Num 10 | TyvTUV | STEP | Дээрги-Чаяакчы Моисейге мынча деп чугаалаан:

‏ Numbers 10

Мөңгүн трубалар

1 Дээрги-Чаяакчы Моисейге мынча деп чугаалаан: 2 «Бодуңга ийи мөңгүн трубадан хевилей соктап кылып ал – оларны чонну чыылдырарда база турлагларны көдүрүп, медээлээрде ажыглаар сен. 3 Оларны иелдирзин этси бээрге ^a, бүгү чон Ужуражылга майгынынче кирер черге, сээң чаныңга чыглып кээр. 4 Трубаларның чүгле бирээзин этсирге, Израильдиң аймактар баштыңнары сээң чаныңга чыглып кээр. 5 А онза аялга ойнаарыңарга, чөөн чүкче көрүндүр тиктинген турлаглар көдүрлүп үнер ^b; 6 онза аялганы ийи дугаар ойнаарыңарга, мурнуу чүкче көрүндүр тиктинген турлаглар көдүрлүп үнер ^c. Чоннуң көжүп үнерин онза аялга медээлезин. 7 А чонну чыылдырарда база трубалар этсиңер, ынчалза-даа онза аялга ойнаваңар. 8 Трубаларны этсир ужурлуг улус – Аароннуң оолдары, Бурганның бараалгакчылары-дыр: силерниң келир салгалдарыңарга кезээ мөңгеде доктаадып каан хоойлу ол-дур ^d.

9 Бодуңарның чериңерге силерже халдаан дайзын-биле чаалажып үнүп тура, трубаларны этсиңер ^e, ол аялга Дээрги-Чаяакчы Бурганыңарга силерни сагындырар – Ол силерни дайзыннарыңардан камгалап каар. 10 Ол ышкаш өөрүп-хөглеп тура, байырлалдарыңар үезинде, ай чааларында база трубаларыңар этсиңер ^f, бүрүн өрттедир өргүлдер биле эп-найырал өргүлдерин салып тура ^g, этсиңер – ол дээрге Бурганыңарга боттарыңар дугайыңарда сагындырыг болур. Мен – Дээрги-Чаяакчы Бурганыңар-дыр мен».

Израиль чоннуң Синайдан көжүп үнгени

11 Ийиги чылдың ийи айның чээрбиде булут ыдыктыг өргээден көдүрлү берген. 12 Израиль чон Синай ховузундан көжүп чорупкан; булут оон ээн кургаг Фаран ховузунга доктаай берген ^h. 13 Дээрги-Чаяакчының Моисейни дамчыштыр берген айтыышкынын ёзугаар оларның бир дугаар көжүп үнгени ол.

14 Иуданың үре-салгалының тугу эң мурнунга, чурум-чыскаалдыг бөлүктер аайы-биле көдүрлүп чорупкан ⁱ; ол мөөң улусту Аминадавтың оглу Наассон баштап бар чыткан ^j. 15 Иссахарның аймааның бөлүүн Цуарның оглу Нафанаил баштап бар чыткан. 16 Завулоннуң аймааның бөлүүн Хелоннуң оглу Элиав баштап бар чыткан.

17 Оон өргээ-майгынны бузуп каапкан соонда, ону көдүрүп дажыглаар улус – Гирсон биле Мерариниң үре-салгалы шимчеп үнүпкен ^k.

18 Рувимниң үре-салгалының тугу чурум-чыскаалдыг бөлүктер аайы-биле көдүрлүп чорупкан ^l; ол мөөң улусту Шедеурнуң оглу Элицур баштап бар чыткан. 19 Симеоннуң аймааның бөлүүн Цури-Шаддайның оглу Шелумиил баштап бар чыткан. 20 Гадтың аймааның бөлүүн Регуилдиң оглу Элиасаф баштап бар чыткан. 21 Ооң соо-биле ыдыктыг чүүлдерни дажыглаан Кохаттың үре-салгалы бар чыткан ^m. (А өргээ-майгынны оларның чаа турлагга чеде бээриниң бетинде тургузуп каар ужурлуг турган.)

22 Эфремниң үре-салгалының тугу чурум-чыскаалдыг бөлүктер аайы-биле көдүрлүп чорупкан ⁿ; ол мөөң улусту Аммиудтуң оглу Элишама баштап бар чыткан. 23 Манассияның аймааның бөлүүн Педацурнуң оглу Гамалиил баштап бар чыткан. 24 Вениаминниң аймааның бөлүүн Гидеонийниң оглу Авидан баштап бар чыткан.

25 Шупту ол бөлүктерниң эң соондан Данның үре-салгалының тугу чурум-чыскаалдыг бөлүктер аайы-биле көдүрлүп чорупкан ^o; ол мөөң улусту Амми-Шаддайның оглу Ахиезер баштап бар чыткан. 26 Асирниң аймааның бөлүүн Охранның оглу Пагиил баштап бар чыткан. 27 Неффалимниң аймааның бөлүүн Энанның оглу Ахира баштап бар чыткан. 28 Израиль чоннуң бөлүктер аайы-биле көжүп үнүп турган чурум-чыскаалы ол-дур. Олар шак ынчаар көжүп чоруп турганнар.

29 Моисей Мадианның чурттакчызы, бодунуң каты Рагуилдиң ^p оглу Ховавка: «Дээрги-Чаяакчының биске бээр бооп аазааны черже көжүп үнүп тур бис ^q. Бистиң-биле кады чорувут, сеңээ эки хамаарылгалыг боор бис, Дээрги-Чаяакчы израиль чонга ачы-буянны аазаан-на болгай ^r» – дээн.

30 Ынчалза-даа Ховав аңаа: «Чорбас мен, бодумнуң черимче, төрел улузумче чанарым ол-дур» – деп харыылаан.

31 А Моисей мынча дээн: «Бисти кагбайн көрем, ээн кургаг ховуга турлагжыырывыска таарымчалыг черлерни билир-ле болгай сен, биске карак боор сен; 32 бистиң-биле кады баар болзуңза, Дээрги-Чаяакчының биске көргүзер ачы-буянындан сеңээ база көргүзер бис ^s».

33 Израильчилер Дээрги-Чаяакчының даандан үш хүннүң оруунче үнүпкеннер; Дээрги-Чаяакчы оларның турлагжып доктаар черин көрүп берзин дээш, Ооң ыдыктыг аптаразы үш хүн дургузунда оларга орук баштап бар чыткан. 34 Олар хонган черинден көжүп үнерге, Дээрги-Чаяакчының булуду хүндүс оларны кырындан шыва ап чораан ^t.

35 Ыдыктыг аптараны орукче үндүрүп турда, Моисей: «Туруп келем ^u, Дээрги-Чаяакчы, Сээң дайзыннарың тарай маңнажы берзин, Сени көөр хөңнү чок улус Сенден дезип ыңай болзун!» – деп турган. 36 А ыдыктыг аптара доктаай бээрге, ол: «Дээрги-Чаяакчы, Израильдиң муң-сая чонунче ээп кел!» – деп турган.