Num 11 | TyvTUV | STEP | Израиль чон түрегдели дээш Дээрги-Чаяакчыга дыңналдыр хыйланып эгелээн. Дээрги-Чаяакчы ону дыңнааш, килеңи кыптыга берген. Оларның аразынга Ооң оду чалбыышталдыр хып, турлагның кыдыын өрттендир чипкен .

‏ Numbers 11

Чоннуң хыйланганы

1 Израиль чон түрегдели дээш Дээрги-Чаяакчыга дыңналдыр хыйланып эгелээн. Дээрги-Чаяакчы ону дыңнааш, килеңи кыптыга берген. Оларның аразынга Ооң оду чалбыышталдыр хып, турлагның кыдыын өрттендир чипкен ^a. 2 Чон Моисейден дуза дилеп кыйгырарга, ол Дээрги-Чаяакчыга мөргүл кылган соонда, от өже берген ^b. 3 Ол черни Тавера ^{▼▼ Тавера – «кывыышкын» дээн уткалыг сөс.} деп адап каан, чүге дээрге Дээрги-Чаяакчының оду оларның аразынга кыва берген.

4 Израиль чоннуң аразынга өскээртен келген өөдежок улус бар турган ^d. Олар алыксак-чиксек чоруун көргүзүп эгелээрге, израиль чон олар-биле кады база катап ыглап-сыктап: «Бисти эът-биле чемгерзин! ^e 5 Египетке халаска чип турган балыывысты утпаан бис, а ол ышкаш огурецтер, дыняларны, кулча, согуна, чеснокту база; 6 а бо чемден хөңнүвүс кала берди ^f – маннадан өске, каракка илдигер чүү-даа чок-тур!» – дижи берген. 7 (Манна дээрге кориандр үрезиннери дег, хевири бдолах деп ыяш чугу ышкаш тараа турган. 8 – 9 Дүне турлагже шалың дүжерге, манна база ынаар дүжүп кээр турган ^g. Чон ыңай-бээр кылаштап, маннаны чыып алгаш, азы дээрбеге дээрбелеп, азы согаашка соктап ап, оон пашка хайындыргаш, боовалар быжырып чип турган; ооң амданы олива үзү холаан боова ышкаш болган.)

10 Чон өг-бүлелер аайы-биле, кижи бүрүзү чадырының мурнунда ыглажып орарын Моисей дыңнап каан; Дээрги-Чаяакчының килеңи күштүү-биле кыптыга берген, Моисейниң хөңнү база ол бүгүден баксырай берген. 11 Ол ынчан Дээрги-Чаяакчыга мынча деп чугаалаан: «Дээрги-Чаяакчы, чүге чалчаң мени мынчаар бак аажылаарың ол? Бүгү чонну менче чүдүрүп каан ужуруң чүл, Сээң карактарың чүге менче ээ көрүнмези ол? 12 Мен бо бүгү чон-биле иштиг-сааттыг чораан эвес мен азы ону божуп алган эвес мен, ол хиреде-ле: „Чаш төлдү холунда көдүрүп алган бар чыдар уруг эмзирер херээжен дег, ол чоннуң ада-өгбезинге бээр бооп аазааным черже ону холуңга көдүрүп алгаш, чедире бер“– деп чооруң ол? 13 Бо чоннуң шуптузунга бээр эътти кайыын эккээр мен?! Олар мээң мурнумда ыглап-сыктап: „Биске чиир эъттен бер!“– дижип турлар. 14 Мен чааскаан бо чон дээш сагыш човап шыдавас мен, ол чүък меңээ хөлүн эрттир аар-дыр ^h. 15 Меңээ хамаарылгаң ындыг чүве болза, мени өлүрүп кааның дээре боор ⁱ, а бир эвес Сээң карактарың менче ээ көрнүп турар болза, човалаңым менден адырылзын».

Бурганның харыызы

16 Дээрги-Чаяакчы Моисейге мынча дээн: «Израильдиң баштыңнарының аразындан Меңээ чоннуң удуртукчулары дээрзин билириң чеден кижиден чыып бер ^j. Оларны Ужуражылга майгынының чанынга эккел, аңаа сээң-биле кады турзуннар. 17 Мен дүжүп келгеш, аңаа сээң-биле чугаалажыр мен; сени бүргээн Сүлдемден оларга база берип каар мен ^k – олар чонну сээң-биле кады көдүржүр, сен ону чааскаан көдүрүп алгаш чорбас сен.

18 А чонга мынча дээр сен: „Даартагы хүн дээш, ыдыктанып алыңар ^l, ынчан эът чиир силер, чүге дээрге ‘Бисти эът-биле чемгерзин! Египетке эки-ле чурттап чордувус ийин’ дижип, Дээрги-Чаяакчыга дыңналдыр ыглап-сыктап турган-дыр силер; Ол ам эът бээрге, чиир силер. 19 Чаңгыс хүн эвес, ийи, беш, он-даа хүн эвес, чээрби хүн безин эвес, 20 а бүдүн ай дургузунда ону чиир силер – араңарда турар Дээрги-Чаяакчыны тоовайн, Ооң мурнунга ыглап-сыктап, ‘Египеттен чүге үнүп чоруй барган бис?’ деп турганыңар ужун – ол эът аксы-думчууңардан дедир үнүп, кустуккуже, силерге ческинчиг болу бергиже, ону чиир силер“».

21 Моисей Дээрги-Чаяакчыдан: «Мээң ам аразында турарым чон 600 000 чадаг эр кижилиг-дир ^m, а Сен болза: „Мен эът бээримге, олар бүдүн ай дургузунда чиир“– деп тур сен. 22 Шээр база бода малывысты кодан-коданы-биле дөгерип-даа берзивиссе, оларга четчир деп бе? Далайның хамык балыын-даа оларга тудуп берзе, четчир деп бе?» – деп айтырган.

23 Дээрги-Чаяакчы Моисейге: «Дээрги-Чаяакчының холу чолдая берген деп бодадың бе? ⁿ Сеңээ чугаалаан сөзүмнүң бүдер-бүтпезин ам көөр сен ^o» – дээн.

24 Моисей баргаш, Дээрги-Чаяакчының сөстерин чонга дамчыткаш, ооң баштыңнарындан чеден кижини чыып алгаш, Ужуражылга майгынын дескиндир тургузуп каан. 25 Дээрги-Чаяакчы ынчан булут аразынга дүжүп келгеш, Моисей-биле чугаалашкан. Оон Моисейни бүргээн Сүлдеден чеден баштыңга база берип каан. Олар Сүлдеге бүргедипкен дораан-на өттүр билип медеглеп эгелээннер, а оон соксап кааннар.

26 Шилиттинген чеден баштыңның ийизи турлагга артып калган турган. Оларның аттары Элдад биле Модад чүве-дир. Олар майгын чанынче үнмээн-даа болза, Сүлде оларны база бүргей апкан. Ынчангаш олар турлагга өттүр билип медеглеп эгелээн. 27 Бир элээди оол маңнап келгеш, Моисейге сөс чедирип: «Элдад биле Модад турлагда өттүр билип медеглеп турлар» – дээн.

28 Нуннуң оглу Иисус – аныяандан бээр Моисейниң дузалакчызы ^{▼▼ Азы: «Моисейниң дузалакчызы, ооң шилип алган улузунуң бирээзи».}: «Мээң дээргим Моисей! Оларны хоруп көрүңерем» – деп чугаалаан. 29 А Моисей аңаа: «Мени дээш хүннеп турарың ол бе? Дээрги-Чаяакчы бүгү чонга Бодунуң Сүлдезин чорудуп берген болза! Олар шупту Ооң медээчилери болу берген болза!» – дээн. 30 Моисей оон турлагже Израильдиң баштыңнары-биле ээп келген.

31 Дээрги-Чаяакчының дужааганын ёзугаар далайдан хат көдүрүлгеш, ол черже матпадактарны хадып эккелгеш, турлаг чанынга тарадыр октап каапкан: матпадактар турлаг чанында черни бир талаже бир хүннүк чоруур хире ырадыр, өске талаже бир хүннүк чоруур хире ырадыр база кылыны ийи кыры дурту хире кылдыр шыва апкан ^q. 32 Чон барып, ол хүннү бадыр, ол дүннү өттүр база дараазында хүннү бадыр матпадактарны чыып ап турган, эң эвээшти чыып алган кижи безин он хомер ^{▼▼ Он хомер 2000 литр ажыг ишкир.} иштин долдуруп алган! Израильчилер матпадактарны турлагны долгандыр чада салып алганнар. 33 Эът ам-даа оларның диштеринде хевээр артып, хырын иштинче кирип четтикпээнде, Дээрги-Чаяакчының килеңи чонче кыптыгып, Ол хөй улусту аажок күштүг айыыл-халап-биле чок кылып каан. 34 Шак ол черге Киброт-Гаттаава ^{▼▼ Киброт-Гаттаава – «Алыксак-чиксек чоруктуң чевеглери» дээн уткалыг ат.} деп ат тывыскан, чүге дээрге аңаа алыксак-чиксек улусту ажаап каан чүве-дир.

35 Чон оон Киброт-Гаттаавадан көжүп үнгеш, Асиротка четкеш, доктаай берген ^t.