Nah 1 | TyvTUV | STEP | Бурганның Элкос чурттуг Наумга ажытканы өттүр билиишкин бижээн ном бо-дур. Мында Ниневия хоорай дугайында көстүүшкүн бижиттинген .

‏ Nahum 1

1 Бурганның Элкос чурттуг Наумга ажытканы өттүр билиишкин бижээн ном бо-дур. Мында Ниневия хоорай ^a дугайында көстүүшкүн бижиттинген ^b.

Дээрги-Чаяакчының Ниневияже килеңнээни

2 Дээрги-Чаяакчы – хүннээчел, өжээн негекчизи Бурган ^c.
Ол – өжээн негекчизи, Ол кедергей килеңнээн.
Дээрги-Чаяакчы Бодунуң дайзыннарындан өжээн негээр,
Ол Бодунуң өжээтеннеринге соксаал чок килеңнээр ^d.
3 Дээрги-Чаяакчы килеңин үр тудуп шыдаар,
ындыг-даа болза, Ооң күчү-күжү өндүр улуг,
Ол буруулугларны кеземче чок арттырбас ^e.
Хат-шуурган, казыргы Ону эдерип чоруур,
Ооң буду булуттарны, довурак ышкаш, базып чоруур ^f.
4 Ол далайны чемелээрге, далай кадып каар ^g, бүгү хемнер соглуп каар,
Васан биле Кармил деп дүжүткүр черлер кургап каар,
Ливан дагларының үнүжү оңа бээр ^h.
5 Ооң мурнунга даглар сирилээр, тейлер эстип чиде бээр ⁱ;
Ону көргеш, чер-делегей – өртемчей болгаш ооң бүгү чурттакчылары сириңейни бээр.
6 Ооң хорадаан сагыжынга удур кым туржуп шыдаарыл?
Ооң кыптыккан килеңин кым шыдажырыл? ^j
Ооң килеңи от дег чаттыларга, хаялар Ооң мурнунга буступ турар ^k.

7 Дээрги-Чаяакчы ачылыг, Ол – айыыл-халап хүнүнде шивээ-дир ^l.
Ол Оон хоргадал дилээн улусче сагыш салыр.
8 А Ниневия хоорайны Ол хөме алыр үер-биле узуткап каар.
Ооң дайзыннарын дүмбей караңгы бүргей аптар ^m.
9 Дайзыннар Дээрги-Чаяакчыга удур чүнү-даа бодап алган болза,
Ол оларны узуткап каар,
өжээтен ооң соонда катап көдүрлүп шыдавас.
10 Олар тенниг чадаң үнүштер дег ораажып ⁿ,
арагачылар дег эзирип каар,
кургаг оът-сиген дег, отка бүрүнү-биле чиртип аар ^o.
11 Дээрги-Чаяакчыга удур бак чүве үүлгедирин бодаар,
бузуттуг чүүл сүмелээр кижи сенден үндү чоп, Ниневия.
12 Дээрги-Чаяакчы: «Байдалы айыыл чок-даа болза база дыка хөй санныг-даа болза,
олар, кыргыдып-хыдыткаш, чиде бээр;
а сени, Иудея, Мен хилинчектеп-даа турган болзумза,
моон соңгаар ынчанмас мен.
13 Мен ам сээң мойнуңда дөңгүнү уштур мен ^p,
кинчи-бегиңни үзе тыртар мен» – дээн.

14 А сеңээ ^{▼▼ Сеңээ – Ассирия күрүнеге азы ооң хаанынга хамаарыштыр чугаалаан.} хамаарыштыр Дээрги-Чаяакчы:
«Моон соңгаар сээң адың эдилээн үре-салгал турбас.
Мен сээң бурганнарың өргээлеринде шуткуп,
чонуп алганың дүрзүлерни буза шавар мен,
чөгенчиг сеңээ чевег-хөөрден белеткеп каар мен» – дээн ^r.

15 Көр даан, даглар кезип буянныг медээ чедирикчизи,
амыр-тайбың медээлекчизи кылаштап кел чыдыр ^s:
«Иудея, бодуңнуң байырлалдарың демдеглеп байырла,
Бурганга даңгырактарың күүсет ^t.
Дүржок кижи сээң чериңче катап база чаза базып кирбес ^u –
ол бүрүнү-биле узуткаттырган» – дээн.