Mic 1 | TyvTUV | STEP | Дээрги-Чаяакчы Морешет чурттуг Михейге Иудеяның хааннары Иоафам, Ахаз болгаш Эзекия оларның чагырып турган чылдарында Бодунуң сөзүн ажыткан. Самария биле Иерусалим дугайында Михейниң көргени көстүүшкүн бо-дур .

‏ Micah 1

1 Дээрги-Чаяакчы Морешет чурттуг Михейге Иудеяның хааннары Иоафам, Ахаз болгаш Эзекия оларның чагырып турган чылдарында ^a Бодунуң сөзүн ажыткан. Самария биле Иерусалим дугайында Михейниң көргени көстүүшкүн бо-дур ^b.

Бурганның израиль чонну кезедири-биле чедип кээри

2 Бүгү аймак-чоннар, дыңнаңар ^c,
чер-делегей болгаш ону долган бүгү чүве, мону кичээнгейге алыңар! ^d
Дээрги-Бурган-Чаяакчы силерге удур херечи боор-дур,
Дээрги Бодунуң ыдыктыг өргээзинден чугаалаар-дыр ^e.
3 Көрүңер даан, Дээрги-Чаяакчы Бодунуң чурттап турар черинден үнүп ор ^f:
Ол куду бадып, черниң бедиктерин базып тур ^g.
4 Даглар Ооң будунуң адаанда эстип тур ^h, шынаалар чарлып тур,
олар отка эзилген чук дег, тейниң ийинден агып баткан суг дег апаар.

5 Иаковтуң салгалдарының кемниг херектери дээш,
израиль чоннуң бачыттары дээш ол бүгү болуп турар-дыр.
Израильдиң кем-буруузу кайыын тывылганыл?
Самариядан эвес бе?
Иудеяның дүрзү-бурганнарга тураскааткан бедик черлери кайдал?
Иерусалимде эвес бе?

6 «Ынчангаш Мен Самарияны хову-шөлде бузундулар оваазы кылып каар мен,
чүгле үнүш олуртурунга тааржыр чер кылып каар мен.
Хоорай ханазының даштарын шынааже дүжүр октап,
ооң таваан чанагаштап каар мен.
7 Ооң шупту даш көжээлери буза шаптырар,
ооң бүгү дүрзү-бурганнарын үрегдеп узуткаар мен ⁱ,
ооң шупту өргүл белектери отка өрттеттирер.
Самария ол өргүл белектерин самыын-садар херээженниң төлевири дег кылдыр ап турган болгай ^j,
ол белектер самыыраан улуска катап база төлевир апаар».

Иудеяның хоорайлары эжелеттирер

8 Самарияның буурааны дээш ыглап-сыктаар мен ^k,
качыгдалдан кызыл-даван, чанагаш улчуп чоруптар мен ^l,
шөө-бөрүлер ышкаш улуур мен,
страус куштар ышкаш хомудап ыглаар мен ^m.
9 Чүге дээрге Самарияның балыы эмнеттинмес-тир ⁿ,
ол балыгланыышкын Иудеяда чеде берген-дир,
Мээң чонумнуң хаалгазында, Иерусалимниң бодунда барган-дыр.
10 Иудейлер, кел чыдар кеземче дугайында Геф хоорайга чугаалаваңар ^o,
аңаа шуут ыглашпаңар.
Бет-Леафра суурга качыгдалдан довурак-доозунга боражып алыңар ^{▼▼ Еврей дылда ол хоорай-суурларның аттары оларның хуу-салымын айтып турар сөстер-биле үннешкек. Ол суурлар Иерусалимниң чоок-кавызынга турган.}.
11 Шафирниң чурттакчылары, бужартаан, шалдаң боттарыңар өскээр көжер силер;
Цаанда чурттап турар улус дезип үнүп шыдавас;
Бет-Эцелдиң чурттакчылары кажыыдап ыглажып турар,
олардан дуза ап шыдавас силер.
12 Мароттуң чурттакчылары эки медээлер манап чадааш, могап турупкан,
чүге дээрге Дээрги-Чаяакчының ыдыпкан айыыл-халавы
Иерусалимниң хаалгазында безин чедип келген-дир ^q.
13 Лахистиң ^r чурттакчылары, чүгүрүк аъттарыңарны дайынчы тергелерге кожуңар!
Израильдиң кемниг херектерин өттүнгеш,
силер Сион-кысты бачытче киирип каан силер.
14 Иудей чон, сен ам Морешет-Гефче чарлыышкынның белектерин чорудар сен.
Ахзив хоорай ^s Израильдиң хааннарының манаан идегелин мегелеп каар.
15 Морешаның чурттакчылары, Бурган силерже эжелекчи эккээр,
Израильдиң алдар-аттыг улузу Одолламда куйларже чаштынар ужурга таваржыр ^t.
16 Эргим ынак оолдарыңар дээш качыгдап,
бажыңар дүгүн чулуп, дас куш ышкаш тас апарыңар ^u,
чүге дээрге оларны силерден чарып, тудуп аппаар-дыр.