Mic 6 | TyvTUV | STEP | Дээрги-Чаяакчының чугаалаар чүвезин дыңнаңар. Чон база туруп келгеш, дагларның мурнунга херээн чугаалазын, тейлер ооң сөзүн дыңназын.

‏ Micah 6

Дээрги-Чаяакчының израиль чон-биле чаргызы

1 Дээрги-Чаяакчының чугаалаар чүвезин дыңнаңар. Чон база туруп келгеш, дагларның мурнунга херээн чугаалазын,
тейлер ооң сөзүн дыңназын.
2 Даглар, чер-делегейниң быжыг үндезиннери,
Дээрги-Чаяакчының чаргызын дыңнаңар ^a.
Чүге дээрге Ол Бодунуң чону-биле чаргылдажып турар-дыр ^b,
Израиль-биле Ол маргыжып турар-дыр:

3 «Мээң чонум, сени Мен канчапкан мен?
Чүнүң-биле сээң шыдамыыңны шенедим? ^c
Меңээ харыылап көр.
4 Мен сени египет черден үндүре берген мен,
кулданыышкындан хостап каан мен.
Моисей, Аарон болгаш Мариам оларны сени баштаар кылдыр чоруткан мен ^d.
5 Мээң чонум, Моавтың хааны Валактың чүнү бодап алганын,
Беорнуң оглу Валаамның аңаа чүү деп харыылаанын сактып кел ^e,
Ситтимден Галгалга чедир орууңну ^{▼▼ Ситтим биле Галгал – Ханаанче кирерде израильчилерниң турлаглары (Иис. 3:1; 4:20 көр).} бодап кел.
Дээрги-Чаяакчының чөптүг херектерин билип алыңар».

6 Чүнүң-биле Дээрги-Чаяакчының мурнунга кээр мен,
Дээди Өрүкү Бурганның мурнунга чүнүң-биле кээп мөгеер мен?
Ооң мурнунга бүрүн өрттедир өргүлдерлиг,
бир харлыг бызааларлыг кээр мен бе? ^g
7 Муң-муң кошкарлар-биле, эмге-тикчок хемнер дег аккан олива үзү-биле
Дээрги-Чаяакчының күзелин хандырып болур бе?
Кем-буруум дээш Аңаа дун оглумну өргүүр мен бе,
сагыш-сеткилимниң бачыды дээш иштимден үнген үре-төлүмнү бээр мен бе? ^h

8 О, кижи амытан, Бурган сеңээ Ооң экизинер чүүлү чүдел дээрзин чугаалап каан ийик.
Дээрги-Чаяакчы сенден чүнү негеп турар ийик ⁱ:
ажыл-херектериңге чөптүг бооруңну,
энерел көргүзеринче чүткүлдүг бооруңну болгаш
Бурганыңның мурнунга томаарып чурттаарыңны эвес чүве бе? ^j

Израильдиң кем-буруузу болгаш кеземчези

9 Дээрги-Чаяакчы хоорайны кыйгырып тур
(мерген угаан дээрге Сээң адыңдан коргары болгай):
«Чагырга мергезин база ону тургузуп каан Бурганны тооп дыңнаңар ^{▼▼ Бо домактың утказы эки билдинмес. Болгу дег өске утказы мындыг: «Хоорайда чыылган улус-чон, дыңнаңар!»}.
10 Бузуттуг улустуң бажыңында байлакты
багай үүлгедиг-биле чедип алган эвес чүве бе? ^l
Эвээжедип каан, каргаттырган хемчээл ажыглап турар эвес чүве бе? ^m
11 Шын эвес деңзилер, меге хемчээлдер ажыглаар кижини агартыр мен бе? ⁿ
12 Сээң байларың каржы-дошкун-дур ^o,
чурттакчыларың меге чүве чугаалаар-дыр,
оларның аксындан чүгле меге үнер-дир ^p.
13 Ол дээш, Мен сээң когуң үзүп эгелээн мен,
бачыттарың дээш сени хоозурадып эгелээн мен.
14 Чемненгеш-даа, тотпас сен, ишти-хырның куруг болур ^q;
чыып шыгжааш-даа, камнап ап шыдавас сен:
камнап шыдаптар-даа болзуңза,
ол чүвеңни хылышка хүлээдип бээр мен.
15 Тарып олурткаш-даа, дүжүт ажаап албас сен,
оливкаларны сыскыргаш-даа, үзү-биле чагдынмас сен;
виноград чулуун сы баскаш-даа, арага ишпес сен ^r.
16 Омри хаанның чаңчылдарын,
Ахав хаанның өг-бүлезиниң бүгү бузуттуг херектерин
хевээр арттырып алган сен,
оларның сүмелерин ёзугаар кылып турган сен ^s.
Ынчангаш Мен хоорайны хоозуралга,
ооң чурттакчыларын – бак атка киреринге таварыштырар мен;
силер өске чоннарның дорамчылалынга таваржыр силер ^t».