Nah 3 | TyvTUV | STEP | Ханга борашкан хоорай ат болур! Ону меге болгаш өлүрүүшкүн долган-дыр, ында үптээшкин соксаар ужур чок-тур.

‏ Nahum 3

Ниневия ат болур

1 Ханга борашкан хоорай ат болур! ^a Ону меге болгаш өлүрүүшкүн долган-дыр, ында үптээшкин соксаар ужур чок-тур.

2 Дыңнаңар! Кымчы дазылааны, дугуйлар даажы,
дүрген маңнаан аъттар шимээни,
дайынчы тергелерниң күштүг даажы дыңналып тур.
3 Аъттыг шериг дүрген шапкан, хылыштар кылаңнашкан, чыдалар чайынналган!
Өлүрткеннер эңдерик, мөчү-сөөктер овааланган, санаттынмас-даа ^b.
Улус өлүг мага-боттарга тептигип турар.
4 Ол бүгү – Ниневияның эмге-тикчок самыыраашкыны дээш кеземче-дир.
Ол дээрге аянныг чараш, илби-шидини билир,
бодунуң самыыраашкыны-биле чоннарны чагырып аар,
бодунуң илби-шидизи-биле аймактарны дуурайлап аар самыын херээжен-дир ^c.

5 «Мен сеңээ удур мен ^d – деп, Аг-шериглиг Дээрги-Чаяакчы медеглээн, –
Мен сээң хевиң эдээн арныңче өрү дүрүптер мен;
чоннарга сээң шалдаңыңны, күрүнелерге – бужарыңны көргүзер мен ^e.
6 Чүдек-бужар чүүлдү сенче хөме октап, бак көөр мен,
сени бүгү улус мурнунга бужартадыр тургузуптар мен.
7 Сени көрген кижи бүрүзү сенден дезип:
„Ниневия узуткаттырган-дыр, ооң ажыын ажып, кым ыглаарыл?“– дээр ^f.
Сени аргалаар кижини Мен кайыын тывар мен? ^g»

8 Нил хемде турар, долгандыр суглар аккан Фивы хоорайдан ^{▼▼ Фивы – чугула египет хоорай. Ону ассирийлер бистиң эрага чедир 663 чылда эжелеп алган.} дээре деп сен бе? ⁱ
Хем ол хоорайны камгалап, суг ооң ханазы бооп турду.
9 Эфиопия биле Египеттиң кедергей улуг күчү-күжүнге ол ооргаланып турду,
фут биле ливий чоннар ооң эвилелчилери бооп турду ^j.
10 Ындыг-даа болза, ол база туттуруп алган, өскээр көжүрткен ^k.
Ооң чаш ажы-төлүн кудумчулар белдирлеринде чылча шаап, өлүрүп каан ^l.
Ооң алдар-аттыг кижилерин дайзыннар аразында үлешкеш ^m,
шуптузун илчирбелеп бектеп алган.

11 Ниневия, сен база ындыг дашканы ижер сен ⁿ,
чаштынып, дайзындан камгалал дилээр сен.
12 Сээң бүгү шивээлериң чимизи бышкан фига ыяжынга дөмей апаар:
ооң чимизин тө силгиптер болза,
олар чиир дээн кижиниң аксынче дорт кире бээр.
13 Бодуңнуң шерииңче көрүп көр – кадайларзыг улус-тур ^o.
Сээң чериңниң хаалгазы дайзыннарга аңгайтыр ажыттынар,
а дээктерни от чиир.

14 Бүзээлел үезинде ижер сугдан курлавырлай узуп ал.
Дойдан хоюдуп, тууйбу кылырынга белеткенип ал.
Шивээлериң быжыгла!
15 Сени от сыырыптар, хылыш шанчып каар;
шартылаага чирткен ышкаш болур сен.

Шартылаа ышкаш өзүп-көвүдээн сен,
шерги ышкаш өзүп-көвүдээн сен!
16 Сээң садыгжыларың дээрде сылдыстардан хөй апарган-дыр,
ынчалза-даа олар шартылаа ышкаш,
эрги кежин солуп каапкаш, ужуп чоруй баар.
17 Сээң дүжүметтериң имилеме шартылаа дег,
сээң шериг баштыңнарың хээкчи мөөң шерги дег;
олар соок үеде ханаларга хоруп орар,
а хүн чылыдып кээрге, тарадыр ужа бээр,
а кайнаар дээрзин кым-даа билбес.

18 Ассирияның хааны, сээң томуйлаан чагырыкчыларың база
дээди дүжүметтериң мөңге уйгуга алзыптар.
Сээң чонуң дагларга тоо быдарай бээр,
оларны чыыр кижи чок болур.
19 Сээң балыың экиртинмес, сээң балыгланыышкының өлүмнүг ^p.
Сээң дугайыңда дыңнаан бүгү улус ол дээш адыш часкаар ^q,
чүге дээрге сээң соксаал чок каржы-дошкунуңну
боду көрүп эртпээн кижи бар бе?!