Mat 20 | TyvTUV | STEP | «Дээрниң Чагыргазы дараазында үлегерге дөмей болуп турар. Бир-ле кижи Бодунуң шөлүнге ажылдаар улус хөлезилээр дээш, эртен эрте үнүпкен.

‏ Matthew 20

Виноград шөлүнде ажылчыннар дугайында угаадыглыг чугаа

1 «Дээрниң Чагыргазы дараазында үлегерге дөмей болуп турар. Бир-ле кижи Бодунуң шөлүнге ажылдаар улус хөлезилээр дээш, эртен эрте үнүпкен. 2 Шөл ээзи ажылчыннарга хүнде бир мөңгүн чоос төлээр бооп дугуржуп алгаш, оларны виноград шөлүнче чорудупкан. 3 Хүн үнгенден бээр үш шак болганда, ол базаарже баргаш, чүнү-даа кылбайн турар өске улусту көрүп каан. 4 „Силер база мээң виноград шөлүмге барып ажылдаңар. Чогууру-биле төлээр мен“– деп, ол чугаалаан. Демги улус чорупкан. 5 А ээ кижи үш шак болгаш, оон база үш шак болгаш, базаарже барып, база-ла ынчаар кылгылаан. 6 Ажыл шагының төнеринге чедир бир шак артканда, ол ынаар база катап чеде бергеш, ында турар улусту көрүп кааш: „Чүге хүннү бадыр чүнү-даа кылбайн тур силер?“– деп айтырган. 7 Олар аңаа: „Бисти кым-даа хөлезилеп албады“– деп харыы бергеннер. Ээ кижи ол улуска: „Силер база виноград шөлүнче барыңар“– дээн.

8 Кежээ дүшкенде, шөл ээзи бодунуң ажыл башкарыкчызынга мынча дээн: „Ажылдааннарны чыггаш, оларның-биле сөөлүнде хөлезилээним улустан эгелээш, баштайгыларынга чедир санаш“ ^a. 9 Ээ кижиниң сөөлүнде хөлезилеп алган улузу келгеш, кижи бүрүзү бир мөңгүн чоосту ап үнген. 10 Баштай хөлезилеттинген улус ынчан оон-даа хөйнү алыр бис деп бодаан, ынчалза-даа олар база бир-бир мөңгүн чоос алган. 11 Төлевирин алгаш, олар виноград шөлүнүң ээзинге ажынып: 12 „Бо сөөлгү улус бир шак ажылдады, бис изиг хүн адаанга хүнзедир ажылдап келдивис, а силер оларны биске деңнээр-дир силер“– деп турганнар. 13 Ынчаарга ээ кижи оларның бирээзинге мынча деп харыылаан: „Мен сени хомудатпадым, өңнүк. Сен мээң-биле бир мөңгүн чооска дугуржуп алдың чоп. 14 Төлевириң алгаш, чорувут. А мен бо сөөлгү кижиге сеңээ бергеним хирени бериксеп тур мен. 15 Акшамны бодум баш билир эргем чок кижи мен бе? Азы мээң экииргээм дээш, адааргаарың ол бе?“

16 Шак ынчаар сөөлгүлер – баштайгылар, а баштайгылар – сөөлгүлер апаар ^b».

Иисустуң Бодунуң өлүмүнүң дугайында үшкү удаа чугаалааны

(Мк. 10:32-34; Лк. 18:31-34)

17 Иерусалимче бар чыткаш, Иисус он ийи элчинин улустан өскээр аппаргаш, оларга мынча дээн: 18 «Дыңнаңар, Иерусалимче чоокшулап кел чор бис. Аңаа Кижи амытан Оглун Бурганның дээди бараалгакчылары болгаш ном-хоойлу тайылбырлакчыларынга тудуп бериптер. Олар Ону өлүрер кылдыр шииткеш, 19 Ону дорамчылазын, эттеп-эриидезин база хере шапсын дээш, өске чоннар улузунга тудуп бериптер. Ынчалза-даа үшкү хүнде Ол катап дирлип кээр» ^c.

Иаков биле Иоанның дилээ

(Мк. 10:35-45)

20 Иисуска ооң соонда Зеведейниң кадайы оолдары-биле ^d кады келгеш, мөгейип бараалгааш, Оон бир чүве дилээн.

21 Иисус оон: «Чүнү күзеп турарыңар ол?» – деп айтырган.

Демги кадай мынча дээн: «Силерниң Чагыргаңарга ийи оглум: бирээзи – оң талаңарга, а өскези – солагай талаңарга оруп аарын аазап көрүңер ^e».

22 Иисус: «Чүнү дилеп турарыңарны билбес-тир силер. Мээң ам ижерим дашканы ^f ижип шыдаар силер бе?» ^{▼▼ Өске бурунгу сөзүглелдерде бо сөстерге «Мээң шыдажып эртерим дег, шак ындыг хилинчекти силер база шыдажып эртип шыдаар силер бе?» деп сөстерни немээн.} – деп харыылаан.

Олар: «Шыдаар бис» – дээннер.

23 Иисус оларга мынча дээн: «Мээң хилинчээмниң дашказын ижер силер, а кымның Мээң оң азы солагай таламга олурарын хайырлаары Менден хамаарышпас: аңаа Адамның айтып кааны улус орар».

24 Ону дыңнааш, арткан он элчин демги ийизинге хорадап үнген. 25 Ынчалза-даа Иисус оларны кый деп алгаш, мынча дээн: «Өске чоннарның чагырыкчылары боттарының улузун дарлап турарын, а даргалары оларны бастып турарын билир болгай силер. 26 А силерниң араңарга ындыг чүве турбазын! ^h Силерниң араңарда алдар-хүндүлүг болуксаар кижи бар болза, чалчаңар болзун ⁱ. 27 Силерниң араңарга бир дугаар болуксаан кижи бар болза, кулуңар болзун. 28 Чүге дээрге Кижи амытан Оглу база-ла улус Аңаа бараан болзун дээш эвес, харын Боду бараан боору-биле ^j база Бодунуң амы-тынының өртээ-биле хөй улусту хостап аар дээш келген болгай» ^k.

Ийи согур кижини экирткени

(Мк. 10:46-52; Лк. 18:35-43)

29 Иисус өөреникчилери-биле кады Иерихондан ^l чоруп турда, оларны мөөң чон эдерип чораан. 30 Орук кыдыынга орган ийи согур кижи оларның чаны-биле Иисустуң эртип бар чыдарын дыңнааш: «Дээрги! Давидтиң Оглу, бисти кээргеп көрүңер!» – деп алгыржып үнген ^m.

31 Улус согурларны кончуп: «Ыыттаваңар!» – деп соксадырга, олар оон-даа ыыткыр алгыржыр болган: «Дээрги! Давидтиң Оглу, бисти кээргеп көрүңер!»

32 Иисус доктаай дүшкеш, оларны кый депкен. Ол: «Менден чүнү кылып берзин деп күзеп тур силер?» – дээн.

33 Олар Аңаа: «Дээрги, бистиң карактарывыс көстүп келзин» – деп харыылааннар. 34 Иисус кээргей бергеш ⁿ, оларның карактарынга холун дээскен. Согурлар ол-ла дораан көре бергеш, Ону эдерип чорупканнар.