Matthew 12:9-14
Када берген холдуг кижини экирткени
(Мк. 3:1-6; Лк. 6:6-11)
9Ол черден чорупкаш, Иисус демги фарисейлерниң синагогазынга кирип келген. 10Аңаа када берген холдуг кижи турган. Фарисейлер Иисустан: «Амыр-дыш хүнүнде улус экиртирин ыдыктыг хоойлу чөпшээрээр бе?» – деп айтырганнар. (Херек кырында олар Ону буруудадыр эвин бодап турганнар.) a 11Иисус оларга мынча деп харыылаан: «Силерниң кайы-бирээңер хойлуг турган, а оозу амыр-дыш хүнүнде оңгарже кире берген дижик. Ол баргаш, хоюн ушта тыртып албас чүве бе? 12А кижи хойдан оранчок үнелиг! b Ындыг болганда, амыр-дыш хүнүнде буян кылырын чөпшээрээн-дир». 13Иисус оон када берген холдуг кижиге: «Холуң бээр сун» – дээн. Ол холун сунуп бээрге, оозу ол дораан, өскези дег, кадык апарган c. 14А фарисейлер үнгеш, Иисусту канчап чок кылырын сүмележи бергеннер.
Copyright information for
TyvTUV