Micah 4
Дээрги-Чаяакчының даа
(Иса. 2:2-4)
1Сөөлгү хүннер кээрге, Дээрги-Чаяакчының өргээзи турар дагны Ол өске бүгү тейлер, даглардан бедидир тургузуп каар;өске аймактар ынаар чедип кээр,
2эңдерик чоннар аңаа чыглып кээр a.
Олар бот-боттарынга: «Барып, Дээрги-Чаяакчының даанче,
Иаковтуң Бурганының өргээзинче үне берээли b.
Бурган бисти Ооң оруктары-биле чоруурунга өөредип каар,
бис Ону эдерер бис» – дижир.
Сиондан ыдыктыг хоойлу дүжүп кээр,
Иерусалимден Дээрги-Чаяакчының сөзү тараар.
3Аймактарның херээн Ол шиитпирлээр,
ырак чурттарда күштүг чоннарның чаргы-чаалызын Ол үзер.
Олар боттарының хылыштарын андазыннарже,
чыдаларын – хол кадыырларынче эде соп кылып аар c.
Бир чон өске чонга удур хылыш көдүрбес,
олар моон соңгаар дайын чорударынга өөренмес d.
4Кижи бүрүзү бодунуң виноградын, бодунуң фига ыяжын
болбаазырадып, тайбың чурттаар e,
оларны моон соңгаар кым-даа коргудуп-дүвүретпес f,
чүге дээрге Аг-шериглиг Дээрги-Чаяакчы ынча деп чугаалаан болгай.
5Бүгү өске чоннар боттарының бурганнарының аайы-биле чурттап турар g,
а бис кезээ мөңгеде Бурганывыс Дээрги-Чаяакчының аайы-биле чурттаар бис.
Дээрги-Чаяакчының бодалы
6«Ол хүн Мен аскак-бүскек чонну чыыптар мен – деп, Дээрги-Чаяакчы медеглээн. –Шөлүттүрген улусту, Мээң оларже айыыл-халап ытканым улусту
чыглыр кылыптар мен h.
7Аскак-бүскек чондан Израильдиң артынчызын тургузар мен,
ойлаттырган улусту күштүг чон кылып каар мен.
Шак ол хүнден эгелээш, Дээрги-Чаяакчы мен оларны
Сион дагдан кезээ мөңгеде чагырар мен.
8А сеңээ хамаарыштыр, Сион тей.
Сен Бурганның Бодунуң чонун, кадарчы кижи кодан малын хайгаарааны дег,
көрүп турар суургазы сен.
Биеэги эрге-чагыргаң сенче эглип кээр,
Иерусалимге катап база күрүне доктаап турар.
9Сен чүү дээш алгырып тур сен? Хааның чок чүве бе? i
Сээң чөвүлекчиң чок апарган бе?
Божуп чыдар херээжен дег, аарышкыга алзып чооруң ол? j
10Сион-кыс, божуп чыдар херээжен дег, хилинчектенип, човуурта,
чүге дээрге сен ам хоорайны каапкаш, ажык шөлге турумчуп аар сен,
Вавилонче чеде бээр сен k.
Ооң соонда аңаа камгалал алыр сен,
Дээрги-Чаяакчы сени аңаа дайзыннар холундан хостап аар.
11Ам сеңээ удур хөй чоннар чыглып келгеш:
„Ол бужартазын! Бистиң карактарывыс Сионнуң буураарын
мага хандыр көрүп алзын!“– дижип турар-дыр.
12Ынчалза-даа ол чоннар Дээрги-Чаяакчының бодалдарын билбейн турар-дыр l.
Бурган оларны тараа шаңынга моожалар дег чыып алган,
а олар Ооң бодаан чүүлүн угаап билбээн-дир.
13Көдүрлүп келгеш, ол моожаларны таптай бастыр-ла, Сион-кыс;
Мен сени демир мыйыстыг m, хүлер дуюгларлыг буга дег кылып каар мен,
хөй чоннарны чылча шавар сен.
Оларның эт-хөреңгизин Дээрги-Чаяакчыга,
оларның байлаан – бүгү чер-делегейниң Чагырыкчызынга бараалгадыр сен n».
Copyright information for
TyvTUV