Neh 4 | TyvTUV | STEP | Хананы катап тудуп турарывысты Санаваллат дыңнап кааш, ажынып, аажок анчыгзынган. Ол кижи иудейлерни дорамчылап кочулап,

‏ Nehemiah 4

Хананы катап тударынга удур хөделиишкин

1 Хананы катап тудуп турарывысты Санаваллат ^a дыңнап кааш, ажынып, аажок анчыгзынган. Ол кижи иудейлерни дорамчылап кочулап, 2 бодунуң эвилелчилериниң болгаш Самарияның ^b шерииниң мурнунга: «Чаржынчыг иудейлерниң бо чүнү канчап турары ол? Ханазын катап тудуп аар деп турары ол бе кай? Өргүлдер кылыры ол бе кай? Таанда олар тудуун чаңгыс хүнде доозуптар деп бе? Таанда олар бо оваалап каан довурактан ам отка чиртип каапкан даштар диргизери ол бе?» – деп турган.

3 Санаваллат-биле кады турган аммон Товия ^c: «Олар тудуг кылып де! Дилги безин оларның даш ханазынче үне халааш, бузуп кааптар» – дээн.

4 Бурганывыс, бисти тооп дыңнап көрем, бак көрдүрүп турарывыстың кончуун ^d. Дайзыннарывыстың бисти дорамчылаан кочузун оларның-на бажынче халдадып көрем ^e. Оларны өске черже тудуп аппаарга, олча апарзыннар! 5 Оларның кем-буруузун базырбайн көрем, оларның бачыдын Бодуңнуң карактарыңдан чайлатпайн көрем ^f, чүге дээрге тудугжуларны базымчалап турдулар.

6 Бис хананы тударын уламчылаан бис, ол бедииниң чартыы чедир туттуна берген, чүге дээрге чон ажылга чүрээниң ханызындан бердинип турган. 7 Ынчалза-даа Санаваллат, Товия, арабтар, аммоннар болгаш Азот хоорайның чурттакчылары Иерусалимниң ханазын катап тудар ажылдың шуудай бергенин, дежик черлер дуглаттынып турарын дыңнап кааш, аажок хорадай берген. 8 Олар шупту Иерусалимге удур дайылдажып баргаш, ону мөгүдедирин дугуржуп алган ^g. 9 А бис Бурганывыска мөргүп, ол айыылды чайладыр дээш, оларга удур дүне-даа, хүндүс-даа таңныылдар тургузуп турган бис.

10 А ол үеде иудейлер: «Дажыкчы ажылчыннарның шаг-шинээ төнүп тур, мында бок-сак дыка хөй-дүр, хана тудар харыывыс чок-тур» – дижип турган.

11 Ынчаарга бистиң дайзыннарывыс: «Олар чүү болуп турарын билип албаанда азы бисти көрүп кагбаанда, оларның ортузунче халдап киргеш, кыра шаап кааптаалы, ажыл-херекти ынчаар соксадыылы» – дишкен.

12 Дайзыннарывыстың чанынга чурттап турган иудейлер биске келгеш: «Олар бисче чурттап турар бүгү черлеринден халдап кээр» – деп он-даа катап чугаалаан ^{▼▼ Бо домактың утказы эки билдинмес. Болгу дег өске утказы мындыг: «...иудейлер бүгү черлерден биске келгеш: „Бисче ээп келиңер“– деп он-даа катап чугаалаан».}.

13 Ынчан мен хоорай ханазын дургаар эң чавыс болгаш ажык черлерге улус тургузуп кагдым. Оларны төрел салгалдар аайы-биле, хылыш, чыда болгаш ча-согуну-биле тургузуп кагдым. 14 Бүгү байдалды хынап көргеш, ызыгууртаннар, даргалар болгаш арткан чонга: «Дайзыннардан кортпаңар; өндүр улуг, сүртенчиг Дээргини утпайн сактыңар ⁱ, боттарыңарның ха-дуңмаңар дээш, оглу-кызыңар дээш, кадайларыңар дээш, бажың-балгадыңар дээш тулчуңар» – дээн мен.

15 Дайзыннарывыс оларның сүлчээзин билип каапканывысты база Бурган оларның бодалын үрей шаапканын дыңнап каан соонда, бис шупту ханаже, кижи бүрүзү бодунуң ажылынче ээп келген бис. 16 Ол хүнден эгелээш, мээң улузумнуң чартык кезии тудуг кылып ажылдап турган, а арткан чартык кезии чыда, дозуг-камгалал, ча-согун болгаш куяк хевин тудуп алгаш, белен турган. Шериг баштыңчылары бүгү иудей чоннуң артында турушту ээлеп алган. 17 Чон хананы тудуп турда, аар чүък дажыглаан улус бир холу-биле ажылын кылып, өске холу-биле ок-чепсээн тудуп алгаш турган. 18 Тудугжу бүрүзү хылыжын белинге астып алгаш, ажылдаан, а мээң чанымга медээ этсир кижи турган.

19 Мен ынчан ызыгууртаннар, даргалар болгаш арткан чонга: «Ажыл кончуг улуг, аажок хөй-дүр, хананы дургаар тарамык, бот-бодувустан ырак турар-дыр бис. 20 Труба үнү дыңнап кагзыңарза, ооң дыңналган черинче маңнап келиңер. Бурганывыс бистиң талавыска дайылдажыр! ^j» – дээн мен.

21 Ажылды ынчаар уламчылаан бис. Улустуң чартык кезии чыдаларын даң хаяазындан эгелээш, сылдыстар чырыгыжеге чедир холдан салбастаан. 22 Ол үеде мен чонга: «Тудугжу кижи бүрүзү, ооң чалчазы база, Иерусалимге хонуп ап турзун – олар дүне када бисти таңныылдазын, а хүндүс – ажылдазын» – дээн мен.

23 Мен-даа, мээң ха-дуңмам-даа, чалчаларым-даа, мээң-биле кады чоруур таңныылдар-даа хевивисти уштуп көрбээн бис; кижи бүрүзү ок-чепсээн холунга тудуп алган чоруур турган ^{▼▼ Бо домактың утказы эки билдинмес. Болгу дег өске утказы мындыг: «Кижи бүрүзү ок-чепсек болгаш суг ап чоруур турган».}.