Mic 5 | TyvTUV | STEP | Аг-шериглиг хоорай, аг-шерииңни белеткеп ал, бис бүзээлеттирип алган-дыр бис. Израильдиң баштыңы чаагынче шыкпыыш-биле соктурар-дыр.

‏ Micah 5

Вифлеемге төрүттүнер ужурлуг чагырыкчы

1 Аг-шериглиг хоорай, аг-шерииңни белеткеп ал, бис бүзээлеттирип алган-дыр бис.
Израильдиң баштыңы чаагынче шыкпыыш-биле соктурар-дыр.

2 «А сен, Вифлеем-Эфрата ^{▼▼ Эфрата – Вифлеем хоорайны эфрат деп бир төрел бөлүк улус ээлеп турган. Давид хаан ол хоорайга төрүттүнген чүве-дир (Руф 1:2; 1 Хаан. 17:12; 1 Чыл. 2:50-51 көр).},
Иудеяның төрел бөлүктериниң аразында чөгенчиг суур-даа болзуңза,
Израильдиң чагырыкчызы апаар кижи сенден үнүп ^b, Мээңии боор-дур.
Ооң ызыгууру эрте-бурун шагда, үе-дүпте-ле укталган-дыр».

3 Бурган израиль чонну кезек үеде кааптар.
А иштиг херээжен демги чаш төлдү божуп аарга,
израиль чонче оларның арткан ха-дуңмазы ээп кээр.
4 Израильдиң чагырыкчызы туруп келгеш,
коданын Дээрги-Чаяакчының күжү-биле,
бодунуң Бурганы Дээрги-Чаяакчының алдарлыг ады-биле кадарар ^c.
Чон ынчан айыыл чок чурттаар ^d,
чүге дээрге чагырыкчының өндүр ат-алдары чер-делегейниң ужу-кыдыынга чедир нептерээр ^e.
5 Чагырыкчы чонга амыр-тайбыңны хайырлаар ^f.

Бистиң чуртувусче ассирийлер кирип келгеш,
ордуларывысты таптаар болза,
оларга удур чеди азы сес баштыңчыны көдүрер бис.
6 Олар Ассирияның черин хылыш-биле чагырар,
Нимродтуң ^{▼▼ Нимрод – Ассирияның найысылалы Ниневияның үндезилекчизи (Э. д. 10:8-12 көр).} черин хынындан ужулган хылыш-биле ^{▼▼ Азы: «Ооң бодунуң хаалгазынга».} чагырар.
Бир эвес ассирий аг-шериг чуртувустуң кызыгаарын үреп кирип кээр болза,
чагырыкчывыс бисти Ассириядан камгалаар.

7 Израиль чоннуң артынчызы хөй чоннар аразынга
Дээрги-Чаяакчының дүжүргени шалың, оът-сигенде элбек чаъс-чайык суу дег боор;
олар улуска идегевес, кижи амытанга ынанмас.
8 Израиль чоннуң артынчызы өске чоннар аразынга,
хөй аймактар аразынга черлик аң-мең аразында арзылаң дег,
кодан хойлар аразында аныяк арзылаң дег болур –
ол халып үнгеш, оларны кемдедип, үзе-чаза тыртар,
кым-даа оон адырып шыдавас.
9 Сээң холуң дайзыннарыңга удур көдүрлүр,
сээң бүгү өжээтеннериң кырдырып аар.

10 «Ол хүн сээң аъттарыңны узуткап,
дайынчы тергелериңни үреп каар мен ⁱ – деп, Дээрги-Чаяакчы медеглээн. –
11 Сээң чериңде хоорайларны узуткап, бүгү шивээлериңни үреп бузуп каар мен ^j.
12 Караң көрнүр чорууңну узуткап каар мен –
чонуңнуң аразынга төлгелээр улус артпас ^k.
13 Сээң дүрзү-бурганнарыңны, ыдыктыг көжээлериңни узуткап каар мен –
бодуңнуң холуң-биле кылып алган чүүлдериңге моон соңгаар мөгейбес сен ^l.
14 Ашера бурганга тураскааткан адагаштарны тура тыртып ^m,
сээң хоорайларыңны үреп бузуп каар мен.
15 Мени тооп дыңнавайн барган чоннарга килеңнеп,
ажынып-хорадап, олардан өжээн негээр мен».