Micah 3
Төлеп чок чагырыкчылар болгаш бүдүү билирлер
1Мен ынчан: «Иаковтуң салгалының баштыңнары, израиль чоннуң чагырыкчылары, дыңнаңар!Чөптүг шииткелди билир ужурлуг эвес силер бе? a
2А силер – буянны көөр хөңнү чок, бузутка ынак,
кижилерниң кежин союп, эъдин сөөгүнден шылып турар улус-тур силер;
3мээң чонумнуң эъдин чип, кежин соя тыртып,
сөөктерин сыйып, чанчарылдыр үүрмектеп турар,
пашче каар дээн дег, эъдин доорап турар улус-тур силер! b» – дээн мен.
4Үе кээрге, олар Дээрги-Чаяакчыны кыйгырып, дуза дилээр,
а Ол харыылавас c.
Ол үеде Дээрги-Чаяакчы олардан үүлгеткен бузуду дээш хая көрнү бээр.
5Дээрги-Чаяакчы мынча дээн:
«Мээң чонумну будулдуруп турар бүдүү билирлерге хамаарыштыр d.
Силерни чемгерер улуска амыр-тайбың медеглээр-дир силер e,
а аъш-чем бербес улуска кыжанып, дайын чарлаар-дыр силер.
6Ол дээш, силерни көстүүшкүннер чок дүн сыырыптар,
өттүр билген медеглелдер чок дүмбейге бүргеттирер силер f.
Бурганның медээчилери дирткен силерниң кырыңарда хүн ажа бээр,
чырык хүн силерге караңгылай бээр g.
7Өттүр көөр улус ыядып каар, бүдүү билирлерниң ады баксыраар h;
силер шупту аксыңар хаап аар силер,
чүге дээрге Бурган силерге харыылавас».
8А мен болза Дээрги-Чаяакчының Сүлдези берген күшке,
шынныг чорукка болгаш дидим чорукка бүргеткен мен,
Иаковтуң салгалынга – ооң кемниг херээниң дугайында,
израиль чонга – ооң бачыдының дугайында i чугаалаар мен.
9Иаковтуң салгалының баштыңнары, израиль чоннуң чагырыкчылары, мону дыңнаңар!
Силер чөптүг шииткелди херекке албайн, бүгү шын чүвени хажыдып турар-дыр силер.
10Силер – Сионну өлүрүүшкүн-биле, Иерусалимни кемниг үүлгедиишкин-биле
тудуп тургузуп турар улус-тур силер! j
11Иерусалимниң баштыңнары хээли ап, шиидип турар-дыр k,
Бурганның бараалгакчылары төлевир ап, өөредип турар-дыр,
Бурганның медээчилери акша-мөңгүн ап, төлгелеп турар-дыр l.
Ооң кадында Дээрги-Чаяакчыга даянып:
«Дээрги-Чаяакчы бистиң аравыста эвес чүве бе?
Бисти айыыл-халап таварбас!» – дижирлер m.
12Ынчангаш силерниң хайыңар-биле Сионну шөл ышкаш аңдарып кааптар n,
Иерусалим бузундулар оваазы апаар,
Бурганның өргээзин туткан даг арга-ыяш үнген чер апаар o.
Copyright information for
TyvTUV