Mat 21 | TyvTUV | STEP | Олар Иерусалимге чоокшулап келгеш, Елеон дааның чанында Виффагия суурга чедип келгенде, Иисус ийи өөреникчизин бурунгаар айбылапкаш,

1 Олар Иерусалимге чоокшулап келгеш, Елеон дааның ^a чанында Виффагия суурга чедип келгенде, Иисус ийи өөреникчизин бурунгаар айбылапкаш, 2 оларга чагып каан: «Мурнуңарда суурже барыңар. Аңаа баргаш, ол дораан кыс элчигенни болгаш ооң чанында аныяк элчигенчигешти баглап каан турарын көрүп каар силер. Оларны чешкеш, Меңээ эккелиңер. 3 А кандыг-бир кижи силерден бир чүве айтырза: „Олар Дээргиге херек апарды“– деп харыылаңар. Оларны ээзи доп-дораан салыптар». 4 – 5 Медээчиниң аксы-биле:

«Сион-кыска мынча деңер ^b:
„Көр даан, Хааның сенче кел чыдыр.
Биче сеткилдиг Хааның элчиген, ажылчын элчиген оглу
мунуп алган кел чыдыр“» ^c – дээн сөстер ынчаар боттанганы ол ^d.

6 Өөреникчилер чоруткаш, бүгү чүвени Иисустуң чугаалаан аайы-биле кылганнар. 7 Олар элчигенчигешти иези-биле кады эккелгеш, хевин оларга чонай салгаш, Иисусту олуртупканнар. 8 Эңдерик хөй чон хевин Ооң мурнунда орукка дөжей сала берген ^e, а өскелери ыяш будуктарын сыккаш, орукка чада салып чораан. 9 Ооң мурнунга база соонга бар чыткан эңдерик хөй чон ыыткыр алгыржып турган:

«Осанна! ^{▼▼ Осанна – еврей дылда «Камгалап көрем» дээн (Ыд. ыр. 117:25 көр). Мында ол сөс иудейлерниң манап турары хаан – Мессияны алдаржыткан кыйгы кылдыр ажыглаттынган.} Давидтиң Оглунга ^g алдар-мактал!
Дээрги-Чаяакчының өмүнээзинден кел чыдар Кижи алгадып-йөрээтсин!
Осанна! Өрү дээрде Бурганга алдар-мактал!» ^h

10 Иисус Иерусалимче кирип кээрге, бүгү хоорай хөлзеп үнген. Улус: «Бо Кымыл?» – деп айтыржып турган. 11 А мөөң чон: «Бо дээрге Бурганның медээчизи ⁱ Галилеяның Назарет чурттуг Иисус-тур» – деп харыылаар болган.

Иисустуң садыгжыларны Бурганның өргээзинден үндүр ойлатканы

(Мк. 11:15-19; Лк. 19:45-48; Ин. 2:13-22)

12 Оон Иисус Бурганның өргээзиниң иштинче киргеш, ында садыг-наймаа кылып турган хамык улусту үндүр сывыртапкаш, акша солукчуларының столдарын болгаш көге-буга сатканнарның ^j баартактарын аңдара октагылапкан. 13 Иисус оларга мынча дээн: «Бижилгеде: „Мээң өргээм мөргүл өргээзи деп адаттырар“ деп бижиттинген болгай, а силер ону дээрбечилер уязы кылып алган-дыр силер!» ^k

14 Согур болгаш аскак-бүскек улус Бурганның өргээзинге Аңаа чедип кээрге, Ол аарыг улусту экиртип каан. 15 Бурганның дээди бараалгакчылары болгаш ном-хоойлу тайылбырлакчылары Ооң кылып турган кайгамчык чүүлдерин көргеш база Бурганның өргээзинде бичии уругларның: «Осанна!* Давидтиң Оглунга ^l алдар-мактал!» – деп алгыржып турарын дыңнааш, килеңней берип, 16 Аңаа: «Оларның чүү деп турарын дыңнап тур сен бе?!» – дээннер ^m.

Иисус оларга: «Ийе – деп харыылаан. – Силер Бижилгеде: „Бичии уруглар болгаш эмер чаштарның аксындан алдар-макталды үндүрүп аар сен“ дээнин кажан-даа номчувааныңар ол бе?» ⁿ

17 Иисус оон оларны каапкаш, хоорайдан Вифания суурже ^o чоруй баргаш, аңаа хонуп алган.

Кургап калган фига ыяжы

(Мк. 11:12-14, 20-24)

18 Эртенинде, хоорайже чанып ора, Иисус аштай берген ^p. 19 Орук кыдыында фига ыяжын көрүп кааш, Ол аңаа чеде берген, ынчалза-даа бүрүлерден өске чүнү-даа тыппаан ^q. Ол ынчан ыяшка: «Моон соңгаар сеңээ кажан-даа чимис үнмес болзун!» – дээн. Фига ыяжы дораан-на кургап калган.

20 Өөреникчилер ону көргеш, кайгап: «Фига ыяжы канчап ындыг дүрген кадып калды?» – деп айтырганнар.

21 Иисус мынча деп харыылаан: «Алыс шынны силерге чугаалап тур мен: бүзүрээр-ле, чигзинмес-ле болзуңарза, фига ыяжы-биле болган чүүлдү кылыр хамаанчок, бо дагга безин: „Турулгаш, далайже дүже бер!“– дээр болзуңарза, шак ынчаар бүде бээр ^r. 22 Бүзүрээр-ле болзуңарза, мөргүп тура, дилээн чүвеңерниң дөгерезин алыр силер» ^s.

Иисустуң эрге-чагыргазының дугайында айтырыг

(Мк. 11:27-33; Лк. 20:1-8)

23 Иисус Бурганның өргээзинче кирип келгеш, улусту өөреди бээрге, Бурганның дээди бараалгакчылары болгаш чоннуң баштыңнары Аңаа чедип келгеш, айтырыг салганнар: «Сен бо бүгүнү кандыг эрге-чагырга-биле кылып тур сен? Сеңээ ол эрге-чагырганы кым берди?» ^t

24 А Иисус оларга мынча деп харыылаан: «Мен база силерге бир айтырыг салыйн. Меңээ харыылаптар болзуңарза, силерниң айтырыыңарга база харыылаар мен. 25 Иоанның сугже сугар эргези ^u Бургандан келген бе азы кижилерден бе?»

Олар аразында сүмележи берген: «Бис: „Бургандан“– дизивиссе, Ол: „Ынчаарга силер чүге Иоаннга бүзүревээниңер ол?“ ^v – дээр болгай. 26 А: „Кижилерден“– дээр дээш, чондан коргар-дыр бис, чүге дээрге хамык улус Иоанны Бурганның медээчизи деп санаар болгай ^w». 27 Олар Иисуска: «Билбес-тир бис» – деп харыылааннар.

Ол ынчан мынча дээн: «Мен база бо бүгүнү кандыг эрге-чагырга-биле кылып турарымны силерге чугаалавас мен».

Ийи оолдуг ада дугайында угаадыглыг чугаа

28 «А ам мындыг чүүл дугайында чүү деп бодаар силер че? Ийи оолдуг бир кижи турган-дыр. Бирги оглунга баргаш, ол мынча дээн: „Оглум, бөгүн баргаш, виноград шөлүнге ажылдап көр“. 29 Оозу баштай: „Барбас мен“– дээн, а ооң соонда өскээр боданыпкаш, чорупкан. 30 Ачазы өске оглунга баргаш, база-ла ынча дээн. Демгизи: „Баар мен, дээрги“– деп харыылаза-даа, барбайн барган. 31 Оларның кайызы ачазының аайындан эртпээн-дир?»

Олар: «Биргизи» – деп харыылааннар.

Иисус ооң соонда оларга мынча дээн: «Алыс шынны силерге чугаалап тур мен: үндүрүг хавырыкчылары болгаш самыын-садар херээженнер Бурганның Чагыргазынче силерни мурнай кирер. 32 Чүге дээрге Иоанн силерге шын орук айтып, баштай чедип кээрге, силер аңаа бүзүревээн-дир силер. А олар Иоаннга бүзүрээн болгай ^x. Ол бүгүнү көргеш безин, дөмей-ле бачыдыңар миннип, Бурганче ээлбээн база аңаа бүзүревээн-дир силер».

Виноград шөлүнүң ээзиниң дугайында угаадыглыг чугаа

(Мк. 12:1-12; Лк. 20:9-19)

33 «Ам өске угаадыглыг чугаадан дыңнаңар. Бир кижи бодунуң ээлээн черинге виноград тарып алган ^y. Ол ону долгандыр кажаалааш, чимизин сы бастырар уургай каскаш, таңныылдаар суурга тудуп каан. Ооң соонда ол виноград шөлүн ажаакчыларга ачылалга берипкеш ^z, боду өске чуртче чоруй барган ^aa. 34 Дүжүт ажаар үе кээрге, ол бодунуң үлүүн алыр дээш, виноград ажаакчыларынче чалчаларын чорудупкан. 35 Ынчалза-даа олар ооң чалчаларын тудуп алгаш, бирээзин эттеп, өскезин өлүрүп кааннар, а үшкүзүн даш-биле соп каапканнар ^ab. 36 Шөл ээзи ынчан оон-даа хөй өске чалчаларын ыткан, ынчалза-даа виноград ажаакчылары оларны база шак ынчаар аажылааннар. 37 Адак соонда ээ кижи оларже бодунуң оглун чорудупкаш: „Мээң оглумну албан хүндүлеп көөрлер“– деп бодаан ^ac. 38 Ынчалза-даа виноград ажаакчылары ооң оглун көргеш: „Бо-даа салгакчызы-дыр! ^ad Ону өлүрүп каапкаш, өнчүзүн олчалап аалы“– дээннер. 39 Олар ону сегирип алгаш, виноград шөлүнден үндүре бергеш, өлүрүп кааннар ^ae. 40 Чүл че, шөлдүң ээзи чедип келгеш, виноград ажаакчыларын канчап кааптарыл?»

41 Олар Аңаа: «Ол хортаннарны каржызы-биле узуткааш, шөлүн дүжүт ажаар өйде ооң үлүүн бээр өске ажаакчыларга ачыладып каар» ^af – деп харыылааннар.

42 Иисус оларга мынча дээн: «Силер Бижилгеден номчувааныңар ол бе кай:

„Тудугжуларның херекчок дээш октапкан дажы
эң чугула даш апарган.
Дээрги-Чаяакчы ынчалдыр кылган,
ону көөрү биске кайгамчык-тыр!“ ^ag

43 Ынчангаш Бурганның Чагыргазын силерден хунаап аарын база „дүжүдүн“бээр чонга бериптерин силерге чугаалап тур мен. 44 Кым ол дашче кээп ужарыл, чуурулдур ужуп аар, а кымче ол даш кээп дүжерил ^ah ону чылча базып каар» ^{▼▼ Өске бурунгу сөзүглелдерде бо шүлүк таварышпайн турар.}.

45 Иисустуң угаадыглыг чугааларын дыңнааш, Бурганның дээди бараалгакчылары болгаш фарисейлер Ооң оларның дугайында чугаалап турарын билип кааннар. 46 Олар Иисусту тудуп хоругдаар деп барганнар, ынчалза-даа Ону Бурганның медээчизи деп хүлээп турар чондан кортканнар ^aj.