Neh 2 | TyvTUV | STEP | Нисан деп айда , Артаксеркс хаанның чагыргазының чээрбиги чылында хаанга арага кудар үе кээрге, мен ону сөңнедим. Ооң мурнунда мен кажан-даа хаанның мурнунга муңгаргай туруп көрбээн мен.

‏ Nehemiah 2

Хаанның Неемияны Иерусалимче салып чорутканы

1 Нисан деп айда ^a, Артаксеркс хаанның ^b чагыргазының чээрбиги чылында ^c хаанга арага кудар үе кээрге, мен ону сөңнедим. Ооң мурнунда мен кажан-даа хаанның мурнунга муңгаргай туруп көрбээн мен. 2 Ынчангаш хаан менден: «Аарыг эвес хиреңде, чүге муңгаргай сен? Сеткил-чүрээң сарынналга алзыпкан-дыр аа? ^d» – деп айтырган.

Мен аажок коргуп турзумза-даа, 3 хаанга мынча деп харыыладым: «Хаан мөңге назылазын! ^e Мээң ада-өгбемни хөөржүткен хоорай буступ калган чыдырда ^f, ооң хаалгазын от-биле өрттедипкенде ^g, арын-шырайым муңгаргай болбас харыым бар бе?»

4 Хаан ынчан менден: «Чүнү күзеп тур сен?» – деп айтырды.

Мен дээрде саадаан Бурганга мөргээш, 5 хаанга: «Бир эвес хаанымга таарымчалыг болза, бир эвес чалчаңарже ээ көрнүп турар болзуңарза, мени Иудеяже, мээң ада-өгбемни хөөржүткен хоорайже салып чорудуптуңар – мен ону катап тудуп каайн» – деп харыыладым.

6 Хаан ынчан (а ооң кадыны чанынга олурган чүве) менден: «Сээң чорууң кайы хире үр боорул, кажан ээп кээр сен?» – деп айтырды.

Хаанга мени салып чорудары таарымчалыг болган, мен ынчан ээп кээр хуусаамны айтып бердим.

7 Мен хаанга оон ыңай: «Бир эвес хаанга таарымчалыг болза, Евфрат хемниң барыын талазында тус черлер чагырыкчыларынга чагаалардан бижээш, меңээ берип кагзын – мен Иудеяга чеде бергижемче, олар мени эрттирип турзун ^h. 8 Хаанның арга-эзиминиң кадагалакчызы Асафка бижээн чагаадан база берзин – ол дарга меңээ Бурганның өргээзиниң чанында шивээниң хаалгазын, хоорай ханазын болгаш мээң чурттаар бажыңымны тударынга херек ыяш бээрин чөпшээрезин» – дээн мен.

Бурганымның буянныг холу мени кагбаан ⁱ, хаан дилээн чүвемни берген. 9 Мен Евфрат хемниң ындында черлерниң чагырыкчыларынга келгеш, хаанның чагааларын оларга берип кагдым. Хаан шериг баштыңнарын база аъттыг шериглерни мээң-биле кады чорудупкан турган. 10 Хорондан келген Санаваллат ^j биле аммон дүжүмет Товия ^k олар ол дугайында дыңнап кааш, кандыг-бир кижи израиль чоннуң чаагай чоруунче сагыш салып келген боорга ^l, аажок хорадап турган.

Неемияның Иерусалимниң ханазын хынап көргени

11 Мен Иерусалимге келгеш, үш хонган мен ^m. 12 Оон дүне каш кижи эдерткеш, үнүпкен мен. Бурганымның мени Иерусалим дээш кылыр кылдыр сагыш алындырган чүвезин кымга-даа чугаалавадым. Мунуп алгаш чораан элчигенимни санавас болза, менде кандыг-даа дириг амытан чок турган. 13 Дүне када мен Шынаа хаалгазын ⁿ дамчыштыр Улу деп суг бажының ^{▼▼ Азы: «Шөө-бөрүлер деп суг бажының».} база Өдек хаалгазының ^p чаны-биле эрте бердим. Иерусалимниң үрелген ханазын, өрттедипкен хаалгаларын көрүп чордум. 14 Оон Суг бажы хаалгазынга ^q, Хаан хөөлбээнге ^r келдим, ынчалза-даа ында мээң мунуп алган элчигеним эрте бээр хире чер чок болду. 15 Ол-ла дүне шынаалап өрү чоктааш, хананы улаштыр хынап көрүп чордум. Адак сөөлүнде дедир ээпкеш, Шынаа хаалгазын ^s дамчыштыр хоорайже ээп келдим. 16 Чоннуң даргалары мээң кайнаар барып чораанымны-даа, чүнү кылып турганымны-даа билбээн – чүге дээрге иудейлерге-даа, Бурганның бараалгакчыларынга-даа, ызыгууртаннарга-даа, даргаларга-даа, ол ажыл-херекти бүдүрер ужурлуг бүгү өске улуска-даа мен ам дээрезинде чүнү-даа чугаалаваан турган мен.

17 Оон мен оларга: «Байдалывыстың бергезин көрүп тур силер: Иерусалим бузундулар апарган чыдыр, а ооң хаалгаларын өрттедипкен-дир ^t. Барып, хоорайның ханазын катап тудуп каалы, моон соңгаар базындырбаалы ^u» – дээн мен.

18 Оларга оон ыңай Бурганымның меңээ ачы-буянныг болган холунуң дугайында, хаанның меңээ чүнү чугаалаанының дугайында чугаалап бердим. Олар: «Ындыг-дыр, тудаалы» – деп харыылааш, хей-аът кирип, буянныг үүле-херекти кылып эгелээн.

19 А Хорондан келген Санаваллат, аммон дүжүмет Товия ^v болгаш араб Гешем олар ону дыңнап кааш, бисти кочулап эгелээн. «Чүнү канчап турарыңар ол? Хаанга удур үймээн үндүрериңер ол бе? ^w» – деп, олар бисти дорамчылап турган.

20 Мен оларга: «Дээрде саадаан Бурган – чүгле Ол биске чедиишкин хайырлаар. Ооң чалчалары бис хоорайны катап тудуп эгелээр бис, а силерниң Иерусалимде хувааглыг чериңер-даа, ону ээлээр эргеңер-даа чок, аңаа силерниң адыңар-даа сагышка артпас!» – деп харыылаан мен.