Neh 9 | TyvTUV | STEP | Ол-ла айның чээрби дөртте бүгү израильчилер шээрленип, качыгдалдың самдар хевин кедип, баштарынче довурак-доозун чажып алган чыглып келген.

‏ Nehemiah 9

Чоннуң Бурганның мурнунга бодунуң бачыттарын билингени

1 Ол-ла айның ^a чээрби дөртте бүгү израильчилер шээрленип, качыгдалдың самдар хевин кедип, баштарынче довурак-доозун чажып алган ^b чыглып келген. 2 Израиль уктуг улус бүгү даштыкы улустан аңгыланы берген соонда ^c, олар туруп алгаш, боттарының бачыттарын, ада-өгбезиниң кемниг херектерин ажыы-биле миннип турган ^d. 3 Улус аңаа турган черлеринге артып каап, үш шак дургузунда боттарының Бурганы Дээрги-Чаяакчының хоойлузунуң номун номчуп, дараазында үш шак дургузунда бачыттарын миннип, боттарының Бурганы Дээрги-Чаяакчыга мөгейип турган. 4 Иисус, Бани, Кадмиил, Шевания, Вунний, Шеревия, Бани болгаш Хенани олар левиттерниң бедиктээжинче туруп алгаш, боттарының Бурганы Дээрги-Чаяакчыны дыңзыдыр кыйгырып эгелээн. 5 Оон левиттер – Иисус, Кадмиил, Бани, Хашавния, Шеревия, Годия, Шевания болгаш Петахия: «Боттарыңарның Бурганыңар Дээрги-Чаяакчыны мөңгеде алдаржыдыңар-ла! – дээннер. – Улус сээң алдарлыг, кандыг-даа алгаг-макталдан, алгыш-йөрээлден өндүр бедик адыңны алдаржытсын! 6 Дээрги-Чаяакчы, Сен чаңгыс сен! ^e Кудай-дээрни, эң бедик дээрлерни, оларның бүгү аг-шериин, черни болгаш ында бар бүгү чүвени, далайларны болгаш ында бар бүгү чүвени Сен чаяап каан сен! ^f Бүгү чүвеге амы-тынны хайырлап турар сен, дээрлерниң аг-шерии Сеңээ мөгейип турар.

7 Сен, Дээрги-Бурган-Чаяакчы, Аврамны шилип алгаш, ону халдей черде Ур хоорайдан үндүре бергеш ^g, Авраам деп адап каан сен. 8 Ооң чүрээ Сеңээ шынчы дээрзин көргеш ^h, ооң үре-салгалынга хананей, хет, амор, ферез, иевус, гергес чоннарның черин бериптер дээш, ооң-биле керээ чарып алган сен ⁱ. Ол сөзүңнү ээлээн-даа сен ^j, чүге дээрге чөптүг-шынныг-дыр сен!

9 Бистиң ада-өгбевистиң Египетке хилинчээн көрүп каан сен, оларның Кызыл далай чанынга дуза дилээн алгызын дыңнап каан сен ^k. 10 Сен фараонга удур, ооң бүгү дүжүметтеринге удур, ооң чуртунуң бүгү чонунга удур бадыткал демдектери биле кайгамчык чүүлдерни көргүскен сен ^l, чүге дээрге египетчилерниң Сээң чонуңну туразында аажылап келгенин билир турдуң. Сен алдаржаан сен, алдарлыг адың бөгүнге чедир дириг. 11 Сен далайны чонуңнуң мурнунга ийи чарыптарыңга, олар далайны кургаг чер кыры-биле эрте берген, а оларны сүрүп чораан улусту, ээрем сугже даш октааны дег, терең далайже дүжүрүпкен сен ^m. 12 Хүндүс оларны булут чагыдан, а дүне – оларның чоруур ужурлуг оруун чырыдар дээш – от чагыдан эдертип аппар чыткан сен ⁿ.

13 Сен дээрден Синай дагже дүжүп келгеш ^o, чонуң-биле чугаалажып турган сен. Оларга чөптүг шииткелдер, шынныг хоойлулар берген сен, ачылыг дүрүмнер, айтыышкыннар берген сен ^p. 14 Оларга Сеңээ тураскааткан амыр-дыш хүнүн айтып берип, Бодуңнуң чалчаң Моисейни дамчыштыр айтыышкыннар, дүрүмнер, хоойлуңну берген сен ^q. 15 Олар аштап турда, Сен хлебти дээрден бадырып берген сен ^r, суксап турда – сугну хаядан үндүр аксып берген сен ^s. Чонга бээр бооп даңгыраглаан чериңче барып, ээлеп аарын оларга чугаалаан сен ^t.

16 Оон бистиң ада-өгбевис турамык, чөрүү апарып, Сээң айтыышкыннарыңны тооп дыңнавайн турган. 17 Олар Сени тооп дыңнаарындан ойталап, аразынга Сээң кылып турган кайгамчык чүүлдериңни сагынмайн барган. Олар чөрүүленип, Египетте кулданыынче эглирин күзээш, боттарынга баштыңчы олуртуп алган ^u. Ынчалза-даа Сен – килеңнээчел эвес, өршээринге ынак, ээ көрнүүчел, кээргээчел, өндүр улуг энерелдиг Бурган-дыр сен ^v. Оларны каапкаш барбаан сен! 18 Олар бугажык дүрзүзү шуткуп алгаш: „Израиль чон, сени Египеттен үндүре берген бурганың бо-дур“– деп турда безин ^w, Сеңээ удур коргунчуг дорамчылалдар кылып турда безин, оларны каапкаш барбаан сен.

19 Сен оларны Бодуңнуң өндүр улуг кээргелиң-биле ^x ээн кургаг ховуга каапкаш барбайн турдуң. Хүндүс булут чагы оларны эдертирин соксатпады, а дүне от чагы оларның чоруур ужурлуг оруун чырыдарын соксатпады ^y. 20 Сен Бодуңнуң ачылыг Сүлдеңни оларны өөредип каар кылдыр оларга берген сен ^z. Манна деп чемиңни олардан хунаап албаан сен ^aa, олар суксап турда, сууң берип турган сен ^ab. 21 Сен ээн кургаг ховуга дөртен чыл дургузунда оларның хереглелин хандырып келдиң ^ac; оларның хереглээн бүгү чүвези бар турду, идик-хеви элеведи, буттары ышпады ^ad.

22 Сен чонуңга күрүнелерни, чоннарны хүлээдип берип кагдың, кожа черлерни үлеп бердиң. Олар Эсевоннуң хааны Сигоннуң чери биле Васанның хааны Огтуң черин эжелеп алды ^ae. 23 Израильчилерниң ажы-төлүн дээрде сылдыстар дег хөй санныг кылып кааш ^af, ада-өгбезинге: „Ынаар киргеш, ээлеп аар силер“– деп турган чериңче эккелдиң. 24 Ол салгал чер-чуртче кирип келгеш, эжелеп алды. Сен оларга ук черге чурттап турган хананей чонну чагыртып кагдың, оларның холунга хананей хааннарны-даа, чурттуң өске чоннарын-даа кара туразында аажылаар кылдыр хүлээдип бердиң ^ag. 25 Израильчилер быжыглалдыг хоорайларны, дүжүткүр черлерни эжелеп алган. Янзы-бүрү эт-хөреңги долган бажыңнарны, хаяда оюп кылып каан кудуктарны, виноград шөлдерин, оливалыг сесерликтерни, эңдерик чимистиг ыяштарны олар эжелеп алган ^ah. Олар Сээң өндүр улуг буяның ачызында чемненип, тодуп, семирип, таалап-ханып турган ^ai.

26 Ындыг-даа болза, үймээнчилер апарып, Сеңээ удур тура халааннар, Сээң хоойлуңну артынче октапканнар ^aj. Сээң медээчилериң израильчилерни Сенче ээлдирер дээш сагындырып турган, а олар демги медээчилерни өлүрүп турду ^ak. Улус-чон Сеңээ удур коргунчуг дорамчылалдар кылып турган, 27 ынчангаш Сен оларны дайзыннарының холунга хүлээдип бээриңге, олар кызагдадып турду ^al. Ынчалза-даа кызагдаттырган үезинде Сенден дуза дилеп, кыйгырарга, оларны дээрден дыңнап, Бодуңнуң өндүр улуг кээргелиң-биле ^am дайзыннарының холундан хостап турган камгалакчыларны оларга чорудуп берип турдуң ^an.

28 Ынчалза-даа дыштанып алгаш-ла, олар катап база Сээң мурнуңга бузут үүлгедир болду. Ынчангаш Сен оларны дайзыннарының холунга хүлээдип бээриңге, дайзыннары оларны чагырып турду ^ao. А кажан олар катап база Сенден дуза дилеп, кыйгырарга, Сен дээрден дыңнап, Бодуңнуң өндүр улуг кээргелиң-биле оларны хөй катап камгалап турдуң ^ap. 29 Сээң хоойлуңче эглип кээр кылдыр оларны сагындырып турдуң, ынчалза-даа олар турамыы-биле Сээң айтыышкыннарыңны тооп дыңнавайн турду, Сээң дүрүмнериңге удур бачыт үүлгедип турду, а ол дүрүмнерни күүседип турар кижи ооң ачызында амылыг артар турган ийик ^aq. Олар Сенден чөрүүзү-биле хая көрнүп, дедир чаңын көргүзүп, Сени тооп дыңнавайн турду. 30 Сен оларны хөй чыл шыдажып келдиң. Бодуңнуң медээчилериң дамчыштыр Бодуңнуң Сүлдең-биле оларны сагындырып турдуң ^ar, ынчалза-даа олар тооп дыңнавайн келди. Ынчангаш Сен оларны өске чер чурттуг чоннарның холунга хүлээдип бердиң. 31 Ындыг-даа болза, Бодуңнуң өндүр улуг кээргелиң-биле ^as Сен оларны бүрүнү-биле узуткавадың, каапкаш барбадың, чүге дээрге ээ көрнүүчел, кээргээчел Бурган-дыр сен ^at.

32 Бистиң Бурганывыс – өндүр улуг, күчүлүг, сүртенчиг, чагыг-керээни үревес, кезээде энерелдиг Бурган! ^au Бистиң ада-өгбевисти, хааннарывысты, нояннарывысты, Бурганның бараалгакчыларын, медээчилерин – бүгү чонувусту тавараан шупту түрегдел-хилинчек Сээң мурнуңга бичии бооп көзүлбезин. Ол бергедээшкиннер ассирий хааннарның үезинден эгелээш ^av, амгы үеге чедир болуп келди. 33 Бистиң-биле болган бүгү чүве дээш, Сен чөптүг-шынныг сен, чүге дээрге шынчыңны кадагалап келдиң, а бис кем-буруулуг болдувус ^aw. 34 Бистиң хааннарывыс, нояннарывыс, Бурганның бараалгакчылары болгаш ада-өгбевис Сээң хоойлуңну күүсетпейн турду. Сээң оларга чорудуп берип турган айтыышкыннарыңны, баш бурунгаар сагындырыгларыңны олар тооп дыңнавайн барды ^ax. 35 Боттарының күрүнезинге чурттап тургаш безин, Сээң оларга берген делгем, дүжүткүр чериңге өндүр улуг ачы-буянныыңга таалап-ханып тура безин, олар Сеңээ бараан болбайн турду, боттарының бузуттуг херектеринден ойталавады ^ay. 36 Бо-дур, бис ам кулдар-дыр бис. Сээң бистиң ада-өгбевиске ооң чимизин, ачылыг беримчезин чип амыдыразын дээш берген чериңде кулдар-дыр бис ^az. 37 Чер ам элбек дүжүдүн Сээң бисти бачыттарывыс ужун чагыртып кааның хааннарга берип турар-дыр. Ол хааннар бистиң мага-бодувусту, мал-маганывысты кара туразында эдилеп тур ^ba. Бис улуг бергедээшкинге таварыштывыс».

Чоннуң Бурган-биле керээзин катаптааны

38 «Ол бүгүнүң ужурунда бис быжыг хүлээлге ап, ат салып кагдывыс ^bb. Бистиң нояннарывыс, левиттеривис болгаш Бурганның бараалгакчылары ону шынзыдып, таңмалап кагды.