Mic 7 | TyvTUV | STEP | Аа халак! Мен ам чайгы чимистерни чыып каапкан соонда, виноградты ажаап каапкан соонда келген кижи дег апардым – чипки дег чаңгыс-даа салбак кат чок, мээң чиксээрим чаңгыс-даа бышкан фига чимизи чок .

1 Аа халак! Мен ам чайгы чимистерни чыып каапкан соонда, виноградты ажаап каапкан соонда келген кижи дег апардым –
чипки дег чаңгыс-даа салбак кат чок,
мээң чиксээрим чаңгыс-даа бышкан фига чимизи чок ^a.
2 Чер кырында Бурганга бердинген кижилер артпаан,
улус аразында чөптүг кижилер чок ^b.
Бүгү улус хан төгер дээш кедег кылып турар,
кижи бүрүзү ха-дуңмазынга какпа-дузак салып турар ^c.
3 Оларның холдары бузут үүлгедир талазы-биле мергежээн;
чагырыкчы кижи белектер негеп турар,
шииткекчи хээли ап турар ^d,
бай-шыдалдыглар боттарының күзел-соруун албадап күүсеттирер –
олар шупту аразында дугуржулгалыг.
4 Оларның эң дээрези – тенниг хараган дег, эң чөптүү – тенниг бок үнүштен дора ^e.
Оларже медээчилериниң медеглеп турган хүнү келген-дир;
олар ам кеземчеге онаажыр, олар ам дүвүрелге алзыптар.

5 Өңнүүңерге бүзүревеңер, эжиңерге ынанмаңар.
Хойнуңда чыдар кадайың-биле безин оваарымчалыг чугаалаш ^f.
6 Чүге дээрге оглу адазын куду көөр-дүр,
уруу – авазынга, кенни – кунчуунга удурланыр-дыр,
кижиниң дайзыннары – ооң өг-бүлезинде боор-дур ^g.

7 А меңээ хамаарыштыр алыр болза, Дээрги-Чаяакчыже ынаныштыг көөр мен,
мээң Камгалакчым Бурганны манаар мен ^h.
Бурганым мени дыңнап каар.

Израильдиң катап тургустунары

8 Дайзыным, буурааным дээш өөрүве! ⁱ
Барып ушкан-даа болзумза, база катап туруп кээр мен ^j.
Караңгыда олурар-даа болзумза, Дээрги-Чаяакчы меңээ чырык апаар ^k.
9 Дээрги-Чаяакчының килеңин чүктээр ужурлуг мен,
чүге дээрге Аңаа удур бачыт үүлгеткен мен.
Бурган мээң таламда апарбаан шаанда,
меңээ болчуп эгелевээн шаанда, ындыг болур.
Оон Ол мени чырыкче үндүрүп каар ^l,
мен Ооң шынныын көрүп каар мен.
10 Дайзыным база ону көрүп каар;
меңээ: «Сээң Бурганың Дээрги-Чаяакчы кайыл?» – деп турган болгаш ^m,
ооң ады баксыраар.
Мен ооң кудумчуда малгаш дег таптадып турарын мага хандыр көөр мен ⁿ.

11 Иерусалим, сээң ханаларыңны тудар, кызыгаарларыңны делгемчидер хүн кээр.
12 Ол хүн улузуң Ассириядан-даа, Египеттиң хоорайларындан-даа,
Евфрат хемден-даа, далайлар, даглардан-даа сенче чедип кээр ^o.
13 А чер-делегей ооң чурттакчыларының үүлгедиглери дээш хоозуралга таваржыр.

Бурганның Израильге өршээлдии болгаш аңаа шынчызы

14 Бодуңнуң чонуңну шыкпыыжың-биле кадарып көрем ^p.
Сээң өнчүң болур кодан хой шырыштарда аңгы чурттап чоруур-дур,
а долгандыр дүжүткүр одар-белчиирлер бар-дыр.
Хойларың, шаг шаанда ышкаш,
Васан биле Галаад деп эки черлерге оъттазын ^q.
15 Египет черден үне берген үеңде ышкаш,
кайгамчык чүүлдериңни биске көргүзүп көрем ^r.

16 Өске чоннар ону көрүп кааш,
боттары чеже-даа күчү-күштүг болза, бак атка кирер ^s.
Олар аксын холу-биле дуглап аар ^t,
оларның кулактары дүлейлеп каар.
17 Олар, чылан ышкаш, черде соястаан курттар дег, довурак чылгаар ^u,
боттарының быжыглалдарындан сириңейнип союп үнүп кээр ^v,
бистиң Бурганывыс Дээрги-Чаяакчы сенче эглип кээр,
Сенден коргуп-сүртээр.

18 Сен ышкаш өске Бурган бар бе? ^w
Сен бачытты өршээп турар сен,
Бодуңнуң чонуңнуң артынчызының кем-буруузунче көрбейн турар сен.
Мөңгези-биле килеңневес-тир сен ^x,
чүге дээрге энерел көргүзери Сеңээ таарымчалыг-дыр ^y.
19 Бурганывыс, Сен биске база катап ээ-хайыралыг боор сен;
бистиң бачыттарывысты таптап кааптар сен,
бүгү кем-буруувусту дүп чок далайже октаптар сен ^z.
20 Бистиң ада-өгбевиске шаг шаанда даңгыраглааның дег ^aa,
Иаковтуң салгалынга шынчы боор сен,
Авраамның ук-салгалынга энерелдиг боор сен.