Mat 19 | TyvTUV | STEP | Чугаалап дооскаш, Иисус Галилеяны каггаш, Иордан хемниң ол чарыында Иудеяның черлеринче чорупкан.

‏ Matthew 19

Иисустуң өг-бүле тудары база чарлыышкын дугайында чугаалааны

(Мк. 10:1-12)

1 Чугаалап дооскаш, Иисус Галилеяны каггаш, Иордан хемниң ол чарыында Иудеяның черлеринче чорупкан. 2 Мөөң чон Ону эдерип чораан, а Ол аңаа улусту экиртип турган.

3 Чамдык фарисейлер Иисуска чедип келгеш, Ону шенээр сагыштыг, айтырыг салган: «Эр кижи кандыг-даа чылдагаан-биле кадайындан чарлып болур бе?»

4 Харыызынга Ол мынча дээн: «А силер Чаяакчы эң эгезинде эр биле кыс кижини чаяаган ^a дээнин номчувааныңар ол бе? 5 Оон мынча дээн болгай: „Эр кижи ада-иезин каапкаш, кадайы-биле катчы бээр, олар ам ийи эвес, а чаңгыс мага-бот апаар“ ^b. 6 Ынчангаш олар ам ийи эвес, а чаңгыс мага-бот боор-дур ^c. Бурганның каттыштырган чүвезин кижи чарып болбас ужурлуг ^d».

7 А олар Оон айтырыг салган: «Ынчаарга Моисей чүге эр кижиге кадайынга чарлыр дугайында бижик бергеш, ону чандырыптар деп чарлык болганыл?» ^e

8 «Чүректериңер доң дош боорга, Моисей силерге кадайларыңардан чарлырын чөпшээрээн-дир – деп, Иисус харыылаан. – Ынчалза-даа эгезинде ындыг эвес турган. 9 Кадайының самыыраанындан өске, кандыг-бир чылдагаан-биле оон чарылгаш, өске кадай алган кижи ашак-кадайның шынчы чоруун үрээни ол болур деп тур мен ^f» ^{▼▼ Өске бурунгу сөзүглелдерде бо сөстерге «Ашаандан чарылган херээженни кадайланып алган кижи база ашак-кадайның шынчы чоруун үрээни ол болур» деп сөстерни немээн (Лк. 16:18 көр).}.

10 А өөреникчилери Аңаа мынча дээн: «Кадайының мурнунга эр кижиниң хүлээлгелери ындыг боор болза, шуут өгленмээни дээре-дир оң!»

11 Иисус: «Мээң чугаалаан чүвемни шупту улус эвес, а чүгле Бурганның ындыг арга бергени улус хүлээп ап шыдаар ^h – деп харыылаан. – 12 Эр улустуң өг-бүле тудуп шыдавазында элээн каш чылдагаан бар: чамдык улус төрүмелинден эр чаяаны чок боор, чамдыктарын өске улус акталап каан боор, а чамдыызы Дээрниң Чагыргазы дээш өг-бүле тударындан ойталаар. Ону хүлээп ап шыдаар кижи хүлээп алгай аан!»

Иисустуң бичии уругларны алгап-йөрээгени

(Мк. 10:13-16; Лк. 18:15-17)

13 Ол үеде Иисус оларга холун дегзип, мөргүзүн дээш, бир улус Аңаа бичии уруглар эккелген. А Ооң өөреникчилери оларны эккелген улусту эрттирбейн турганнар. 14 Иисус ынчан мынча дээн: «Бичии уруглар Меңээ кээп турзун, оларга шаптыктап, эртерин хоруваңар! Дээрниң Чагыргазы олар ышкаш улустуу боор ⁱ». 15 Иисус оларга холун дээскеш, ол черден чоруй барган.

Иисус болгаш бай кижи

(Мк. 10:17-31; Лк. 18:18-30)

16 Бир кижи Иисуска чедип келгеш, айтырыг салган: «Башкы! ^{▼▼ Өске бурунгу сөзүглелдерде «Башкы» эвес, «Буянныг Башкы» деп бижээн (Мк. 10:17; Лк. 18:17 көр).} Мөңге амыдырал чедип аар дизимзе, мен кандыг буян кылыйн?» ^k

17 «Чүге буян дугайында Менден айтырдың? – деп, Иисус харыылаан. – Чүгле чаңгыс Бурган буянныг ^l. А мөңге амыдыралды алыр дизиңзе, Бурганның айтыышкыннарын сагып чор» ^m.

18 «А кандыгларын?» – деп, демгизи айтырган.

Иисус мынча дээн: «Кижи өлүрбе, кады чурттаан эжиңге өскерилбе, оорлава, мегелеп херечилеве, 19 ада-иеңни хүндүлеп чор, чаныңда кижиге бодуңга бодуң дег ынак бол» ⁿ.

20 Аныяк эр Аңаа: «Мен ол бүгүнү сагып келдим ^{▼▼ Өске бурунгу сөзүглелдерде «Бичиимден-не» деп сөстерни немээн.}. Меңээ ам чүү четпейн турары ол?» – дээн ^p.

21 Иисус аңаа мынча деп харыылаан: «Болбаазыраңгай кижи болуксазыңза ^q, хамык эт-хөреңгиңни барып садыпкаш, акшазын ядыыларга үлеп беривит ^r, ынчан дээрлерге эртине-байлактыг боор сен ^s. А ооң соонда келгеш, Мени эдерип чорувут».

22 Ол сөстерни дыңнааш, аныяк эр муңгаргай чорупкан, чүге дээрге ол аажок бай кижи турган. 23 Иисус ынчан Бодунуң өөреникчилеринге мынча дээн: «Алыс шынны силерге чугаалап тур мен: бай кижиге Дээрниң Чагыргазынче кирери дыка-ла берге! ^t 24 База катап чугаалаайн: бай кижиниң Бурганның Чагыргазынче киреринден тевениң тевене үдүн өттүр өде бээри белен».

25 Өөреникчилери ону дыңнааш, аажок кайгап: «Ынчаарга кым камгалалды ап шыдаарыл?» – деп айтырганнар.

26 Иисус оларже топтап көргеш, мынча дээн: «Кижи ону шыдавас, ынчалза-даа Бурганның шыдавас чүвези чок ^u».

27 Пётр ынчан Аңаа: «Көрүңер даан, бис хамык бар чүвевисти каапкаш, Силерни эдерип чоруптувус ^v. Ынчаарга биске ол дээш, чүү боорул?» – дээн.

28 А Иисус оларга мынча дээн: «Алыс шынны силерге чугаалап тур мен: ам кээр чаа делегейге Кижи амытан Оглу Бодунуң чайынналган дүжүлгезинге саадаптарга ^w, силер – мени эдерген улус – Израильдиң он ийи аймаан шиидери-биле он ийи дүжүлгеге олургулаптар силер ^x. 29 Мен дээш, бажыңнарын, ха-дуңмазын, ада-иезин ^{▼▼ Өске бурунгу сөзүглелдерде бо сөстерге «кадайын» деп сөстү немээн (Лк. 18:29-30 көр).}, ажы-төлүн азы черин кааптар кижи бүрүзү ^z оон чүс катап хөйнү алыр база мөңге амыдыралды салгап алыр.

30 Ынчалза-даа хөй ам баштайгылар бооп турарлар – сөөлгүлер апаар, а ам сөөлгүлер бооп турарлар – баштайгылар апаар» ^aa.