‏ Nehemiah 13

1Ол хүн Моисейниң номун чонга дыңналдыр номчуурга ^a, ында мынча деп бижээни билдинген: «Аммон азы моав аймак-сөөктүг кижи Бурганга мөгеер ниитилелге кажан-даа каттыжып болбас ^b, 2чүге дээрге олар израильчилерге аъш-чем, суг бээринден ойталаан, харын израиль чонга каргыш салзын дээш, Валаамны хөлезилеп алган-дыр. Ынчалза-даа бистиң Бурганывыс ооң каргыжын йөрээл кылдыр хуулдурупкан» ^c. 3Ол хоойлуну дыңнап кааш, израильчилер өске аймак-чоннардан укталган улусту боттарындан аңгылап каапкан ^d.

4– 5А ооң мурнунда Бурганның бараалгакчызы Элиашив Бурганывыстың өргээзинде шыгжамыр-өрээлдер дээш харыысалгалыг кижи апарган ^e. Товия-биле ^f чоок эжишки турган болгаш, Элиашив аңаа улуг өрээл белеткеп берген. Ооң мурнунда ол өрээлге далган-тараа өргүлдери, чаагай чыттыг чүүлдер, өргээниң эт-херексели болгаш ыдыктыг хоойлуда айытканын ёзугаар ^g левиттер, ыраажылар, хаалгачыларга бээри көрдүнген тараа, чаа арага биле олива үзүнүң оннуң бир кезээ база Бурганның бараалгакчыларынга өргүл белектери шыгжаттынып турган.

6Ол бүгү болуп турда, мен Иерусалимге турбаан мен, чүге дээрге Вавилоннуң хааны Артаксеркстиң чагыргазының үжен ийиги чылында ^h мен хаанче чоруй барган турган мен. Элээн үе эрткенде, оон чөпшээрел дилеп алгаш, 7Иерусалимче ээп келген мен. Аңаа келгеш, Элиашивтиң бак үүлгедиг кылып, Бурганның өргээзиниң шөлүнге Товияга өрээл белеткеп бергенин дыңнап кагдым. 8Аажок килеңнээш, Товияның эт-хөреңгизин үндүр октапкан мен. 9Өрээлдерни арыглаарын дужаагаш ⁱ, Бурганның өргээзиниң эт-херекселин, далган-тараа өргүлүн болгаш чаагай чыттыг чүүлдерни катап база ынаар киирдирип кагдым.

10Оон ыңай левиттерни хандырары-биле көрдүнген үлүглерни улус-чоннуң оларга бербейн турарын билип кагдым ^j. Ынчангаш бараан болуушкун кылып турар левиттер биле ыраажылар боттарының шөлдеринче тарап чана берген болган. 11Дарга улусту чемелеп, олардан: «Чүге Бурганның өргээзинче сагыш салбайн тур силер? ^k» – деп айтырдым. Оон левиттерни чыып алгаш, ажыл-албан кылыр черлеринге тургузуп кагдым. 12Ынчан Иудеяның бүгү чону шыгжамырларже далган-тараа, чаа арага биле олива үзүнүң оннуң бир кезээн эккелген ^l. 13Шыгжамыр-өрээлдерни Бурганның бараалгакчызы Шелемияның, ном-хоойлу тайылбырлакчызы Садоктуң, левит Федайяның хайгааралынга дагзып, оларга дузалакчы кылдыр Маттанияның оглунуң оглу, Заккурнуң оглу Хананны томуйлап кагдым, чүге дээрге ол улус бүзүрелдиг деп санадып турган. Оларга ха-дуңмазы левиттерниң аразынга аъш-чем үлээр даалга берип каан мен.

14Бурганым, ол дээш мени бодап чоруп көрем, Сээң өргээң дээш база аңаа бараан болуушкуннар дээш кылган буянныг херектеримни балавайн көрем! ^m

Неемияның өске чаартылгалары

15Ол үеде мен Иудеяга мындыг чүүл көрдүм: улус амыр-дыш хүнүнде ⁿ оңгарларда виноград сыскырып турар, тараа моожаларын сөөртүп, элчигеннерге арага, виноград, фига болгаш өске-даа чүък-биле кады чүдүргеш, ол бүгүнү ыдыктыг хүнде Иерусалимче сөөртүп аппарып турар болду ^o. Амыр-дыш хүнүнде аъш-чем сатпазын оларга сагындырып каан мен. 16Иерусалимде турумчуп алган Тир чурттуг садыгжылар балык болгаш янзы-бүрү барааннар сөөртүп эккеп, амыр-дыш хүнүнде иудейлерге Иерусалимге садып турган. 17Мен Иудеяның ызыгууртан кижилерин чемелеп: «Чүге ындыг бузут үүлгедип, амыр-дыш хүнүн бужартадып турарыңар ол? 18Силерниң ада-өгбеңер база ынчаар кылып турган эвес чүве бе – Бурганывыс ол дээш бисче, бо хоорайже ол бүгү айыыл-халапты ыдыпкан эвес чүве бе? А ам израиль чонга удур Ооң оон-даа улуг килеңин кыптыктырып, амыр-дыш хүнүн бужартадып тур силер» – дээн мен.

19Ооң соонда, амыр-дыш хүнүнүң бүдүүзүнде, Иерусалимниң хаалгазының чанынга имир дүжүп кел чыдырда, эжиктерни хаап кааш, амыр-дыш хүнү эрте бергижеге чедир ажытпазын дужааган мен. Ол хүн кандыг-даа чүъктү хоорайже эрттирбес кылдыр, хаалга аксынга элээн каш кижи тургузуп каан мен. 20Бир-ийи катап садыгжылар, янзы-бүрү бараан садып турар улус Иерусалимниң даштынга хонган. 21А мен оларны сагындырып: «Чүге хана баарында хонуп тур силер? Бир эвес ам бир катап ынчаар болзуңарза, силерге удур күш ажыглаар мен» – дидим.

Оон соңгаар олар амыр-дыш хүнүнде келбес апарган. 22Мен оон левиттерге ыдыктанып-арыгланып алгаш ^p, амыр-дыш хүнүн ыдыктыг кылдыр арттырары-биле хаалганы барып кадарарын дужааган мен.

Бурганым, ол бүгү дээш, мени бодап чоруп көрем, Бодуңнуң өндүр улуг энерелдииң-биле мени кээргеп көрем! ^q

23Ол үеде мен азот, аммон болгаш моав херээженнер-биле кады чурттап турар иудейлер көрдүм ^r. 24Ынчангаш оларның ажы-төлүнүң чартык кезии азоттап азы өске чоннарның дылы-биле чугаалаар, еврейлеп чугаалап билбес болган. 25Мен ол иудейлерни чемелеп, оларже каргыш салып турдум. Чамдык эр улусту эттеп, бажының дүгүн чулуп-даа турдум. Бурганның ады-биле даңгыраглаарын албадап, оларга: «Силер боттарыңарның кыс уругларыңарны өске чоннарның эрлери-биле өглевес база оларның кыс уругларын оолдарыңарга кадай кылдар албас ужурлуг силер! ^s 26Шак ындыг чоруктар Израильдиң хааны Соломонну бачытче киирип каан эвес чүве бе? Хөй-ле чоннарда ол ышкаш хаан турбаан. Бурганы Соломонга ынак болган, Ол ону бүгү израильчилерниң хааны кылып каан. Ынчалзажок даштыкы кадайлары ону безин бачытче киирип каан болгай ^t. 27Бис ам силерге хамаарыштыр ол-ла бүгү коргунчуг бузутту үүлгедип, даштыкы херээженнерни кадай кылып ап ^u, Бурганывыска шынчыңарны үреп турарыңарны дыңнаар апаар бис бе?» – дээн мен.

28Бурганның дээди бараалгакчызы Элиашивтиң оглу Иодайның оолдарының бирээзи Хорон чурттуг Санаваллаттың ^v күдээзи апарган. Ынчангаш мен ону бодумдан сывырып чорудупкан мен.

29Бурганым, оларны бодап кээп, анаа эрттирбейн көрем ^w, чүге дээрге Сеңээ бараан болуушкунну болгаш Сээң бараалгакчылар, левиттерге чагыыңны бакка суккан улус-тур.

30Мен улус-чонну ынчалдыр бүгү-ле даштыкы салдардан арыглап, Бурганның бараалгакчылары биле левиттерниң бараан болуушкунун, кайыларының-даа ажыл-албанын катап тургузуп каан мен. 31Оон ыңай доктааттынган үеде өргүл бедигээжиниң оттулар ыяш-биле хандырылгазынче ^x, улустуң баштайгы чимистерни эккеп турарынче сагыш салып турган мен.

Бурганым, мени бодап, меңээ ачылыг бооп көрем! ^y