Neh 12 | TyvTUV | STEP | Салафиилдиң оглу Зоровавел чагырыкчы-биле база дээди бараалгакчы Иисус-биле кады Иудеяже ээп келген Бурганның бараалгакчылары болгаш левиттер бо-дур . Серайя, Иеремия, Эзра,

‏ Nehemiah 12

Бурганның бараалгакчылары биле левиттер

1 Салафиилдиң оглу Зоровавел чагырыкчы-биле база дээди бараалгакчы Иисус-биле кады ^a Иудеяже ээп келген Бурганның бараалгакчылары болгаш левиттер бо-дур ^b. Серайя, Иеремия, Эзра, 2 Амария, Маллух, Хаттуш, 3 Шехания, Рехум, Меремот, 4 Аддо, Гиннетой, Авия, 5 Миямин, Маадия, Вилга, 6 Шемайя, Иегоиарив, Иедайя, 7 Саллу, Амок, Хелкия болгаш Иедайя. Олар болза Иисустуң үезинде Бурганның бараалгакчызы ха-дуңмазын баштап турган улус-тур.

8 Левиттер бо-дур: Иисус, Биннуй, Кадмиил, Шеревия, Иуда, Маттания. Маттания бодунуң ха-дуңмазы-биле Бурганны алгап-йөрээп ырлаары дээш харыылаар турган ^c. 9 Бакбукия биле Унний – оларның ха-дуңмазы – бараан болуушкун үезинде олар-биле дужааштыр турар турган.

10 Дээди бараалгакчы Иисус ^d Иоакимниң ачазы, Иоаким – Элиашивтиң ачазы, Элиашив – Иодайның ачазы, 11 Иодай – Ионафанның ачазы, Ионафан – Иаддуйнуң ачазы болур чүве-дир.
12 Иоакимниң үезинде Бурганның бараалгакчыларының төрел салгалдарының баштыңнары бо-дур:
Серайяның төрел салгалының баштыңы – Мерайя,
Иеремияның төрел салгалының баштыңы – Анания,
13 Эзраның төрел салгалының баштыңы – Мешуллам,
Амарияның төрел салгалының баштыңы – Иоханан,
14 Мелихунуң төрел салгалының баштыңы – Ионафан,
Шеванияның төрел салгалының баштыңы – Иосиф,
15 Харимниң төрел салгалының баштыңы – Адна,
Мерайоттуң төрел салгалының баштыңы – Хелкия,
16 Аддонуң төрел салгалының баштыңы – Захария ^e,
Гиннетоннуң төрел салгалының баштыңы – Мешуллам,
17 Авияның төрел салгалының баштыңы – Зихрий,
Миниамин болгаш Моадияның төрел салгалының баштыңы – Пилтай,
18 Вилганың төрел салгалының баштыңы – Шаммуй,
Шемайяның төрел салгалының баштыңы – Ионафан,
19 Иегоиаривтиң төрел салгалының баштыңы – Мафнай,
Иедайяның төрел салгалының баштыңы – Узий,
20 Саллайның төрел салгалының баштыңы – Каллай,
Амоктуң төрел салгалының баштыңы – Евер,
21 Хелкияның төрел салгалының баштыңы – Хашавия,
Иедайяның төрел салгалының баштыңы – Нафанаил.

22 Левиттерниң төрел салгалдар баштыңнарын Элиашив, Иодай, Иоханан ^f болгаш Иаддуй оларның үезинде даңзыже киир бижип каан. А Бурганның бараалгакчыларын – Персияның хааны Дарийниң чагырган үезинде бижип каан. 23 Левит төрел салгалдар баштыңнарын Элиашивтиң оглу Иохананның үезинге чедир чылдар бижилгезиниң номунче киир бижип каан. 24 Хашавия ^g, Шеревия ^h болгаш Кадмиилдиң оглу Иисус ⁱ левиттерниң баштыңнары бооп турган. Оларның ха-дуңмазының бир
бөлүү өске бөлүкке дужааштыр туруп алгаш, Бурганны алгап-йөрээп, алдаржыдып турган. Бурганның кижизи Давид хаан ынчаар доктааткан турган чүве-дир ^j.
25 Маттания, Бакбукия, Авдий, Мешуллам, Талмон, Аккув – өргээниң хаалгаларының чанында шыгжамыр черлери кадарар хүлээлгелиг хаалгачылар турган ^k. 26 Олар Иоседектиң оглунуң оглу, Иисустуң оглу ^l Иоакимниң үезинде база тус чер чагырыкчызы Неемия биле Бурганның бараалгакчызы, ном-хоойлу тайылбырлакчызы Эзраның үезинде чурттап турган.

Иерусалимниң ханазын Бурганга бараалгатканы

27 Иерусалимниң ханазын Бурганга бараалгадыр үе келгенде, хоорайже левиттерни оларның чурттап турган бүгү черлеринден кыйгыртып эккелген. Олар хананы Бурганга бараалгатканын өөрүшкүлүг байырлап, Ону алгап-мактаан, Аңаа өөрүп четтирген ырларны чадаган, чанзы болгаш кимвалдар-биле үдеп, күүседир ужурлуг турган ^m. 28 Ыраажылар оон ыңай Иерусалимниң чоок-кавызындан, Нетофа чанында суурлардан, 29 Бет-Гаггилгалдан, Гева биле Азмаветтиң девискээрлеринден чедип келген. (Ыраажылар Иерусалимниң чоок-кавызынга суурлар тудуп алган турган чүве-дир.) 30 Бурганның бараалгакчылары биле левиттер ыдыктанып-арыгланып алгаш ⁿ, улус-чонну, хаалгалар биле хананы арыглап каан.

31 Мен Иудеяның нояннарын ханаже үндүре бердим. Бурганны алгап-мактаары-биле база чыскаалып кылаштаары-биле ыраажыларның ийи улуг бөлүүн база тургузуп кагдым. Оларның бирээзи хананың кыры-биле оң талаже, Өдек хаалгазынче ^o чорупкан. 32 Ол ыраажыларның соо-биле Гошайя база Иудеяның нояннарының чартык кезии: 33 Азария, Эзра, Мешуллам, 34 Иуда, Вениамин, Шемайя болгаш Иеремия бар чыткан. 35 Оон ыңай трубалар туткан Бурганның элээн каш бараалгакчызы: Ионафанның оглу Захария (Ионафан – Шемайяның оглу, Шемайя – Маттанияның оглу, Маттания – Михейниң оглу, Михей – Заккурнуң оглу, Заккур – Асафтың оглу ^p болур чүве-дир) 36 база ооң ха-дуңмазы Шемайя, Азариил, Милалай, Гилалай, Маай, Нафанаил, Иуда болгаш Ананий бар чыткан. Олар Бурганның кижизи Давидтиң кылган хөгжүм херекселдерин ^q тудуп алгаш чораан. Ном-хоойлу тайылбырлакчызы Эзра чыскаалды баштап чораан. 37 Суг бажы хаалгазының ^r чанынга – ооң чиге дужунга олар Давидтиң Хоорайынче, хана кырынче тепкииштер дамчып көдүрлү бергеш, Давидтиң ордузунуң чаны-биле эрткеш, Суг хаалгазынче ^s чорупкан.

38 Ыраажыларның ийиги бөлүү өске талаже бар чыткан, мен чоннуң чартык кезии-биле ол ыраажыларның соондан хана кырлап чоруптувус. Суугу суургазының ^t чаны-биле Делгем ханаже ^u шиглей, 39 Эфрем хаалгазының ^v чаны-биле, Иешана хаалгазының ^{▼▼ Азы: «Эрги хаалганың» (Неем. 3:6 көр).}, Балык хаалгазының ^x, Хананел суургазының ^y, Меа суургазының чаны-биле Хой хаалгазынга ^z чедир кылаштааш, Таңныыл хаалгазының ^aa чанынга доктаай бердивис.

40 Ыраажыларның ийи бөлүү Бурганның өргээзиниң мурнунда турар черлерин ээлеп алган, мен биле даргаларның чартык кезии база. 41 Бис-биле кады трубалар туткан бараалгакчылар Элиаким, Маасея, Миниамин, Михей, Элиоенай, Захария, Анания олар, 42 оон ыңай Маасея, Шемайя, Элеазар, Узий, Иоханан, Малхия, Элам болгаш Эзер турган. Израхия баштаан ыраажылар дыңзыдыр ырлажып эгелээн. 43 Ол хүн улус-чон эңдерик хөй өргүлдер эккеп салып, өөрүп-хөглеп турган, чүге дээрге Бурган оларга өндүр улуг өөрүшкүнү хайырлаан болгай. Херээженнер, ажы-төл база өөрүп-хөглээн. Иерусалимде өөрүшкү-хөглелдиң шимээн-даажы кайы ырактан дыңналып турган.

Левиттер биле Бурганның бараалгакчыларын хандырар үлүглер

44 Ол хүн баштайгы чимистерниң, дүжүттүң оннуң бир кезээниң өргүлдерин Бурганның өргээзинге шыгжаар өрээлдерни харыылаар кижилерни томуйлап каан. Ол кижилер хоорайларны долгандыр турар шөлдерден ыдыктыг хоойлуда айытканын ёзугаар Бурганның бараалгакчылары биле левиттерге онаажыр үлүглерни шыгжамырларже чыыр ужурлуг турган, бараан болуушкун кылып турар Бурганның бараалгакчылары биле левиттер дээш, иудейлер өөрүп турган чүве-дир. 45 Бурганның бараалгакчылары биле левиттер боттарының Бурганынга бараан болуушкунун, арыглаашкын ёзулалын Давид хаанның, ооң оглу Соломоннуң айтыышкыннарын ёзугаар кылып турган. Ыраажылар биле хаалгачылар база ынчаар кылып турган. 46 Шаг шаанда, Давид биле Асафтың үезинде, ыраажыларның башкарыкчылары-даа, Бурганны алгап-йөрээген, Аңаа өөрүп четтирген ырлар-даа бар турган болгай ^ab.

47 Зоровавелдиң-даа, Неемияның-даа үезинде бүгү израильчилер ыраажылар биле хаалгачыларны хандырар үлүглерни оларга хүннүң-не берип турган. Ол ышкаш арткан левиттерге база ыдыктыг үлүглерни берип турган, а левиттер Аароннуң үре-салгалынга үлүглерни аңгылап берип турган ^ac.