Neh 1 | TyvTUV | STEP | Гахалияның оглу Неемияның бижээн сөстери бо-дур. Чээрбиги чылда Кислев деп айда мен Сузы хоорайның ордузунга турган мен.

‏ Nehemiah 1

1 Гахалияның оглу ^a Неемияның бижээн сөстери бо-дур.

Неемияның мөргүлү

Чээрбиги чылда ^b Кислев деп айда ^c мен Сузы хоорайның ордузунга ^d турган мен. 2 Ынчан мээң Ананий дээр бир дуңмам ^e өске улус-биле кады Иудеядан чедип келген. Мен олардан туттуруушкундан ээп чана берген иудейлерниң дугайында база Иерусалимниң дугайында айтырган мен.

3 Олар меңээ: «Туттуруушкун соонда Иудеяже дедир чана берген улус ам ында улуг бергедээшкин, базындырыышкынга таваржып тур ^f. Дайзыннар Иерусалимниң ханазын үреп бускан, а хаалгаларын өрттедипкен-дир» – дээн ^g.

4 Ол бүгүнү дыңнап кааш, олуруп алгаш, ыглап бадырыпкан мен. Элээн каш хүн муңгарап, чем чивейн, дээрде саадаан Бурганның мурнунга мөргүп келдим. 5 Мен мынча деп мөргүп турдум: «О, дээрде саадаан Дээрги-Бурган-Чаяакчы! Өндүр улуг, сүртенчиг, чагыг-керээзинге шынчы Бурган, Сеңээ ынак, Сээң айтыышкыннарыңны тооп дыңнап турар улуска энерелдиг Бурган! ^h 6 Сээң кулааң кичээнгейлиг болуп, карааң ажык болуп ⁱ, чалчаларың болур израиль чон дээш дүне-хүндүс Сээң мурнуңда мөргүп турар чалчаң мээң мөргүлүмнү дыңнап көрем. Мен израильчилерниң Сеңээ удур үүлгеткен бачыттарын, ооң иштинде бодумнуң болгаш төрел бөлүүмнүң үүлгеткен бачыттарын миннип чугаалаайн ^j. 7 Бис Сээң мурнуңга улуг кем-буруулуг болган бис. Бодуңнуң чалчаң Моисейге берген айтыышкыннар, дүрүмнер болгаш хоойлуларыңны тооп дыңнавайн турган бис ^k.

8 Бодуңнуң чалчаң Моисейге айтыышкын берип, чугаалаан сөзүңнү бодап көрем: „Бир эвес Меңээ өскерлир болзуңарза, Мен силерни өске чоннар аразынга тарадып кааптар мен ^l. 9 А бир эвес Менче эглип кээп, Мээң айтыышкыннарымны күүседип, тооп дыңнаар болзуңарза, силерниң тоо быдарадып каапкан улузуңар чер-делегейниң ужу-кыдыында-даа турар болза, Мен силерни оортан чыып алгаш, Бодумнуң ат-алдарым турар кылдыр шилип алган черимче эккээр мен“ ^m.

10 Олар – Сээң чалчаларың-дыр, Сээң чонуң-дур. Сен оларны Бодуңнуң өндүр улуг күжүң-биле, күчүлүг холуң-биле адырып хостаан сен ⁿ. 11 О, Дээрги, Сээң кулааң чалчаң мээң мөргүлүмге база Сээң адыңны өөрүшкүлүг хүндүлээр чалчаларыңның мөргүлүнге кичээнгейлиг бооп көрзүн. Ам меңээ бо кижиниң кээргээр сеткилин чедип аар аргадан берип, чедиишкинден хайырлап көр». (Мен хаанның кундага тудукчузу ^o турган мен.)