугайында

(Мк. 2:18-22; Лк. 5:33-39)

14 Ооң соонда Иисуска Иоанның өөреникчилери ^j келгеш: «Чүге бис база фарисейлер үргүлчү шээрленир улус бис ^k, а Силерниң өөреникчилериңер чүге шуут ынчанмазыл?» – деп айтырыг салганнар. 15 Иисус оларга мынча деп харыылаан: «Күдээ оол олар-биле кады турар шагда, куда доюнга ооң эштери оолдар кудараар деп бе? ^l Ынчалза-даа күдээ оолду олардан чарып аппаар хүннер чедип кээр ^m, чогум-на ынчан олар шээрлени бээр.

16 Кым-даа эрги хепке чаа пөстен чамашкы салбас, ынчаар болза, чамашкы эрги пөстү чыырылдыр тыртыптар, а ойбак оон-даа улуг апаар. 17 Кым-даа чаа дүшкен араганы эрги көгээржикче кутпас. Ынчаар болза, чаа арага көгээржикти деже тептер, ынчан арага-даа төктүп каар, көгээржик-даа сандан үнер. Чаа араганы чаа көгээржикче кудар херек, ынчан арага-даа, көгээржик-даа бүдүн-бүрүн артар».

Дарганың уруун диргискени болгаш аарыг херээженни экирткени

(Мк. 5:21-43; Лк. 8:40-56)

18 Иисус олар-биле чугаалажып турда, Аңаа бир дарга кижи чедип келгеш, дис кырынга олуруп, мөгейгеш: «Мээң уруум өлүрүнүң кырында тур, ынчалза-даа Силер чедип келгеш, холуңарны аңаа дегзип көрүңер – ол дириг артар» – дээн. 19 Иисус өөреникчилери-биле кады ону эдерип чорупкан.

20 Хенертен он ийи чыл дургузунда ханы төктүп аараан херээжен кижи Иисустуң артындан чедип келгеш, Ооң хевиниң ужунга дээй каапкан ⁿ. 21 Ол иштинде: «Ооң оода-ла хевинге дээпсимзе, экирий бээр боор мен» – деп бодаан ^o. 22 Иисус эргилгеш, ону көрүп кааш: «Кызым, дидим бол! Бүзүрелиң сени экиртип-камгалап кагды» ^p – дээн. Шак ол өйден бээр демги херээжен кадык апарган.

23 Иисус дарганың бажыңынче кирип келгеш, шоор ойнакчыларын ^{▼▼ Ол үениң иудейлеринге хөөржүдүлге ёзулалын шоорга ойнап үдээр чаңчыл турган хире.} база аймап-хөлзээн чонну көрүп каан. 24 Ол: «Үнүп чоруңар! Бо уруг өлбээн, а удуп чыдар кижи ышкажыл ^r» – дээн. Ынчаарга улус Ону кочулап эгелээн.

25 Хамык улусту албадап үндүрүптерге ^s, Иисус уругнуң өрээлинче киргеш, ооң холундан тудуп аарга ^t, ол туруп келген. 26 Болган чүүл дугайында дамчыыр чугаа ук черни бир кылдыр тарай берген.

Иисустуң ийи согур кижини база үнү чок кижини экирткени

27 Иисус оортан чоруптарга, ийи согур кижи Ону эдерип: «Давидтиң Оглу ^u, бисти кээргеп көрүңер!» – деп кыйгырып чораан ^v.

28 Иисус бажыңче кире бээрге, согурлар Аңаа чоокшулап келген. Ол: «Силерге Мээң дузалап шыдаарымга бүзүреп тур силер бе?» – деп айтырган.

Согурлар: «Ийе, Дээрги!» – деп харыылааннар.

29 Иисус ынчан оларның карактарынга деггеш: «Бүзүрелиңер аайы-биле ынчалдыр болгай аан» – дээн ^w. 30 Ол-ла дораан оларның карактары көре берген. А Иисус оларга: «Кым-даа Мени кымыл дээрзин билбес болзун» – деп аажок шыңгыы чагып каан ^x. 31 Ынчалза-даа ол ийи кижи чоруй баргаш, Ооң дугайында чугааны чоок-кавыга тарадыпкан ^y.

32 Олар оон чаа-ла чоруп турда, кезек улус Иисуска букшуураан, үнү чок кижи эккелген. 33 Букту үндүр сывырыптары билек, үнү чок кижи чугааланып эгелээн. Улус кайгап-харап: «Израильге ындыг чүвени улус кажан-даа көрбээн!» – дижип турган. 34 А фарисейлер: «Иисус буктарны оларның ноянының күжү-биле үндүр сывырып турар-дыр» – деп турганнар ^z.

Кадарчы чок хойлар

35 Иисус бүгү хоорайларны, суурларны эргий кезип, синагогаларга улусту өөредип, Дээрниң Чагыргазының дугайында Буянныг Медээни суртаалдап база кандыг-даа аарыг-аржыктан экиртип чораан.

36 Чыылган мөөң чонну көргеш, Иисус улусту кээргей берген ^aa, чүге дээрге олар, кадарчызы чок хойлар дег ^ab, канчаар-даа харык чок база могап-турупкан болганнар. 37 Ол өөреникчилеринге мынча дээн: «Ажаар дүжүт хөй, а ажылдаар улус эвээш-тир. 38 Ынчангаш дүжүт ажаалдазының Ээзинден дилеңер: Ол шөлдерже ажылдаар улустан ам-даа чорутсун ^ac».